ତେନ୍ତୁଳିଖୁଣ୍ଟି, ୯।୧୦(ଚିଦାନନ୍ଦ ସାହୁ):ନବରଙ୍ଗପୁର ଜିଲା ତେନ୍ତୁଳିଖୁଣ୍ଟି ବ୍ଲକ ମଞ୍ଚାଗାଁ ପଞ୍ଚାୟତର ଜଳବନ୍ଦୀ ଅଞ୍ଚଳକୁ ବାରମ୍ବାର ସଚିବ ପାହ୍ୟା ଅଧିକାରୀ, ଜିଲାସ୍ତରୀୟ ଓ ବ୍ଲକସ୍ତରୀୟ ଅଧିକାରୀ, ଜିଲା ପ୍ରଶାସନ, ବ୍ଲକ ପ୍ରଶାସନ ଯନ୍ତ୍ରଚାଳିତ ବୋଟ ଯୋଗେ ଗସ୍ତ କରୁଛନ୍ତି। ଦୀର୍ଘ ବର୍ଷ ଧରି ରାଜ୍ୟ ଏବଂ କେନ୍ଦ୍ର ସରକାରଙ୍କ ପଦାଧିକାରୀ ମଧ୍ୟ ଉକ୍ତ ଅଞ୍ଚଳରେ ଥିବା ୬ଟି ଗ୍ରାମକୁ ଗସ୍ତ କରିଛନ୍ତି। ବିକାଶର ବହୁ ପ୍ରତିଶ୍ରୁତି ମିଳିଛି। ଯନ୍ତ୍ରଚାଳିତ ବୋଟରେ ମାଗଣା ଯିବା ଆସିବା, ଘର ମୁହଁରେ ସାଧାରଣ ବଣ୍ଟନ ସାମଗ୍ରୀ ପ୍ରଦାନ, କେନ୍ଦୁଗୁଡ଼ାରୁ ଗୁରୁମାଇଗୁଡ଼ା ବ୍ରିଜ ନିର୍ମାଣ, ଦଶମନ୍ତପୁରକୁ ରାସ୍ତା ଭଳି ଅନେକ ପ୍ରତିଶ୍ରୁତି ମିଳିଛି। ବାସ୍ତବ କ୍ଷେତ୍ରରେ କିନ୍ତୁ ଚିତ୍ର ବଦଳି ପାରିନାହିଁ। ଜଳବନ୍ଦୀ ଲୋକେ ଏବେବି ଅସୁବିଧାରେ ଦିନ କାଟୁଛନ୍ତି।
୨୦୦୧ ପୁନର୍ବାସ ଥଇଥାନ ପରାମର୍ଶ କମିଟି ନିଷ୍ପତ୍ତି ପ୍ରକାରେ ବିସ୍ଥାପିତ ନ ହୋଇ ଜଳବନ୍ଦୀ ଜୀବନ ବିତାଉଥିବାରୁ ଟାଙ୍ଗଣକୋଟ ଓ ବାଗ୍ରାବାସୀଙ୍କୁ ବିସ୍ଥାପିତ ମାନ୍ୟତା ଦେଇ ବିସ୍ଥାପିତଙ୍କୁ ଦିଆଯାଉଥିବା ପ୍ୟାକେଜ ଦେବା ନିଷ୍ପତ୍ତି ହୋଇଥିଲା। କିନ୍ତୁ ୨୦୨୩ ଶେଷ ହେବାକୁ ବସିଲାଣି ତାହା କାର୍ଯ୍ୟକାରୀ ହୋଇପାରିନି। ଏମ୍ଜିଏନ୍ଆର୍ଇଜିଏସ୍ ଓ ବ୍ଲକ ପାଣ୍ଠି ବ୍ୟବହାର କରି ସଂଯୋଗୀକରଣ ମାଟି ରାସ୍ତା ନିର୍ମିତ ହୋଇଛି। କିଛି ମାତ୍ରାରେ ପାନୀୟ ଜଳ ସମସ୍ୟାର ସମାଧାନ ହୋଇଛି। କିନ୍ତୁ ରାସ୍ତା ନ ଥିବାରୁ କୌଣସି ସେବା ଠିକ୍ଭାବେ ମିଳିପାରୁନି। ଯୋଗାଯୋଗ ବ୍ୟବସ୍ଥା ଏବେବି ସାତ ସପନ। ମୋବାଇଲରେ କଥା ହେବାକୁ ହେଲେ ଉଚ୍ଚ ସ୍ଥାନକୁ ଯାଇ କଥା ହେବାକୁ ପଡୁଛି। ନିର୍ବାଚନ ପାଖେଇ ଆସିଲେ ଏହି ଜଳବନ୍ଦୀ ଅଞ୍ଚଳବାସୀଙ୍କୁ ବିକାଶର ଗଣ୍ଠିଲି ଦିଆଯାଉଛି। ପରବର୍ତ୍ତୀ ସମୟରେ ତାହା ଶୂନ୍ୟ ହୋଇଯାଉଛି। ଏହି ଅଞ୍ଚଳକୁ ବିଭିନ୍ନ ବିଭାଗୀୟ ଅଧିକାରୀ ଆସି ଜଳ କ୍ରୀଡ଼ା ସହ ଭୋଜି ଭାତର ଆସର ଜମାଉଛନ୍ତି, ନଦୀର ଅପରପାର୍ଶ୍ୱକୁ ଯାଇ ଲୋକଙ୍କ କଥା ବୁଝୁଥିବା କହି ବାହାବା ନେଉଛନ୍ତି ବୋଲି
କଂଗ୍ରେସ ନେତା ଦିଲ୍ଲୀପ ପ୍ରଧାନୀ ଓ ଭାଜପା ଯୁବ ନେତା ସନ୍ତୋଷ ପାତ୍ର ଅଭିଯୋଗ କରିଛନ୍ତି। କିନ୍ତୁ ଏଠାକାର ନିରୀହ ଆଦିବାସୀଙ୍କ ସ୍ବାସ୍ଥ୍ୟ, ଶିକ୍ଷା ଗମନାଗମନ, ପାନୀୟ ଜଳ ଭଳି ମୌଳିକ ଆବଶ୍ୟକତା ସୁଧୁରି ପାରିନାହିଁ। ବର୍ତ୍ତମାନ ଋତୁ ପରିବର୍ତ୍ତନ ସମୟରେ ଜ୍ୱର, ଥଣ୍ଡା, କାଶ, ନିମୋନିଆ ଭଳି ମାରାତ୍ମକ ରୋଗ ବ୍ୟାପୁଛି। ଉକ୍ତ ଅଞ୍ଚଳ ପାଇଁ ସ୍ବତନ୍ତ୍ର ସ୍ବାସ୍ଥ୍ୟକର୍ମୀ ନିଯୁକ୍ତ ଥିଲେ। କିନ୍ତୁ କିଛି ବର୍ଷ ହେଲା କେବଳ ସ୍ବାସ୍ଥ୍ୟ ବିଭଗୀୟ ଟିମ୍ ମାସିକ ପ୍ରୋଗ୍ରାମ କରି ଚିକିତ୍ସା ଦେଉଛନ୍ତି। ରୋଗରୁ ବଞ୍ଚତ୍ବାକୁ ଅଞ୍ଚଳବାସୀ ଏବେ ମଧ୍ୟ ଗୁଣି ଗାରେଡ଼ିର ସାହାରା ନେଉଛନ୍ତି। ଜିଲା ଏବଂ ବ୍ଲକ ପ୍ରଶାସନର ଅଧିକାରୀଙ୍କ ବାରମ୍ବାର ଗସ୍ତ ପରେ ବି ଜଳବନ୍ଦୀ ଅଞ୍ଚଳର ସ୍ଥିତି ସୁଧୁରୁ ନାହିଁ। ବିଡିଓ ମନୋଜ କୁମାର ପାଣିଗ୍ରାହୀଙ୍କୁ ପଚାରିବାରୁ ୬ଟିଜଳବନ୍ଦୀ ଅଞ୍ଚଳବାସୀଙ୍କ ପାଇଁ ବ୍ଲକ ପ୍ରଶାସନ କ୍ଷମତା ମୁତାବକ କାମ କରାଯାଉଛି ବୋଲି ସେ କହିଛନ୍ତି।