ଭୁବନେଶ୍ୱର, ୨।୯ (ବନ୍ଦନା ସେଠୀ): ଶୁକ୍ରବାର ଦିନତମାମ ପାଗ ଖରାଟିଆ ଥିଲା। ଏପରି କି ଗରମ ମଧ୍ୟ ଅନୁଭୂତ ହେଉଥିଲା। ପରେ ଅପରାହ୍ନରୁ ପାଗ ଆଂଶିକ ମେଘୁଆ ରହିବା ସହ କାଁ ଭାଁ ସ୍ଥାନରେ ସ୍ବଳ୍ପ ବର୍ଷା ହୋଇଥିଲା। ହେଲେ ସନ୍ଧ୍ୟାରେ କଳାହାଣ୍ଡିଆ ମେଘ ଘୋଟି ଆସିବା ସହ ବିଜୁଳି ଘଡ଼ଘଡ଼ି ସାଙ୍ଗକୁ ପ୍ରବଳ ବର୍ଷା ହୋଇଥିଲା। ସା ପ୍ରାୟ ୭ଟା ୧୫ରୁ ୭ଟା ୪୫ ଯାଏ ଭୁବନେଶ୍ବରରେ ପ୍ରବଳ ବର୍ଷା ହୋଇଥିଲା। ଫଳରେ ସହରର ଏକାଧିକ ସ୍ଥାନରେ ପାଣି ଜମିଥିବାବେଳେ ରାସ୍ତାରେ ଯାତାୟାତ କଷ୍ଟକର ହୋଇପଡ଼ିଥିଲା। ଅଧିକାଂଶ ସ୍ଥାନରେ ଡ୍ରେନ୍ ସଫେଇ କାର୍ଯ୍ୟ ଶେଷ ହୋଇ ନ ଥିବାରୁ ଲୋକମାନେ ବର୍ଷା ପରେ ଅସ୍ତବ୍ୟସ୍ତ ହୋଇପଡ଼ିଥିଲେ। ବର୍ଷା ପରେ ଏଭଳିସ୍ଥିତିକୁ ଦେଖିବା ପରେ ବିଏମ୍ସିର ମୌସୁମୀ ପ୍ରସ୍ତୁତି ଏକପ୍ରକାର ଫେଲ୍ ମାରିଥିବା ସ୍ପଷ୍ଟ ହୋଇଛି। ଘନଘନ ବୈଠକ, କ୍ଷେତ୍ର ପରିଦର୍ଶନ କିଛି ବି ସୁଫଳ ଦେଇପାରି ନାହିଁ। ଅପରପକ୍ଷେ ସହରର ସମସ୍ତ ଡ୍ରେନ୍ ସଫେଇ ହୋଇ ନ ଥିବାରୁ ଏକାଧିକ ସ୍ଥାନରେ ପାଣି ଜାମ୍ ହୋଇ ରାସ୍ତାକୁ ଉଛୁଳିଥିଲା। ଖୋଦ୍ ବିଏମ୍ସି ମୁଖ୍ୟାଳୟର ମାତ୍ର କେଇ ମିଟର ଦୂରରେ ଥିବା ମହାନ୍ତି ସ୍କୋୟାରଠାରେ ଆଣ୍ଠୁଏ ଉଚ୍ଚର ପାଣି ଜମିଥିବା ଦେଖିବାକୁ ମିଳିଥିଲା। ସେହିପରି ଝାରପଡ଼ା ଜେଲ ରୋଡରେ ମଧ୍ୟ ପାଣି ଲହଡ଼ି ମାରିଥିବା ଦେଖିବାକୁ ମିଳିଥିଲା। ମାତ୍ର ଅଧଘଣ୍ଟାର ବର୍ଷାରେ ଡ୍ରେନ ଚୋକ୍ ହୋଇଯାଉଥିବାବେଳେ ରାସ୍ତାରେ ପାଣି ଜମିବା ଲୋକଙ୍କୁ ଆଶ୍ଚର୍ଯ୍ୟ କରିଛି। ଅପରପକ୍ଷେ ବିଏମ୍ସି ପକ୍ଷରୁ କିଛି ସ୍ଥାନରେ ଜଳ ନିଷ୍କାସନ ଲାଗି ପମ୍ପ ସେଟ ଲଗାଯାଇଥିଲା। ସହରର ବିଭିନ୍ନ ତଳି ଅଞ୍ଚଳ ସମେତ ସୌଭାଗ୍ୟ ନଗର, ଶହୀଦନଗର, ବମିଖାଲ ଫ୍ଲାଏଓଭର, ଝାରପଡ଼ା, କଟକ-ଭୁବନେଶ୍ବର ଜାତୀୟ ରାଜପଥ ଆଦି ପ୍ରମୁଖ ସ୍ଥାନ ଏପରିକି ଭୁବନେଶ୍ବର ରେଳଷ୍ଟେଶନରେ ମଧ୍ୟ ଆଣ୍ଠୁଏ ଉଚ୍ଚର ପାଣି ଜମିଥିବା ଦେଖିବାକୁ ମିଳିଥିଲା।