ନୂଆଦିଲ୍ଲୀ,୧୯।୯: ଘରୋଇ ବଜାରରେ ପ୍ରାଇଭେଟ ଟ୍ରେନ୍ ଚଳାଇବା ଲାଗି ସରକାର ନିଷ୍ପତ୍ତି ନେଇଛନ୍ତି। ଏହି ଟ୍ରେନଗୁଡିକ ଚଳାଚଳ ଆରମ୍ଭ ହେଲେ ପ୍ରାଇଭେଟ ପ୍ଳେୟର ଯାତ୍ରୀଭଡା ନିର୍ଦ୍ଧାରଣ କରିବେ। ଏଥିଲାଗି ସରକାର ପ୍ରାଇଭେଟ ଟ୍ରେନ ପରିଚାଳନା କରୁଥିବା କମ୍ପାନୀଗୁଡିକୁ ଅନୁମତି ପ୍ରଦାନ କରିବେ ବୋଲି ଜଣାପଡିଛି। ଏସିଆର ସବୁଠାରୁ ପୁରାତନ ରେଳ ନେଟ୍ଓ୍ବର୍କ ଭାବେ ପରିଚିତ ଭାରତୀୟ ରେଲଓ୍ବେରେ ବିଦେଶୀ ନିବେଶକଙ୍କୁ ଆକୃଷ୍ଟ କରିବା ଲାଗି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସରକାର ଯୋଜନା ରଖିଛନ୍ତି। ରେଳ ବୋର୍ଡ ଅଧ୍ୟକ୍ଷ ଭି.କେ.ଯାଦବ କହିଛନ୍ତି, ଯାତ୍ରୀ ଭଡା ନିର୍ଦ୍ଧାରଣ କରିବା ଲାଗି ଘରୋଇ କମ୍ପାନୀଙ୍କୁ ସ୍ବାଧୀନତା ଦିଆଯିବ। ଏହି ରୁଟ୍ଗୁଡିକରେ ଏୟାର କଣ୍ଡିସନ ବସ୍ ଏବଂ ପ୍ଲେନ୍ ମଧ୍ୟ ଚଳାଚଳ କରିବ। ଭଡା ନିର୍ଦ୍ଧାରଣ ହେଲା ପରେ ବିଭିନ୍ନ ଯୋଜନା ହାତକୁ ନିଆଯିବ ବୋଲି ଯାଦବ ସ୍ପଷ୍ଟ କରିଛନ୍ତି।
ରେଳ ଯାତ୍ରୀଭଡା ଦେଶରେ ଏକ ସମ୍ବେଦନଶୀଳ ପ୍ରସଙ୍ଗ। ଦେଶରେ ଯେତେ ଲୋକ ଦୈନିକ ରେଳ ଯାତ୍ରା କରନ୍ତି ତାହା ଅଷ୍ଟ୍ରେଲିଆର ମୋଟ ଜନସଂଖ୍ୟାଠାରୁ ଅଧିକ। ଭାରତରେ ଲୋକମାନେ ଯାତ୍ରା ଲାଗି ରେଲଓ୍ବେ ଉପରେ ବିଶେଷ ଭାବେ ନିର୍ଭର କରିଥାନ୍ତି। ରେଳ ନେଟ୍ଓ୍ବର୍କରେ ପ୍ରତିଦ୍ୱନ୍ଦ୍ୱିତା ବଢାଇବା ଲାଗି ଘରୋଇ କମ୍ପାନୀଗୁଡିକୁ ସୁଯୋଗ ଦେବାକୁ ସରକାର ଯୋଜନା ରଖିଛନ୍ତି। ଏହାଦ୍ୱାରା ଷ୍ଟେଶନ ବିକାଶ ଏବଂ ରେଳ ପରିଚାଳନାକୁ ଉନ୍ନତ କରାଯିବାକୁ ଯୋଜନା ରଖାଯାଇଛି। ରେଳ କ୍ଷେତ୍ରରେ ବର୍ତ୍ତମାନ ଆଂଶିକ ଭାବେ ଘରୋଇ କ୍ଷେତ୍ରକୁ ସରକାର ସୁଯୋଗ ପ୍ରଦାନ କରିଛନ୍ତି। ଏହି ପ୍ରକଳ୍ପଗୁଡିକ ଲାଗି ଆଲଷ୍ଟମ ଏସ୍ଏ, ବୋମ୍ବାଡିଅର ଇଙ୍କ, ଜିଏମ୍ଆର୍ ଇନଫ୍ରାକ୍ଟ୍ରକଚର ଲିମିଟେଡ୍ ଏବଂ ଆଦାନୀ ଏଣ୍ଟରପ୍ରାଇଭେସ ଭଳି କମ୍ପାନୀ ଆଗ୍ରହ ଦେଖାଇଛନ୍ତି। ନୂଆ ପ୍ରକଳ୍ପ କାର୍ଯ୍ୟକାରୀ ହେଲେ ରେଲଓ୍ବେ ପ୍ରାୟ ୭.୫ ବିଲିୟନ ଡଲାରର ନିବେଶ ଆକୃଷ୍ଟ କରିପାରିବ। ରେଲଓ୍ବେର ଉନ୍ନତୀକରଣ ଲାଗି କେନ୍ଦ୍ର ସରକାର ବର୍ତ୍ତମାନ ଗୁରୁତ୍ୱ ଦେଉଛନ୍ତି। ୨୦୨୩ ସୁଦ୍ଧା ଦେଶ ମଧ୍ୟରେ ଘରୋଇ ଟ୍ରେନ ଚଳାଇବା ଲାଗି ଜାପାନରୁ ଋଣ ମଧ୍ୟ କରାଯାଇଛି। ଟ୍ରେନଗୁଡିକର ଗତି ବଢାଇବା ଲାଗି ମଧ୍ୟ ଯୋଜନା ରଖାଯାଇଛି। ଅପରପକ୍ଷରେ ବ୍ୟସ୍ତବହୁଳ ଷ୍ଟେଶନଗୁଡିକ ଲାଗି ୟୁଜର ଫି ଚାର୍ଜ କରିବ କରିବ। ଫଳରେ ଭଡା ବଢିବା ନେଇ ଆକଳନ କରାଯାଇଛି। ସୂଚନାଯୋଗ୍ୟ, ୧୦୯ ରୁଟ୍ରେ ୧୫୧ ଘରୋଇ ଟ୍ରେନ ଚଳାଚଳ କରାଇବା ଳାଗି ସରକାର ଆଗ୍ରହ ପତ୍ର ଆହ୍ବାନ କରିଛନ୍ତି।