ପୁରୀ ଅଫିସ,୨୭।୯: ଗତ କିଛିଦିନ ହେଲା ପୁରୀ ଜିଲାରେ କରୋନା ସଂକ୍ରମଣ ସାଂଘାତିକ ସ୍ଥିତିରେ ଥିଲା। ପ୍ରତ୍ୟହ ଦୁଇଶହ କିମ୍ବା ତିନିଶହରୁ ଊର୍ଦ୍ଧ୍ୱ ସଂକ୍ରମିତ ଚିହ୍ନଟ ହେଉଥିଲେ। ମାତ୍ର ଏବେ ଏହି ଧାରାରେ ଧୀରେ ଧୀରେ ପରିବର୍ତ୍ତନ ଲକ୍ଷ୍ୟ କରାଯାଉଛି। ଜିଲାର କରୋନା ଗ୍ରାଫ୍ ତଳମୁହଁା ହୋଇଛି। ଗତ ୫ ଦିନର ତଥ୍ୟ ଦେଖିଲେ ଏହା ସ୍ପଷ୍ଟ ଜଣାପଡୁଛି। କୋଭିଡ୍ ଟେଷ୍ଟ ସଂଖ୍ୟା ପ୍ରାୟ ସ୍ଥିର ରହିଥିବାବେଳେ ପଜିଟିଭଙ୍କ ସଂଖ୍ୟା କିନ୍ତୁ ହ୍ରାସ ପାଇବାରେ ଲାଗିଛି, ଯାହା ଜିଲାବାସୀଙ୍କ ପାଇଁ ଏକ ଆଶ୍ୱସ୍ତିକର ଖବର ବୋଲି କୁହାଯାଉଛି।
୩ରେ ଜିଲାରୁ ପ୍ରଥମ କରୋନା ଆକ୍ରାନ୍ତ ଚିହ୍ନଟ ହୋଇଥିଲେ। ଏହା ପରେ ୩୬ଦିନ ପର୍ଯ୍ୟନ୍ତ କୌଣସି ସଂକ୍ରମିତ ବାହାରି ନ ଥିଲେ। ମେ ୧୦ ରେ ପୁରୀ ସହରରୁ ୨ଜଣ ପଜିଟିଭ ଚିହ୍ନଟ ହେଲେ। ଏହାପରଠୁ ଜିଲାରେ ସ୍ଥିତି ଜାହିର କରିଥିଲା କରୋନା। ସେପ୍ଟେମ୍ବର ଆରମ୍ଭରୁ ସ୍ଥିତି ଅଣାୟତ୍ତ ହୋଇପଡ଼ିିଥିଲା। ପ୍ରତିଦିନ ଦୁଇଶହ କିମ୍ବା ତିନିଶହ ଉପରେ ସଂକ୍ରମିତ ଚିହ୍ନଟ ହୋଇଥିଲେ। ଅଗଷ୍ଟ ୩୧ ସୁଦ୍ଧା ଜିଲାର ମୋଟ ପଜିଟିଭ ସଂଖ୍ୟା ଥିଲା ୩,୭୮୮। ମାତ୍ର ବର୍ତ୍ତମାନ ସଂଖ୍ୟା ୯,୪୪୧ରେ ପହଞ୍ଚତ୍ଲାଣି। ଏବେ କିନ୍ତୁ ଏହି ଧାରାରେ ପରିବର୍ତ୍ତନ ଆସିଛି। ତଥ୍ୟ ଅନୁଯାୟୀ, ଗତ ୨୨ ତାରିଖରେ ଜିଲାରୁ ୨୬୫ ସଂକ୍ରମିତ ଚିହ୍ନଟ ହୋଇଥିବା ବେଳେ ଏହିଦିନ ସୁଦ୍ଧା ୮୨,୫୮୩ କୋଭିଡ୍ ଟେଷ୍ଟ ହୋଇଥିଲା। ଏହା ପରବର୍ତ୍ତୀ ୪ ଦିନ ଯଥାକ୍ରମେ ୧,୧୬୯, ୧,୧୭୩, ୧,୧୭୦ ଓ ୧,୧୬୨ କୋଭିଡ୍ ଟେଷ୍ଟ ହୋଇଥିଲା। ମାତ୍ର ପଜିଟିଭଙ୍କ ସଂଖ୍ୟା କମିଥିଲା। ଅର୍ଥାତ୍ ଗତ ୨୩ରୁ ୨୬ ତାରିଖ ମଧ୍ୟରେ ଯଥାକ୍ରମେ ୨୧୯, ୨୦୩, ୧୯୯ ଏବଂ ୧୬୮ ଜଣ ପଜିଟିଭ ଚିହ୍ନଟ ହୋଇଛନ୍ତି। ଅନ୍ୟପକ୍ଷରେ ରାଜ୍ୟସ୍ତରୀୟ ତାଲିକାକୁ ଦେଖିଲେ ମୋଟ ପଜିଟିଭ କ୍ଷେତ୍ରରେ ଖୋର୍ଦ୍ଧା, ଗଞ୍ଜାମ ଓ କଟକ ପରେ ପୁରୀ ଚତୁର୍ଥ ସ୍ଥାନରେ ଏବଂ ସକ୍ରିୟ ସଂକ୍ରମିତଙ୍କ କ୍ଷେତ୍ରରେ ଖୋର୍ଦ୍ଧା ଓ କଟକ ପରେ ପୁରୀ ତୃତୀୟ ସ୍ଥାନରେ ରହିଛି।
ଶନିବାର ଜିଲାରୁ ୧୬୮ ପଜିଟିଭ ଚିହ୍ନଟ ହୋଇଛନ୍ତି। ଏମାନଙ୍କ ମଧ୍ୟରୁ ପୁରୀ ପୌରାଞ୍ଚଳରୁ ୫୬ ଏବଂ ବିଭିନ୍ନ ବ୍ଲକରୁ ୧୧୨ ଜଣ ରହିଛନ୍ତି। ଏମାନଙ୍କୁ ମିଶାଇ ମୋଟ ପଜିଟିଭ ସଂଖ୍ୟା ୯,୪୪୧ ଛୁଇଁଛି। ଏମାନଙ୍କ ମଧ୍ୟରୁ ୭,୫୭୯ ଜଣ ସୁସ୍ଥ ହୋଇଥିବାବେଳେ ୧,୮୧୨ ଜଣ ଚିକିତ୍ସାଧୀନ ଅଛନ୍ତି। ଏହି ମହାମାରୀ ପୁଣି ୩ ଜଣଙ୍କ ଜୀବନ ନେଇଛି। ଫଳରେ ଏ ପର୍ଯ୍ୟନ୍ତ କରୋନାରେ ମୋଟ ୫୦ ଜଣଙ୍କ ମୃତ୍ୟୁ ଘଟିଲାଣି। ସେହିପରି ଏବେ ସୁଦ୍ଧା ଜିଲାରୁ ମୋଟ ୮୭,୨୫୭ କୋଭିଡ୍ ପରୀକ୍ଷା କରାଯାଇଛି। ସୁସ୍ଥ ହାର ରହିଛି ୮୦.୨୭ ପ୍ରତିଶତ। ପୁରୀ ଜିଲା ଉପରେ ରାଜ୍ୟ ସରକାର ସ୍ବତନ୍ତ୍ର ଦୃଷ୍ଟି ଦେଇଛନ୍ତି। ଅଧିକ ଡାକ୍ତର ସାଙ୍ଗକୁ ଟେଷ୍ଟ ସଂଖ୍ୟା ବଢାଇବା ପାଇଁ ବ୍ୟବସ୍ଥା କରାଯାଇଛି। ଗୁରୁତର ରୋଗୀଙ୍କୁ ଆଇସିୟୁ ସୁବିଧା ମିଳିବା ଉପରେ ଗୁରୁତ୍ୱ ଦିଆଯିବା ସହ ପୋଲିସ ପକ୍ଷରୁ ଏନ୍ଫୋର୍ସମେଣ୍ଟକୁ ଅଧିକ କଡ଼ାକଡ଼ି କରାଯାଉଛି। ଯେଉଁମାନେ ମାସ୍କ ପିନ୍ଧୁନାହାନ୍ତି କିମ୍ବା କୋଭିଡ୍ ଗାଇଡ୍ ଲାଇନ ଉଲ୍ଲଂଘନ କରୁଛନ୍ତି ସେମାନଙ୍କଠାରୁ ଜରିମାନା ଆଦାୟ କରାଯାଉଛି ବୋଲି ଜିଲା ପ୍ରଶାସନ ପକ୍ଷରୁ କୁହାଯାଇଛି।