କେନ୍ଦୁଝର,୨୮ା୫(ସ୍ବ.ପ୍ର.): କେନ୍ଦୁଝର ଟାଉନ ଥାନା ଅନ୍ତର୍ଗତ ଜୁଡିଆ ଘାଟିରେ ଏକ କଣ୍ଟେନର ଭାରସାମ୍ୟ ହରାଇ ରାସ୍ତା ତଳକୁ ଖସିପଡ଼ିବାରୁ ୨ ଜଣ ଗୁରୁତର ହୋଇଛନ୍ତି। ଟ୍ରାନ୍ସ କାରଗୋ ଇଣ୍ଡିଆ ନାମକ ପାର୍ଶଲ ବୋଝେଇ କଣ୍ଟେନର ସୁରତରୁ କୋଲକାତା ଅଭିମୁଖେ ଯାଉଥିବାବେଳେ ଶନିବାର ଜାତୀୟ ରାଜପଥ ୪୯ର ଜୁଡ଼ିଆ ଘାଟିରେ ଭାରସାମ୍ୟ ହରାଇ ୨୦ ଫୁଟ ତଳକୁ ଖସିପଡ଼ିଥିଲା। ଖବର ପାଇ ପୋଲିସ ଏବଂ ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି କ୍ୟାବିନ ଭିତରୁ ଗୁରୁତର ଡ୍ରାଇଭର ଓ ହେଲପରଙ୍କୁ ଉଦ୍ଧାର କରି ଆମ୍ବୁଲାନ୍ସ ସହାୟତାରେ କେନ୍ଦୁଝର ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଛନ୍ତି।
ଜୁଡିଆ ଘାଟିରେ ୧୫ ଦିନ ମଧ୍ୟରେ ଛୋଟବଡ଼ ବହୁ ଦୁର୍ଘଟଣା ଘଟୁଥିବା ବେଳେ ୨ ଟ୍ରକ ଏବଂ ଗୋଟିଏ କଣ୍ଟେନର ଦୁର୍ଘଟଣାଗ୍ରସ୍ତ ହୋଇ ଘାଟି ତଳକୁ ଖସି ପଡ଼ିଥିବାରୁ ଏହି ଜୁଡିଆ ଘାଟି ରାସ୍ତାରେ ଯାତାୟାତ ଅସୁରକ୍ଷିତ ହୋଇପଡ଼ିଛି। ତ୍ରୁଟିପୂର୍ଣ୍ଣ ଘାଟି ରାସ୍ତା ନିର୍ମାଣ ଯୋଗୁ ଏଭଳି ଅଘଟଣ ଘଟୁଥିବାରୁ ଅସନ୍ତୋଷ ପ୍ରକାଶ ପାଉଛି ା ରାସ୍ତାର ବୁଲାଣି ସ୍ଥାନରେ କୌଣସି ସତର୍କ ସୂଚନାଫଳକ ନ ଥିବା ଏବଂ ବେଗ ନିର୍ଦ୍ଧାରଣ ଫଳକ ନ ଥିବାରୁ ବାହାର ରାଜ୍ୟରୁ ଆସୁଥିବା ଲାଇନ ଟ୍ରକ୍ଗୁଡ଼ିକ ଘାଟି ବିଷୟରେ ଜାଣି ପାରୁନାହାନ୍ତି। ଫଳରେ ଦ୍ରୁତ ଗତିରେ ଯିବାବେଳେ ଏଭଳି ଦୁର୍ଘଟଣା ଘଟୁଛି। ସେହିପରି ଘାଟି ରାସ୍ତା ପାର୍ଶ୍ୱରେ କଂକ୍ରିଟ ବିମ୍ ବଦଳରେ ମେଟାଲ ବିମ୍ କ୍ରସ ବ୍ୟାରିୟର ଲଗାଯାଇଥିବାରୁ ଗାଡ଼ି ଧକ୍କାରେ ଭାଙ୍ଗିଯାଇ ତଳକୁ ଖସି ପଡୁଛି ା ଏଣୁ ଏନେଇ ଜାତୀୟ ରାଜପଥ ପ୍ରାଧୀକରଣ ପକ୍ଷରୁ ତୁରନ୍ତ ସମୀକ୍ଷା ସହ ଦୁର୍ଘଟଣାପ୍ରବଣ ସ୍ଥାନଗୁଡିକ ଚିହ୍ନଟ କରି ପଦକ୍ଷେପ ଗ୍ରହଣ କରିବାକୁ ଜିଲା ଓକିଲ ସଂଘର ସଭାପତି ଅଶୋକ ଦାସ ଦାବି କରିଛନ୍ତି ।