ନୂଆଦିଲ୍ଲୀ,୨୦।୧୨: ଲୋକ ସଭା ଓ ରାଜ୍ୟ ସଭାରେ ମଙ୍ଗଳବାର ଶାସକ ଦଳ ଏବଂ ବିରୋଧୀଙ୍କ ମଧ୍ୟରେ ବିବାଦ ଆହୁରି ବଢିଛି। ଏମ୍ପିଙ୍କ ନିଲମ୍ବନକୁ ବିରୋଧ କରୁଥିବା ବିରୋଧୀ ପ୍ରଦର୍ଶନ ସମୟରେ କରାଯାଇଥିବା ଅନୁକରଣ ଉପରେ କଡ଼ା ଆଭିମୁଖ୍ୟ ଗ୍ରହଣ କରି ଭାଜପା ରାହୁଲ ଗାନ୍ଧୀ ଏବଂ ଟିଏମସି ଏମପି କଲ୍ୟାଣ ବାନାର୍ଜୀଙ୍କଠାରୁ କ୍ଷମା ମାଗିବାକୁ ଦାବି କରିଛି।
କେନ୍ଦ୍ର ଆଇନ ମନ୍ତ୍ରୀ ଅର୍ଜୁନ ରାମ ମେଘୱାଲ କହିଛନ୍ତି ଯେ ଭିଡିଓ ପ୍ରସ୍ତୁତ କରିବାବେଳେ ସେ (ରାହୁଲ ଗାନ୍ଧୀ) ଉପଭୋଗ କରୁଥିଲେ। ସେମାନଙ୍କର ଉଦ୍ଦେଶ୍ୟକୁ ଦେଖନ୍ତୁ, ସେମାନେ ଜାଟ ସମ୍ପ୍ରଦାୟ, କୃଷକ, ଓବିସି ସମ୍ପ୍ରଦାୟ ଏବଂ ଉପରାଷ୍ଟ୍ରପତିଙ୍କୁ ଅପମାନିତ କରୁଥିଲେ। ସେମାନେ ଅନୁଭବ କରନ୍ତି ଯେ କେବଳ ସେହି ଚେୟାରରେ ବସିବାର ଅଧିକାର ସେମାନଙ୍କର ଅଛି ଏବଂ ଜାଟ ସମ୍ପ୍ରଦାୟର ଜଣେ ବ୍ୟକ୍ତି କିମ୍ବା ଜଣେ କୃଷକ ପୁଅ କିପରି ସେହି ଚେୟାରରେ ବସିପାରିବେ। ଆମେ ଏହାକୁ ନିନ୍ଦା କରୁଛୁ।
ସୂଚନାଯୋଗ୍ୟ, ସୋମବାର ୯୨ ବିରୋଧୀ ଏମପି ସଂସଦର ଉଭୟ ଗୃହରୁ ନିଲମ୍ବିତ ହୋଇଥିଲେ। ଏହାକୁ ବିରୋଧ କରି ବିରୋଧୀ ଏମପିମାନେ ମଙ୍ଗଳବାର ପାର୍ଲାମେଣ୍ଟ କମ୍ପ୍ଲେକ୍ସରେ ପ୍ରଦର୍ଶନ କରିଥିଲେ ଏବଂ ‘ମକ ପ୍ରକ୍ରିୟା’ କରିଥିଲେ। ଏହି ସମୟରେ ତ୍ରୁଣ ମୂଳ କଂଗ୍ରେସ (ଟିଏମସି) ଲୋକ ସଭା ଏମପି କଲ୍ୟାଣ ବାନାର୍ଜୀ ରାଜ୍ୟ ସଭା ଅଧ୍ୟକ୍ଷ ଜଗଦୀପ ଧନଖଡଙ୍କର ମିମିକ୍ରି କରିଥିଲେ। ଯେଉଁ ଭିଡିଓ ଏବେ ସାମ୍ନାକୁ ଆସିଛି, ଏଥିରେ କଂଗ୍ରେସ ନେତା ରାହୁଲ ଗାନ୍ଧୀ ମଧ୍ୟ ଠିଆ ହୋଇଥିବା ଦେଖିବାକୁ ମିଳିଛି। ରାହୁଲ ଗାନ୍ଧୀ ଏହି ମିମିକ୍ରିର ଏକ ଭିଡିଓ କରୁଥିବା ଦେଖିବାକୁ ମିଳିଛି।
ସମସ୍ତ କେନ୍ଦ୍ର ମନ୍ତ୍ରୀ ଏହାକୁ ନିନ୍ଦା କରିବା ସହ ଟୁଇଟରରେ ଏହି ଭିଡିଓ ଶେୟାର କରିବାବେଳେ କେନ୍ଦ୍ର ମନ୍ତ୍ରୀ ପୀୟୁଷ ଗୋୟଲ ଲେଖିଛନ୍ତି ଯେ ଏହା ଅଶୋଭନୀୟ ଏବଂ ଅତ୍ୟନ୍ତ ଦୁର୍ଭାଗ୍ୟଜନକ!
