ଭୋପାଳ, ୨୦।୭- ମଧ୍ୟପ୍ରଦେଶର ରାଜଧାନୀ ଭୋପାଳରୁ ଅନସନର ଏକ ଭିନ୍ନ ଚିତ୍ର ସାମ୍ନାକୁ ଆସିଛି। ଭୋପାଳରେ ଥିବା ରାଜ୍ୟ ପୋଲିସ ମୁଖ୍ୟ କାର୍ଯ୍ୟାଳୟ ବାହାରେ ସୋମବାର ଜଣେ କନ୍ଷ୍ଟେବଳ ଭିନ୍ନ ତରିକାରେ ଅନଶନରେ ବସିଥିଲେ। ଝାବୁଆ ଜିଲାରେ କାର୍ଯ୍ୟରତ ଥିବା ମଧୁସୂଦନ ରାଠୋର ନାମକ ଜଣେ କନ୍ଷ୍ଟେବଳ ପୋଲିସଙ୍କୁ ସାପ୍ତାହିକ ଛୁଟି ଏବଂ ପୋଲିସ ବ୍ୟବସ୍ଥାରେ ସୁଧାର ଦାବିରେ ଆଧ୍ୟାତ୍ମିକ ଅନଶନ କରିଛନ୍ତି। ମଧୁସୂଦନ ହାତରେ ରୁଦ୍ରାକ୍ଷ ମାଳି ଧରିବା ସହିତ ଧ୍ୟାନ ମୁଦ୍ରାରେ ପୋଲିସ ମୁଖ୍ୟାଳୟ ବାହାରେ ବସିଛନ୍ତି। ବସିବା ପୂର୍ବରୁ ସେ ଏକ ଭିଡିଓ ସୋସିଆଲ ମିଡିଆରେ ଅପ୍ଲୋଡ କରିଛନ୍ତି। ଯେଉଁଥିରେ ମଧୁସୂଦନ କହିଛନ୍ତି, ‘ଆମକୁ ପ୍ରତି ୩ ବର୍ଷରେ ଥରେ ବଦଳି କରାଯାଉଛି। ଯେଉଁଥି ପାଇଁ ଆମକୁ ଏବଂ ଆମ ପରିବାରକୁ ନାନା ସମସ୍ୟାର ସମ୍ମୁଖୀନ ହେବାକୁ ପଡ଼ୁଛି। ଆମ ପିଲାମାନଙ୍କର ପାଠପଢ଼ା ସମେତ ଅନ୍ୟାନ କାର୍ଯ୍ୟ ବାଧାପ୍ରାପ୍ତ ହୋଇଥାଏ। ପୋଲିସ ବ୍ୟବସ୍ଥାରେ ସୁଧାର ଆବଶ୍ୟକ। କନ୍ଷ୍ଟେବଳଙ୍କୁ ନିଜ ଜିଲା ଭିତରେ କେବଳ ବଦଳି କରାଯାଉ। ଏଥିସହିତ କର୍ମକ୍ଷେତ୍ରରେ କର୍ମଚାରୀମାନେ ବହୁତ ଚାପରେ କାମ କରିଥାନ୍ତି। ତେଣୁ ସେମାନେ ବିଶ୍ରାମ ନେବା ଆବଶ୍ୟକ। ଯାହା ଫଳରେ ଡ୍ୟୁଟି ଚାପ ଦୂର ହୋଇପାରିବ। ଏଥିଲାଗି ସପ୍ତାହକୁ ଗୋଟିଏ ଦିନ ଛୁଟି ଲାଗୁ କରାଯାଉ।’ ଏହି ଘଟଣାରେ ବରିଷ୍ଠ ପୋଲିସ ଅଧିକାରୀ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରି ମଧୁସୂଦନଙ୍କୁ ଚାକିରିରୁ ନିଲମ୍ବିତ କରିଛନ୍ତି। ତେବେ ଶେଷ ନିଶ୍ୱାସ ଥିବା ପର୍ଯ୍ୟନ୍ତ ଏଠାରେ ଅନଶନରେ ବସିବେ ବୋଲି ମଧୁସୂଦନ କହିଛନ୍ତି।