ବିଷମକଟକ/ରାୟଗଡ଼ା ଅଫିସ, ୩ା୨(ଡି.ଏନ୍.ଏ.) ତ୍ରିସ୍ତରୀୟ ପଞ୍ଚାୟତ ନିର୍ବାଚନରେ ରାୟଗଡ଼ା ଜିଲାରେ ଜିଲା ପରିଷଦ ଅଧ୍ୟକ୍ଷ ଆସନ ହାତେଇବାକୁ ଏବେ ସବୁ ଦଳରେ ଚାଲିଛି ଅଙ୍କକଷା। ରାୟଗଡ଼ା ଜିଲା ୨୨ ଜିଲା ପରିଷଦ ଆସନକୁ ନେଇ ଗଠିତ। ପୂର୍ବରୁ ଏଠାରେ ବିଜେଡି, ଭାଜପା ଏବଂ କଂଗ୍ରେସ ନିର୍ବାଚନ ମଇଦାନକୁ ଓହ୍ଲାଉଥିବାବେଳେ ଏଥର ପ୍ରଥମ ଥର ପାଇଁ ବିଏସ୍ପି ଏବଂ ଆମ୍ ଆଦ୍ମୀ ପାର୍ଟି ମଧ୍ୟ ପ୍ରାର୍ଥୀ ଦେଇଛନ୍ତି। ତେବେ ବିଜେଡିର ସ୍ଥିତି ପୂର୍ବଭଳି ସୁଦୃଢ଼ ରହିଛି। ଏହା ପ୍ରମୁଖ ପ୍ରତିଦ୍ୱନ୍ଦ୍ୱୀ କଂଗ୍ରେସକୁ ଚିନ୍ତାରେ ପକାଇଛି। ସୂଚନାଯୋଗ୍ୟ, ୨୦୧୭ ନିର୍ବାଚନରେ ପ୍ରମୁଖ ପ୍ରତିଦ୍ୱନ୍ଦ୍ୱୀ ବିଜେଡି ଓ କଂଗ୍ରେସ ମଧ୍ୟରେ ମୁକାବିଲା ହୋଇଥିଲା। ଏଥିରେ କଂଗ୍ରେସ ପ୍ରଥମ ସ୍ଥାନ ଦଖଲ ଲାଗି କେତୋଟି ସ୍ଥାନରେ ବିଜେଡି ସହ କଡ଼ା ମୁକାବିଲା କରିବାକୁ ପଡ଼ିଥିଲା। କିନ୍ତୁ କଂଗ୍ରେସ ୧୪ ଜିଲା ପରିଷଦ ଆସନ ହାସଲ କରି ଜିଲା ପରିଷଦ ଗଠନ କରିଥିଲା। ସେତେବେଳେ ରାୟଗଡ଼ା ଜିଲାର ସମସ୍ତ ବ୍ଲକରେ ପଦପଦବୀ ପାଇଁ ବିଜେଡି ମଧ୍ୟରେ ଗୋଷ୍ଠୀ କନ୍ଦଳ ଦେଖାଦେଇଥିଲା। ଏହାର ଲାଭ ଉଠାଇଥିଲା କଂଗ୍ରେସ। ୧୧ ଆସନରୁ କଂଗ୍ରେସ ଜିତିବାରେ ସଫଳ ହୋଇଥିଲା। ସେଥିମଧ୍ୟରୁ ଭାଜପା ୪, କଂଗ୍ରେସ ୧୧ ଓ ବିଜେଡି ୭ ଆସନ ହାତେଇଥିଲା। ଫଳରେ ବିଜେଡିକୁ ବହୁ କ୍ଷତି ସହିବାକୁ ପଡ଼ିଥିଲା। କିନ୍ତୁ ଚଳିତ ନିର୍ବାଚନରେ ବିଜେଡି ସମ୍ମାନ ରକ୍ଷା ପାଇଁ ପ୍ରୟାସ ଚଳାଇଛି। ୨୦୦୭ରେ ବିଜେଡି ୨୨ ଆସନରୁ ଅଧିକ ଆସନରେ ଜିଣି ଜିଲା ପରିଷଦ ଗଠନ କରିଥିଲା। ସେହିପରି ୨୦୧୨ରେ ପୁଣି କଂଗ୍ରେସ ୯ ଏବଂ ବିଜେଡି ୧୨ ଆସନ ପାଇଥିଲା। କିନ୍ତୁ ବିଜେଡି ଜିଲା ପରିଷଦ ଅଧ୍ୟକ୍ଷ ଆସନ ହାତେଇଥିଲା। କଂଗ୍ରେସ ବିଜୟୀ ହୋଇଥିଲା। ୨୦୧୭ ରେ କଂଗ୍ରେସ ଦଳର ସ୍ଥିତି ଜିଲାରେ ଏକ ନମ୍ବରକୁ ଚାଲିଯାଇଥିଲା। କିନ୍ତୁ ଚଳିତ ନିର୍ବାଚନରେ କଂଗ୍ରେସ ଦଳର ସ୍ଥିତି କ’ଣ ରହିବ ତାହା ଆଗାମୀ ସମୟ କହିବ। ୨୦୧୯ ରେ ହୋଇଥିବା ବିଧାନସଭା ନିର୍ବାଚନରେ ମଧ୍ୟ କଂଗ୍ରେସ ବିଷମକଟକ, ରାୟଗଡ଼ା ଓ ଗୁଣପୁର ବିଧାନସଭା ଆସନରେ ବିଜେଡିକୁ କଡ଼ା ଟକ୍କର ଦେଇଥିଲା। କିନ୍ତୁ ଅଳ୍ପ ଭୋଟ ବ୍ୟବଧାନରେ କଂଗ୍ରେସକୁ ପରାସ୍ତ ହେବାକୁ ପଡ଼ିଥିଲା। ବିଷମକଟକରୁ ବିଜେଡି, ଗୁଣପୁରରୁ ବିଜେଡି ଏବଂ ରାୟଗଡ଼ାରୁ ସ୍ବାଧୀନ ପ୍ରାର୍ଥୀ ବିଜୟୀ ହେଇଥିଲେ। ବିଷମକଟକ ବିଧାନସଭା ଆସନରେ ଥିବା ୪ ବ୍ଲକର ୮ଜୋନ୍କୁ ନେଇ ବିଷମକଟକ ନିର୍ବାଚନ ମଣ୍ଡଳୀ ଗଠିତ। ୨୦୧୭ ନିର୍ବାଚନରେ କଂଗ୍ରେସ ବିଷମକଟକ ନିର୍ବାଚନ ମଣ୍ଡଳୀରେ ଭଲ ପ୍ରଦର୍ଶନ କରିଥିଲା। ଏମିତିକି ବିଷମକଟକରୁ ୨, ମୁନିଗୁଡ଼ାରୁ ୧, କୋଲନରାରୁ ୧, କଲ୍ୟାଣସିଂହପୁରରୁ ୧ ଆସନ ହାତେଇଥିଲା। କାଶୀପୁରରେ ୨, ଗୁଡାରିରେ ୧, ଗୁଣପୁରରୁ ୧, ଚନ୍ଦ୍ରପୁରରୁ ୧, ପଦ୍ମପୁରରୁ ୧ ଆସନ ହାତେଇ ପୁରୁଷୋତ୍ତମ ଗମାଙ୍ଗ ଜିଲା ପରିଷଦ ଅଧ୍ୟକ୍ଷ ପଦ ହାସଲ କରିଥିଲେ। କିନ୍ତୁ ୨୦୨୦ରେ ଦୁର୍ଘଟଣାରେ ତାଙ୍କର ମୃତ୍ୟୁ ଘଟିଥିଲା। ଏହାପରେ ହୋଇଥିବା ଉପନିର୍ବାଚନ ହୋଇଥିଲା। ବିଜେଡି ପୂର୍ବରୁ ୭ ଆସନରେ ଜିତିଥିବାବେଳେ କୌଶଳ କ୍ରମେ ପରେ ଭାଜପାର ୪ ଓ କଂଗ୍ରେସର ୩ ଆସନ ହାତେଇ ଜିଲା ପରିଷଦ ଗଠନ କରିବାରେ ସଫଳ ହୋଇଥିଲା। ଦଳ ପକ୍ଷରୁ ଗଙ୍ଗାଧର ପୁଆଲା ଜିଲା ପରିଷଦ ଅଧ୍ୟକ୍ଷ ପଦ ପାଇଥିଲେ। ଚଳିତ ନିର୍ବାଚନରେ କେଉଁ ଦଳର ରଣକୌଶଳ ସଫଳ ହେଉଛି ତାହା ଉପରେ ସମସ୍ତଙ୍କ ନଜର ରହିଛି।