ପାରାଦୀପ, ୧୭ା୬(ସ୍ବ.ପ୍ର.): ପାରାଦୀପ ଅଠରବାଙ୍କିର ସବୁଠାରୁ ଚଳଚଞ୍ଚଳ ଜାଗା ହେଲା ବାଲିପ୍ଲଟ୍। ପ୍ରତିଦିନ ବାଲିପ୍ଲଟ୍କୁ ୫ ହଜାରରୁ ଅଧିକ ଲୋକ ଯାତାୟାତ କରିଥାନ୍ତି। ତା’ ମଧ୍ୟରେ ରହିଛି ୧୦୬ଟି ମାଛଗଦି, ୧୪୮ଟି ଦୋକାନ ଘର, ପାରାଦୀପ ଡମ୍ପର ମାଲିକ ସଂଘ କାର୍ଯ୍ୟାଳୟ, ଉତ୍କଳ ମେରାଇନ୍ ଓ ଏକାଧିକ ସଂଗଠନ। ସେଥିମଧ୍ୟରୁ ଅଧିକାଂଶ ଲୋକ ଯାଇଥା’ନ୍ତି ମାଛଗଦିକୁ। ଏହି ବାଲିପ୍ଲଟ୍କୁ ସଂଯୋଗ ରାସ୍ତା ରହିଛି ପାରାଦୀପ ବନ୍ଦର ୨ନଂ. ଗେଟ୍ ସମ୍ମୁଖରେ। ସେହି ସଂଯୋଗ ସ୍ଥଳକୁ ଚାରିଛକ କୁହାଯାଏ। ସେହି ଛକରୁ ନେହେରୁ ବଙ୍ଗଳା ରାସ୍ତା, ବନ୍ଦର ଭିତରକୁ ଭାରିଯାନ ଚଳାଚଳ, ବାଲିପ୍ଲଟ୍କୁ ଲୋକ ଓ ଗାଡ଼ି ଏବଂ କଳିଙ୍ଗ ମେରାଇନ୍ ଅଞ୍ଚଳକୁ ରାସ୍ତା ଯାଇଛି। ଅଠରବାଙ୍କି ଓଭରବ୍ରିଜ୍ରୁ ଗଡାଣି ଜାଗାରେ ଏହି ଚାରିଛକ ଥିବାରୁ ସେହି ସ୍ଥାନ ଅତ୍ୟନ୍ତ ବିପଦଯୁକ୍ତ ରହିଥାଏ। ବାଲିପ୍ଲଟ୍ର ସଂଯୋଗ ରାସ୍ତା ଇଂଲିଶ୍ ଅକ୍ଷର ଭି ସଦୃଶ। ଅର୍ଥାତ୍ ସେହି ଗଡ଼ାଣିରେ ଗାଡ଼ି ପ୍ରବେଶ ଓ ପ୍ରସ୍ଥାନ ବେଳେ ଅଧିକାଂଶ ସମୟରେ ଦୁର୍ଘଟଣା ଘଟିଥାଏ। ଉକ୍ତ ଗଡାଣି ରାସ୍ତା ଗତ କିଛି ବର୍ଷ ହେଲା ବିପର୍ଯ୍ୟସ୍ତ ହୋଇପଡିଛି। କଂକ୍ରିଟ ରାସ୍ତାକୁ ସଂଯୋଗ ସ୍ଥଳରେ ଖାଲ, କୋଇଲା ଗୁଣ୍ଡ, ପଥର, ମାଛ ବେପାରରୁ ବାହାରୁଥିବା ପାଣି ଆଦି ମିଶି ସନ୍ତସନ୍ତିଆ ରହୁଛି। ଏହା ପ୍ରଭାବରେ ଦୁଇଚକିଆ ଯାନର ଚକା ଖସଡ଼ା ଯୋଗୁ ସ୍ଲିପ୍ କରିଥାଏ। ବଡ଼ ଗାଡ଼ି ବେଳେବେଳେ ଓଲଟି ପଡିଥାଏ। ଏହାକୁ ବ୍ୟବସ୍ଥିତ କରିବାକୁ ଏ ପର୍ଯ୍ୟନ୍ତ ସେପରି କୌଣସି ସ୍ଥାୟୀ ପଦକ୍ଷେପ ନିଆଯାଇ ନାହିଁ। ଉକ୍ତ ବାଲିପ୍ଲଟ୍ରୁ ହୋଲ୍ଡିଂ ଟ୍ୟାକ୍ସ ଦୁଇଟି ସଂସ୍ଥା ଆଦାୟ କରୁଛନ୍ତି। ପାରାଦୀପ ବନ୍ଦର ଓ ପୌର ପରିଷଦ। କିନ୍ତୁ ଚାରିଛକକୁ ସଂଯୋଗ ରାସ୍ତା ଠିକ୍ ଭାବେ ହୋଇନାହିଁ ବୋଲି କୁହନ୍ତି ମାଛଗଦି ମାଲିକ ପରେଶ ମଣ୍ଡଳ।
ବାଲିପ୍ଲଟ୍ର ନାମ ପଛରେ ଏକ କୌତୂହଳପୂର୍ଣ୍ଣ ଘଟଣା ରହିଛି। ଯଥା: ୧୯୯୮ ପର୍ଯ୍ୟନ୍ତ ନେହେରୁ ବଙ୍ଗଳା ରାସ୍ତାର ମଧ୍ୟଭାଗରେ ଦୁଇଟି ବଡ଼ ବସ୍ତି ଓ ବ୍ୟବସାୟିକ ଜାଗା ଥିଲା। ତାହା ହେଲା ଘନଗଳିଆ ଓ ଇନ୍ଦିରାପାର୍କ। ୧୯୯୮ରେ ବନ୍ଦର ସମ୍ପ୍ରସାରଣ ବେଳେ ସେହି ଘନଗଳିଆ ଓ ଇନ୍ଦିରାପାର୍କକୁ ଉଚ୍ଛେଦ କରାଯାଇଥିଲା। ବସ୍ତି ଲୋକଙ୍କୁ ଭିତରଗଡଠାରେ ଥଇଥାନ କରାଯାଇଥିଲା। ବ୍ୟବସାୟୀଙ୍କୁ ଅଠରବାଙ୍କି ବାଲିପ୍ଲଟ୍ରେ ଥଇଥାନ କରାଯାଇଥିଲା। ଅଠରବାଙ୍କି କାଉଡିଆ ନଦୀପଠାରେ ବାଲି ପକାଇ ପ୍ଲଟ୍ କରାଯାଇ ଥଇଥାନ କରାଯାଇଥିବାରୁ ତା’ର ନାମ ବାଲିପ୍ଲଟ୍ ରହିଗଲା ବୋଲି ମାଛ ବ୍ୟବସାୟୀ ତଥା ପୂର୍ବତନ କାଉନ୍ସିଲର ଅଜୟ ନାୟକ କୁହନ୍ତି। ନଦୀ ପାଖରେ ମାଛଗଦିଗୁଡିକ ରହିଛି। ଏହାକୁ ସେତେବେଳେ ପାରାଦୀପ ବନ୍ଦର ଥଇଥାନ କରିଥିଲା। ପରବର୍ତ୍ତୀ ସମୟରେ ସେଠାରେ ଲୋକଙ୍କ ଆବଶ୍ୟକତା ଅନୁସାରେ ଶୌଚାଳୟ, ଗୋଷ୍ଠୀ କେନ୍ଦ୍ର, ବିଶ୍ରାମାଗାର, ବିଦ୍ୟୁତ୍, ପାଣି ସଂଯୋଗ ଆଦି ପୌର ପରିଷଦ ପକ୍ଷରୁ କରାଯାଇଥିଲା। ଉକ୍ତ ସ୍ଥାନ ୨ ନଂ. ୱାର୍ଡରେ ଯାଉଛି। ବାଲିପ୍ଲଟ୍ରୁ ଉପକୂଳ ଓଡ଼ିଶାର ଅର୍ଦ୍ଧାଧିକ ଜିଲାକୁ ମାଛ ଆମଦାନୀ ରପ୍ତାନି ହେଉଛି। ଏଥିସହ ସାମୁଦ୍ରିକ ଡଙ୍ଗାରୁ ଉତ୍ପାଦିତ ମାଛ ଏହି ଗଦିରେ ବିକ୍ରି ହୁଏ। ସେହି ମାଛକୁ ବ୍ୟବସାୟୀମାନେ କଲିକତା, ବିଶାଖାପାଟଣା, କେରଳ ଆଦି ରାଜ୍ୟକୁ ନେଇଥାନ୍ତି। ପ୍ରତ୍ୟେକ ରବିବାର, ବୁଧବାର, ଶୁକ୍ରବାର ଅଧିକ ଗହଳି ହୋଇଥାଏ। ସମସ୍ତ ଲୋକଙ୍କ ପାଇଁ ସମସ୍ୟା ହୁଏ ସେହି ଚାରିଛକ ସଂଯୋଗ ରାସ୍ତା ବୋଲି କୁହନ୍ତି ଦେବୀପ୍ରସାଦ ସାହୁ। ପୌର ପରିଷଦ ପକ୍ଷରୁ ଗତବର୍ଷ ସେହି ଗଡ଼ାଣି ରାସ୍ତାକୁ କଂକ୍ର୍ରିଟ ଓ ଓସାରିଆ କରିବାକୁ କାମ ଆରମ୍ଭ ହୋଇଥିଲା। ଠିକାସଂସ୍ଥା ଅଧା କାମ କରି ରଖିଥିବାରୁ ସେହି ସମସ୍ୟା ଦ୍ୱିଗୁଣିତ ହୋଇଛି। ଏ ସମ୍ପର୍କରେ ପୌରାଧ୍ୟକ୍ଷ ବସନ୍ତ ବିଶ୍ୱାଳଙ୍କୁ ପଚାରିବାରେ ସମ୍ପୃକ୍ତ ରାସ୍ତାକୁ ମରାମତି ଓ ସମ୍ପ୍ରସାରଣ କରିବାକୁ ଟେଣ୍ଡର କରାଯାଇଥିଲା। ସେଥିରେ କିଛି ବାଧକ ହେବାରୁ କାମ ବନ୍ଦ ଅଛି। ବର୍ଷାଦିନ ପୂର୍ବରୁ ରାସ୍ତାକୁ କଂକ୍ରିଟ କରିବା ଯୋଜନା ଅଛି।