ବଇଣ୍ଡା,୨୯।୮(ଡି.ଏନ.ଏ.): ଅନୁଗୋଳ ଜିଲା କିଶୋରନଗର ବ୍ଲକ ବଇଣ୍ଡା ରାମଦେଓ ଉଚ୍ଚ ବିଦ୍ୟାଳୟ ପରିସରରେ ଥିବା ଛାତ୍ରାବାସ ଜମିରେ ନିର୍ମାଣ ହେଉଥିବା କିଶୋରଗଞ୍ଜ ସରକାରୀ ପ୍ରାଥମିକ ବିଦ୍ୟାଳୟର ଶ୍ରେଣୀଗୃହ କାର୍ଯ୍ୟ ନିମ୍ନମାନର ହେଉଥିବା ଅଭିଯୋଗ ହୋଇଛି। ଏ ନେଇ ଶନିବାର ବଇଣ୍ଡା ଗ୍ରାମବାସୀ ଅନୁଗୋଳ ଜିଲାପାଳଙ୍କଠାରେ ଅଭିଯୋଗ କରିଛନ୍ତି। ଅଭିଯୋଗ ପରେ ସାରେ ବିଭାଗୀୟ କନିଷ୍ଠଯନ୍ତ୍ରୀ ଘଟଣା ସ୍ଥଳକୁ ଆସି କାମ ବନ୍ଦ କରିଥିବା ଜଣାପଡିଛି।
୫୫ ନମ୍ବର ଜାତୀୟ ରାଜପଥ ସମ୍ପ୍ରସାରଣ ଯୋଗୁ ଏହି ବିଦ୍ୟାଳୟ ଭଙ୍ଗାଯାଇଥିଲା। ନୂତନ ଶ୍ରେଣୀ ଗୃହ ନିର୍ମାଣ ପାଇଁ ବଇଣ୍ଡା ରାମଦେଓ ଉଚ୍ଚ ବିଦ୍ୟାଳୟଠାରେ ଥିବା ଜାଗାରେ ନୂତନ ଶ୍ରେଣୀଗୃହ ନିର୍ମାଣ କରାଯାଉଛି। ହେଲେ ଉକ୍ତ କାମ ନିମ୍ନମାନର ହେଉଥିବାରୁ ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। ଏହି ଶ୍ରେଣୀ ଗୃହ ପାଇଁ ୧ କୋଟି ୬୫ ଲକ୍ଷ ୬୪ ହଜାର ୧୩୨ ଟଙ୍କା ବ୍ୟୟବରାଦ ହୋଇଥିବାବେଳେ ଅକ୍ଟୋବର ୨୦୨୧ରେ ଉକ୍ତ କାମ ଆରମ୍ଭ ହୋଇଥିଲା। ଆରମ୍ଭରୁ କାମ ନିମ୍ନମାନର ହେଉଥିବା ଯୋଗୁ ଗ୍ରାମବାସୀଙ୍କ ବିରୋଧ ପରେ ନଭେମ୍ବର ୨୦୨୧ରେ କାମ ବନ୍ଦ ହୋଇଥିଲା। ପରେ ଜୁନ ୨୦୨୨ରୁ ପୁନର୍ବାର କାର୍ଯ୍ୟ ଆରମ୍ଭ ହୋଇଛି। ତଥାପି ନିମ୍ନମାନର କାମ ହେଉଛି। ଠିକ୍ ଭାବେ ରଡ଼ ଲଗାଯାଉ ନ ଥିବାବେଳେ ଠିକ୍ ଅନୁପାତରେ ସିମେଣ୍ଟ ଦିଆଯାଉ ନ ଥିବା ଗ୍ରାମବାସୀ ଅଭିଯୋଗ କରିଛନ୍ତି। ବିଭାଗୀୟ ଅଧିକାରୀମାନେ ଶ୍ରେଣୀ ଗୃହ କାର୍ଯ୍ୟ ତଦାରଖ କରୁ ନ ଥିବାରୁ ଅତି ନିମ୍ନମାନର କାର୍ଯ୍ୟ ହେଉଥିବା ନେଇ ଗ୍ରାମବାସୀ ୩୦।୭।୨୦୨୨ ରେ ଅନୁଗୋଳ ଜିଲାପାଳଙ୍କଠାରେ ଅଭିଯୋଗ କରିଥିଲେ। ଶୁକ୍ରବାର ଗ୍ରାମବାସୀ କାମ ତଦାରଖ କରିବାକୁ ଯାଇଥିବାବେଳେ କୌଣସି ଅଧିକାରୀ ଉପସ୍ଥିତ ନ ଥିଲେ। ଏହାର ସୁଯୋଗରେ ଠିକାସଂସ୍ଥା କର୍ମଚାରୀ ନିମ୍ନମାନର କାମ କରୁଥିବା ଦେଖିବାକୁ ପାଇଥିଲେ। ଶନିବାର ଜିଲାପାଳଙ୍କଠାରେ ଅଭିଯୋଗ କରାଯିବା ପରେ ବିଭାଗ ପକ୍ଷରୁ ଉକ୍ତ କାମକୁ ବନ୍ଦ କରିଦିଆଯାଇଛି। ବିଦ୍ୟାଳୟ ନିର୍ମାଣ କରୁଥିବା ଠିକାସଂସ୍ଥା ସହ ବିଭାଗୀୟ ଅଧିକାରୀଙ୍କ ମଧୁଚନ୍ଦ୍ରିକା ଯୋଗୁ ଏଭଳି କାମ ହେଉଥିବା ଗ୍ରାମବାସୀ ଅଭିଯୋଗ କରିଛନ୍ତି। କାମ ଠିକ୍ ଭାବେ କରା ନ ଗଲେ ଆଗାମୀ ଦିନରେ ଆନ୍ଦୋଳନ କରାଯିବ ବୋଲି ଗ୍ରାମ ସମ୍ପାଦକ ଜିତେନ୍ଦ୍ର ବେହେରା, ଭଗବାନ ଘିୱାଲା, ରମାକାନ୍ତ ବେହେରା, ମାନସ ସାହୁ, ପରିକ୍ଷିତ ସାହୁ, ଅରବିନ୍ଦ ସାହୁ, ରାଜେନ୍ଦ୍ର ସାହୁ ପ୍ରମୁଖ ଚେତାବନୀ ଦେଇଛନ୍ତି। ଏ ନେଇ ବିଭାଗୀୟ କନିଷ୍ଠ ଯନ୍ତ୍ରୀ ସୁଧାକର ପ୍ରଧାନ କୁହନ୍ତି, ନିମ୍ନମାନର କାମ ହେଉଥିବା ଅଭିଯୋଗ ପାଇବା ପରେ କାର୍ଯ୍ୟ ବନ୍ଦ କରାଯାଉଛି। ତଦନ୍ତ ପରେ ପଦକ୍ଷେପ ନିଆଯିବ।