ବ୍ରହ୍ମପୁର ଅଫିସ,୧୦।୪: ବ୍ରହ୍ମପୁର ବଡ଼ବଜାର ଥାନା ପୋଲିସ ଶନିବାର ନକଲି ବିଦେଶୀ ମଦ ଚାଲାଣ ହେଉଥିବା ଖବର ପାଇ ସ୍ଥାନୀୟ ଭୈରବୀ ମାର୍କେଟ ଛକରେ ବ୍ଲକିଂ କରିଥିଲା। ଗୋଟିଏ ଅଟୋ (ନଂ ଓଡି ୦୭ ଏଏ ୦୫୨୮)କୁ ପୋଲିସ ଅଟକାଇ ଯାଞ୍ଚ କରିବାରୁ ସେଥିରେ ନକଲି ବିଦେଶୀ ମଦ ଥିବା ଜଣାପଡ଼ିଥିଲା। ଅଟୋ ଚାଳକ ବାଉରୀସୁକୁଣ୍ଡା ଗ୍ରାମର ରନୋଜ ଦାସ (୨୨)ଙ୍କୁ ଗିରଫ ପରେ ତାଙ୍କ ବୟାନକୁ ଆଧାର କରି ପୋଲିସ ଘଟଣାର କିଙ୍ଗ୍ପିନ କୁହାଯାଉଥିବା ବ୍ରହ୍ମପୁର ପୋଲିସ ଜିଲାରେ କାର୍ଯ୍ୟରତ କନ୍ଷ୍ଟେବଳ ଚୀନମିନି ବାରିକ (୩୫)ଙ୍କୁ ଗିରଫ କରିଥିଲା। ପରେ କନ୍ଷ୍ଟେବଳ ବାରିକ ଦିଗପହଣ୍ଡି ଲଙ୍ଗଳଦେଇଠାରେ କରିଥିବା ଏକ କୁକୁଡ଼ା ଫାର୍ମରେ ଚଢାଉ କରିଥିଲା। ବାରିକ ସେଠାରେ ମଦ ପ୍ରସ୍ତୁତ କରି ଜିଲାର ବିଭିନ୍ନ ସ୍ଥାନକୁ ବିକ୍ରି ପାଇଁ ପଠାଉଥିଲେ ବୋଲି ଜେରା ବେଳେ ପୋଲିସ ଜାଣିବାକୁ ପାଇଛି। ଉକ୍ତ ନକଲି ମଦ ଫ୍ୟାକ୍ଟ୍ରିରେ କାମ କରୁଥିବା ବଡ଼ବଜାର ଥାନା ଅନ୍ତର୍ଗତ ଗେଲାଦୁଲା ସାହିର ବାବୁ ସାହୁ (୩୬)ଙ୍କୁ ଗିରଫ କରି ମାମଲା ନଂ.୭୭/୨୨ରେ କନ୍ଷ୍ଟେବଳ ବାରିକଙ୍କ ସମେତ ୩ ଜଣଙ୍କୁ ଶନିବାର କୋର୍ଟ ଚାଲାଣ କରାଯାଇଛି। କନ୍ଷ୍ଟେବଳଙ୍କ ଆଇଡି କାର୍ଡ ପୋଲିସ ଜବତ କରିଛି।
ପ୍ରକାଶ ଯେ, ଶନିବାର ବଡ଼ବଜାର ଥାନା ପୋଲିସ ଦିଗପହଣ୍ଡି ଥାନା ଅନ୍ତର୍ଗତ ଲଙ୍ଗଳଦେଇ କୁକୁଡ଼ାଫାର୍ମରେ ଚାଲିଥିବା ନକଲି ବିଦେଶୀ ମଦ ପ୍ରସ୍ତୁତ କାରଖାନା ସମ୍ପର୍କରେ ଖବର ପାଇ ସେଠାରେ ଚଢାଉ କରିଥିଲା। ସେଠାରୁ ୨ ଲିଟର ସ୍ପିରିଟ, ୪୦୪ ବୋତଲ ନକଲି ବିଦେଶୀ ମଦ, ଗୋଟିଏ ବୋତଲ ରଙ୍ଗ, ୩୦୦ମିଲିଲିଟର ରାସାୟନିକ ଏସେନ୍ସ, ଖାଲି ବୋତଲ, ଠିପି, ବିଭିନ୍ନ ବ୍ରାଣ୍ଡର ଲେବଲ୍, ଅବକାରୀ ବିଭାଗର ନକଲି ଲେବୁଲ ୬ ସିଟ୍ ଓ ମେଶିନ ଆଦି ଜବତ କରିଥିଲା ବୋଲି ଏକ ପ୍ରେସ୍ନୋଟରେ ବ୍ରହ୍ମପୁର ଏସଡିପିଓ ବିଷ୍ଣୁପ୍ରସାଦ ପତି ସୂଚନା ଦେଇଛନ୍ତି। ଜବତ ନକଲି ମଦ ଓ ସ୍ପିରିଟର ନମୁନା ସଂଗ୍ରହ କରାଯାଇଛି। ସେଗୁଡିକ କେମିକାଲ ପରୀକ୍ଷା ପାଇଁ ପଠାଯିବ ବୋଲି ଥାନାଧିକାରୀ ପ୍ରଶାନ୍ତ ଭୂପତି ସୂଚନା ଦେଇଛନ୍ତି।