ରାୟଗଡ଼ା ଅଫିସ, ୨୯।୯: କୋରାପୁଟ ଏମ୍ପି ସପ୍ତଗିରି ଉଲାକା ରାୟଗଡ଼ା ଜିଲା ଟିକିରିସ୍ଥିତ ଉତ୍କଳ ଆଲୁମିନା ଚାରିପଟେ ଥିବା ଗ୍ରାମବାସୀଙ୍କୁ ନେଇ ମଙ୍ଗଳବାର ବ୍ରହ୍ମପୁରରେ ଦକ୍ଷିଣାଞ୍ଚଳ ଆର୍ଡିସି ଟି.ଆଓଙ୍କୁ ଭେଟିଛନ୍ତି। କମ୍ପାନୀ ଚାରିପଟେ ରହିଥିବା ଗ୍ରାମବାସୀଙ୍କୁ ଅନ୍ୟତ୍ର ସ୍ଥାନାନ୍ତର କରିବାକୁ ସେ ଦାବି କରିଛନ୍ତି। କମ୍ପାନୀ ପ୍ରତିଷ୍ଠାବେଳେ କର୍ତ୍ତୃପକ୍ଷ ଦେଇଥିବା ପ୍ରତିଶ୍ରୁତିକୁ ଏଯାବତ୍ ପୂରଣ କରାଯାଇନି ବୋଲି ସେ ଆର୍ଡିସିଙ୍କୁ ଜଣାଇଥିଲେ।
ଟିକିରିର ଦୋରାଗୁଡାରେ ୨୦୦୪ କମ୍ପାନୀ ସ୍ଥାପନବେଳେ ପ୍ରଭାବିତ ହୋଇଥିବା ଦିମୁଣ୍ଡି, ଡ଼ି-କରଳ ଓ କେନ୍ଦୁଖୁଟି ଗ୍ରାମକୁ ଅନ୍ୟତ୍ର ସ୍ଥାନାନ୍ତର, ଜମି ଓ ଘର ହରାଇଥିବା ପରିବାରକୁ କମ୍ପାନୀରେ ସ୍ଥାୟୀ ନିଯୁକ୍ତି ମିଳିବ ବୋଲି କର୍ତ୍ତୃପକ୍ଷ ପ୍ରତିଶ୍ରୁତି ଦେଇଥିଲେ। ଏହା ମଧ୍ୟରେ କାରଖାନା ସ୍ଥାପନକୁ ୧୭ବର୍ଷ ବିତିଗଲାଣି। କିନ୍ତୁ ଲୋକଙ୍କ ସମସ୍ୟାର ସମାଧାନ ଆଜି ଯାଏ ହୋଇପାରିଲା ନାହିଁ। କାରଖାନାକୁ ଲାଗିରହିଥିବା ଗ୍ରାମଗୁଡିକରେ ବାୟୁ, ଶବ୍ଦ, ଜଳ ପ୍ରଦୂଷଣ ହେଉଛି। ଲୋକେ ଅନେକ ରୋଗରେ ପୀଡିତ ହୋଉଛନ୍ତି। ସେହିଭଳି ଆଜିଯାଏ କିଛି ବିସ୍ଥାପିତ ପରିବାରକୁ କମ୍ପାନୀରେ ନିଯୁକ୍ତି ମଧ୍ୟ ମିଳିଲା ନାହିଁ। ଏ ସମସ୍ତ ବିଷୟରେ ହାଇକୋର୍ଟଙ୍କୁ ଅବଗତ ପରେ ଆର୍ଡିସିଙ୍କୁ ଏହାର ସମାଧାନ ପାଇଁ ନିର୍ଦ୍ଦେଶ ଦିଆଯାଇଛି। କମ୍ପାନୀ ଚାରିପଟେ ଥିବା ଗ୍ରାମର ମୌଳିକ ଆବଶ୍ୟତା ପୂରଣ ପାଇଁ ସିଏସ୍ଆର୍ ପାଣ୍ଠିରୁ ଅର୍ଥ ପ୍ରଦାନ ପାଇଁ ବାରମ୍ବାର ଅବଗତ କଲେ ମଧ୍ୟ କିଛି ଫଳ ମିଳୁନି। ଅଞ୍ଚଳବାସୀ ବାରମ୍ବାର ଜିଲାପାଳ ଓ କମ୍ପାନୀ କର୍ତ୍ତୃପକ୍ଷଙ୍କୁ ଗୁହାରି କରିବା ସତ୍ତ୍ୱେ କୌଣସି ଫଳ ମିଳୁନାହିଁ ବୋଲି ଗ୍ରାମବାସୀ ଓ ଏମ୍ପି ଉଲ୍ଲାକା ଆର୍ଡିସିଙ୍କୁ କହିଥିଲେ। ୩ମାସ ମଧ୍ୟରେ ବିସ୍ଥାପିତ ଓ ପାରିପାର୍ଶ୍ୱିକ ବିକାଶ ପରାମର୍ଶଦାତା କମିଟି ବୈଠକ ରାୟଗଡ଼ାରେ କରାଯିବ। ସେଠାରେ ଏହି ସମସ୍ୟା ସମ୍ପର୍କରେ ଆଲୋଚନା ହେବ ବୋଲି ଆର୍ଡିସି ପ୍ରତିଶ୍ରୁତି ଦେଇଥିଲେ।
କମ୍ପାନୀ ପ୍ରତିଷ୍ଠା ହେବା ପୂର୍ବରୁ ଅନେକ ପ୍ରତିଶ୍ରୁତି ଦେଇଥିଲା। ହେଲେ ଏବେ ତାହା ପୁରଣ କରୁନି। କମ୍ପାନୀର ଚତୁର୍ପାଶ୍ୱରେ ଆମ ଘର ହୋଇଥିବାରୁ ଶବ୍ଦ ପ୍ରଦୂଷଣ, ଧୁଆ ପ୍ରତିଦିନ ସହ୍ୟ କରିବାକୁ ପଡୁଛି। ପିଲାମାନେ ପାଠ ପଢିବା ପାଇଁ ଅନେକ ଅସୁବିଧା ହେଉଛି। ମାନସିକ ରୂପେ ଦୁର୍ବଳ ହୋଇଗଲୁଣି ବୋଲି ବାରମ୍ବାର ଜିଲା ପ୍ରଶାସନକୁ ଜଣାଇଲୁ। କମ୍ପାନୀ ଏବଂ ଗ୍ରାମକୁ ସଂଯୋଗ କରୁଥିବା ଏକ ଗେଟ ଦେଇ କମ୍ପାନୀ ଭିତରକୁ ଯାଇ କର୍ତ୍ତୃପକ୍ଷଙ୍କୁ ସମସ୍ୟା ସମ୍ପର୍କରେ ଜଣାଇଲୁ। ଆମ ଉପରେ ଲାଠି ଚାର୍ଜ କରାଯାଇ ତୁରନ୍ତ ଜାଗା ଛାଡିବାକୁ କୁହାଯାଇ ଥିଲା। ଏବେ ଉକ୍ତ ଗେଟକୁ ବନ୍ଦ କରି ଦିଆଗଲା। ଆମକୁ ତୁରନ୍ତ ଏଠାରୁ ଅନ୍ୟତ୍ର ସ୍ଥାନାନ୍ତର କରାଯାଉ ବୋଲି କାଶୀପୁର ବ୍ଲକ ହାଡ଼ିଗୁଡା ପଞ୍ଚାୟତ ଦିମୁଣ୍ଡି ଗ୍ରାମର ସୁଶୀଳା ନାୟକ କହିଛନ୍ତି। କାଶୀପୁର ବ୍ଲକ କୁଚେଇପଦର ପଞ୍ଚାୟତ ଡି-କରଳ ଗ୍ରାମ ର ହଳ ଧର ନାୟକ କହିଛନ୍ତି, କମ୍ପାନୀ ପ୍ରତିଷ୍ଠା ପୂର୍ବରୁ ଅଞ୍ଚଳବାସୀଙ୍କୁ କୌଣସି ଅସୁବିଧା ହେବ ନାହିଁ ବୋଲି କର୍ତ୍ତୃପକ୍ଷ କହିଥିଲେ। ରାସ୍ତାଘାଟ, ପାନୀୟ ଜଳ ସମସ୍ୟା ସମାଧାନ ସହ ଦୀର୍ଘ ୧୫ ବର୍ଷ ହେବ ଆମକୁ ସ୍ଥାନାନ୍ତର କରାଯାଉ ବୋଲି ଦାବି କରିଥିଲେ ମଧ୍ୟ ତାହା ପୂରଣ ହେଉ ନ ଥିବା ସେ କହିଛନ୍ତି।