କଟକ ଅଫିସ୍,୮।୧:ଘରୋଇ ସ୍କୁଲ୍ରେ ଫି’ ହ୍ରାସକୁ ନେଇ ଆଗତ ମାମଲାରେ ଗୁରୁବାର ହାଇକୋର୍ଟ ଏକ ଗୁରୁତ୍ୱପୂର୍ଣ୍ଣ ରାୟ ଶୁଣାଇଛନ୍ତି। ଫି’ ହ୍ରାସ ସମ୍ପର୍କରେ ହାଇକୋର୍ଟଙ୍କ ଦ୍ୱାରା ଗଠିତ ଉଚ୍ଚସ୍ତରୀୟ କମିଟି ଯେଉଁ ସୁପାରିସ କରିଥିଲେ, ସେହି ଆଧାରରେ ଘରୋଇ ସ୍କୁଲ୍ ଗୁଡ଼ିକ ଫି’ ହ୍ରାସ କରିବେ ବୋଲି ଉଚ୍ଚ ଅଦାଲତ କହିଛନ୍ତି। ଯଦି ଏଥିରେ କାହାର କୌଣସି କିଛି ଆପତ୍ତି ଥାଏ ତେବେ ସେ କୋର୍ଟରେ ରିଟ ପିଟିସନ ଦାଖଲ କରିପାରିବେ ବୋଲି ମୁଖ୍ୟବିଚାରପତି ଏସ୍. ମୁରଲୀଧର ଏବଂ ବିଚାରପତି ବି.ଆର୍. ଷଡ଼ଙ୍ଗୀଙ୍କୁ ନେଇ ଗଠିତ ଖଣ୍ଡପୀଠ କହିଛନ୍ତି।
କରୋନା ସମୟରେ ଲକ୍ଡାଉନ ଓ ଶଟଡାଉନ ଯୋଗୁ ସବୁ କିଛି ବନ୍ଦ ହୋଇଯାଇଥିଲା। ଏପରି କି ସ୍କୁଲ ଓ ଶିକ୍ଷାନୁଷ୍ଠାନ ବନ୍ଦ ରହିଥିଲା। ଲୋକଙ୍କ ଆର୍ଥିକ ସ୍ଥିତି ବିଗିଡ଼ି ଯାଇଥିଲା। ଏହି ସମୟରେ ଅଧିକାଂଶ ଘରୋଇ ସ୍କୁଲଗୁଡ଼ିକ ପୂର୍ବପରି ଫି’ ଆଦାୟ କରୁଥିଲେ। ଏହାକୁ ବିରୋଧ କରି ୨୦୨୦ ଏପ୍ରିଲ୍ରେ ଘରୋଇ ଅଭିଭାବକ ସଂଘ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ପରେ ଜୁଲାଇ ୫ରେ କୋର୍ଟ ଏହାର ଶୁଣାଣି କରିବା ସହ ଏକ ଉଚ୍ଚସ୍ତରୀୟ କମିଟି ଗଠନ କରି ଆପୋଷ ବୁଝାମଣାରେ ଫି’ ହ୍ରାସ ପାଇଁ ପ୍ରସ୍ତାବ ଦେବାକୁ ନିର୍ଦ୍ଦେଶ ଦେଇଥିଲେ। ଓଡ଼ିଶା ଅଭିଭାବକ ମହାସଂଘ, ଘରୋଇ ସ୍କୁଲ ଆସୋସିଏଶନ, ଘରୋଇ ଶିକ୍ଷକ ଆସୋସିଏଶନ, ସ୍କୁଲ୍ ଫି’ ଛାଡ଼ ପାଇଁ ଆବେଦନ କରିଥିବା ୨ ଆବେଦନକାରୀ ପ୍ରହଲ୍ଲାଦ ରାଉତ ଏବଂ ମହମ୍ମଦ ମୁସ୍ତାକ ଅନ୍ସାରୀଙ୍କୁ ନେଇ ଉକ୍ତ ଉଚ୍ଚସ୍ତରୀୟ କମିଟି ବସିଥିଲା। ସେଥିରେ ଆପୋଷ ବୁଝାମଣା କ୍ରମେ ବାର୍ଷିକ ୬ହଜାର ଟଙ୍କା ପର୍ଯ୍ୟନ୍ତ ଟ୍ୟୁସନ ଫି’ ନେଉଥିବା ସ୍କୁଲର କୌଣସି ଫି’ ଛାଡ଼ କରାଯାଇପାରିବ ନାହିଁ ନିଷ୍ପତ୍ତି ହୋଇଥିଲା। ତେବେ ୬ ରୁ ୧୨ ହଜାର ଟଙ୍କା ପର୍ଯ୍ୟନ୍ତ ଫି’ରେ ୭.୫%, ୧୨ ରୁ ୨୪ହଜାର ଫି’ରେ ୧୨%, ୨୪ରୁ ୪୮ହଜାର ପର୍ଯ୍ୟନ୍ତ ଫି’ରେ ୧୫%, ୪୮ରୁ ୭୨ହଜାର ପର୍ଯ୍ୟନ୍ତ ଫି’ରେ ୨୦% ଛାଡ଼। ସେହିପରି ୭୨ହଜାରରୁ ୧ଲକ୍ଷ ପର୍ଯ୍ୟନ୍ତ ୨୫% ଏବଂ ୧ଲକ୍ଷରୁ ଊର୍ଦ୍ଧ୍ୱ ଫି’ ପାଇଁ ୨୬% ଛାଡ଼ କରିବାକୁ କମିଟି ସୁପାରିସ କରିଥିଲା। ଏପରିକି ଟ୍ୟୁଶନ ଫି’ ବାବଦ ଅନ୍ୟ ଆନୁସଙ୍ଗିକ ଫି’ ଛାଡ଼ କରିବାକୁ କମିଟି କହିଥିଲା। ପରେ ଏନେଇ କୋର୍ଟ ସରକାରଙ୍କ ଠାରୁ ସ୍ପଷ୍ଟିକରଣ ମାଗିଥିଲେ। ହେଲେ ଘରୋଇ ସ୍କୁଲ ଫି’ ନିର୍ଦ୍ଧାରଣରେ ରାଜ୍ୟ ସରକାରଙ୍କ କୌଣସି ବ୍ୟବସ୍ଥା ନାହିଁ ବୋଲି ସରକାର ସତ୍ୟପାଠ ଦାଖଲ କରିଥିଲେ।