ଚାଇନାର ଏକ କମ୍ପାନୀକୁ ଏବେ କର୍ମଚାରୀମାନେ ପ୍ରଶଂସା କରୁଛନ୍ତି। ସମସ୍ତେ କହୁଛନ୍ତି, କମ୍ପାନୀ ହେବ ତ ଏମିତି। ପ୍ରକୃତ କଥା ହେଲା ଚାଇନାର ଏକ କ୍ରେନ୍ କମ୍ପାନୀ କର୍ମଚାରୀଙ୍କୁ ବୋନସ ଦେବା ପାଇଁ ଏକ ଅନନ୍ୟ ଉପାୟ ପାଞ୍ଚି ହୃଦୟ ଜିଣିଛି। ଏହି ଭିଡିଓଟି ବିଭିନ୍ନ ସୋସିଆଲ ମିଡିଆ ପ୍ଲାଟଫର୍ମରେ ବହୁଳ ଭାବରେ ଶେୟାର କରାଯାଉଛି। ଭିଡିଓରେ ଦେଖାଯାଉଛି, ଟେବୁଲ ଉପରେ ଟଙ୍କା ପଡ଼ିଛି ଏବଂ କର୍ମଚାରୀମାନେ ତାହାକୁ ଶୀଘ୍ରଶୀଘ୍ର ଗଣୁଛନ୍ତି।
ରିପୋର୍ଟ ଅନୁସାରେ, ହେନାନ ମାଇନିଂ କ୍ରେନ୍ କମ୍ପାନୀ ଲିମିଟେଡ୍ ଟେବୁଲ ଉପରେ ୧୧ ନିୟୁତ ସିଙ୍ଗାପୁର ଡଲାର (ଭାରତୀୟ ମୁଦ୍ରାରେ ୭୦ କୋଟି ଟଙ୍କା) ରଖିଥିଲା ଏବଂ କର୍ମଚାରୀମାନଙ୍କୁ କହିଥିଲା ଯେ, ୧୫ ମିନିଟ୍ରେ ଯିଏ ଯେତେ ଟଙ୍କା ଗଣିବ ସେ ଟଙ୍କା ତାହାର ହେବ। ଏହା ଶୁଣି କର୍ମଚାରୀମାନଙ୍କ ଖୁସିର ସୀମା ରହିଲା ନାହିଁ। ପ୍ରତ୍ୟେକ କର୍ମଚାରୀ ଯଥାସମ୍ଭବ ଟଙ୍କା ଗଣିବାରେ ବ୍ୟସ୍ତ ରହିଲେ।
କ୍ରେନ ନିର୍ମାଣକାରୀ କମ୍ପାନୀ ପ୍ରାୟ ୭୦ ମିଟର ଲମ୍ବା ଏକ ଟେବୁଲ ଉପରେ ଟଙ୍କା ବିଛାଇ ଦେଇଥିଲା ଏବଂ ପ୍ରତ୍ୟେକ ୩୦ ଜଣ କର୍ମଚାରୀଙ୍କର ଦଳ ଗଠନ କରିଥିଲା। ଏହା ପରେ କୁହାଗଲା ଯେ, ପ୍ରତ୍ୟେକ ଦଳ ସେମାନଙ୍କର ଦୁଇଜଣ ସାଥୀଙ୍କୁ ପଠାଇବା ଉଚିତ, ୧୫ ମିନିଟରେ ସେମାନେ ଯେତେ ଟଙ୍କା ଗଣିବେ ସେହି ଦଳ ମଧ୍ୟରେ ବାଣ୍ଟି ଦିଆଯିବ।
ଜାନୁଆରୀ ୨୮ରେ @mothershipsg ଇନ୍ଷ୍ଟାଗ୍ରାମ ହ୍ୟାଣ୍ଡେଲରୁ ପୋଷ୍ଟ ହୋଇଥିବା ଏହି ଭିଡିଓକୁ ଏପର୍ଯ୍ୟନ୍ତ ୧୬ ଲକ୍ଷରୁ ଅଧିକ ଲୋକ ଦେଖିସାରିଥିବାବେଳେ ହଜାର ହଜାର ଲୋକ ଲାଇକ୍ କରିଛନ୍ତି। ଏହା ସହିତ ସୋସିଆଲ ମିଡିଆରେ କମେଣ୍ଟର ବନ୍ୟା ସୁଅ ଛୁଟିଛି। ଜଣେ ୟୁଜର କହିଛନ୍ତି, ଏପରି ଜିନିଷ କର୍ମଚାରୀମାନଙ୍କୁ ଉତ୍ସାହିତ କରେ, କିନ୍ତୁ ଏହା ଆମ ଭାଗ୍ୟରେ ନାହିଁ। ଆଉ ଜଣେ ୟୁଜର କହିଛନ୍ତି, ଭିଡିଓ ଦେଖିବା ପରେ ମୋ ବସ୍ ହସୁଛନ୍ତି। ଅନ୍ୟ ଜଣେ ୟୁଜର ଲେଖିଛନ୍ତି, ମୋ କମ୍ପାନୀ ମଧ୍ୟ ସମାନ କିନ୍ତୁ ଏହା ଟଙ୍କା ଦେବା ପରିବର୍ତ୍ତେ କାମ ଲଦି ଦେବା ଉପରେ ଅଧିକ ଧ୍ୟାନ ଦିଏ।
