କେନ୍ଦୁଝର,୨।୩ (ସ୍ବ.ପ୍ର.): ସାମାଜିକ ବାସନ୍ଦ କାରଣରୁ ଜଣେ ବ୍ୟକ୍ତିଙ୍କ ମୃତ ଦେହ ଦୀର୍ଘ ପ୍ରାୟ ୧୦ ଘଣ୍ଟା ଧରି ସତ୍କାର ହୋଇ ନ ପାରି ଅଟକି ରହିବା ଘଟଣା ଚର୍ଚ୍ଚାର ବିଷୟ ହୋଇଛି। କେନ୍ଦୁଝର ଜିଲା ସ୍ଥାନୀୟ ଧୋବାଡ଼ିହା ସାହିରେ ପୋଲିସ ଓ ମାଜିଷ୍ଟ୍ରେଟ ଉପସ୍ଥିତରେ ସାମୟିକ ଭାବେ ସମସ୍ୟାର ସମାଧାନ ହେବାପରେ ଅନ୍ତ୍ୟେଷ୍ଟି କ୍ରିୟା ଶେଷ ହୋଇଥିଲେ ହେଁ ଏହାକୁ ନେଇ ସାହିରେ ଚାପା ଉତେଜନା ଲାଗିରହିଛି। ମୃତକଙ୍କ ନାଁ ଯଦୁମଣି ବୋଲି ଜଣାପଡିଛି। ବାସନ୍ଦର ସଠିକ କାରଣ ଜଣା ପଡି ନ ଥିଲେ ହେଁ ଆଧୁନିକ ଯୁଗରେ ଏଭଳି ଘଟଣା ଜିଲା ମୁଖ୍ୟାଳୟରେ ଘଟିବା ଆଲୋଚନାର ବିଷୟ ହୋଇଛି। ତେବେ ରାଜନୀତି ଏବଂ ଜମିଜମା ପ୍ରସଙ୍ଗକୁ ନେଇ ସାହିଲୋକ ଦୀର୍ଘ ବର୍ଷ ହେଲେ ମୃତ ଯଦୁମଣୀ ଓ ତାଙ୍କ ପରିବାରକୁ ସାହିରୁ ବାସନ୍ଦ କରାଯାଇଥିଲା। ସୋମବାର ଯଦୁମଣୀଙ୍କ ମୃତ୍ୟୁ ଘଟିବା ପରେ ତାଙ୍କ ଅନ୍ତିମ ସତ୍କାର ପାଇଁ ପଡୋଶୀମାନେ ମୃତଦେହକୁ ଛାଡୁ ନ ଥିବା ଭଳି ଅମାନୁଷିକ ଘଟଣା ଦେଖିବାକୁ ମିଳିଥିଲା। ଖବର ପାଇ ଟାଉନ ଥାନା ଅଧିକାରୀ ଓ ସ୍ଥାନୀୟ ତହସିଲଦାର ଘଟଣାସ୍ଥଳରେ ପହଞ୍ଚି ଲୋକଙ୍କୁ ବୁଝାସୁଝା କରିଥିଲେ। ଏହାପରେ ଅନ୍ତିମ ସତ୍କାର ପାଇଁ ମୃତଦେହକୁ ସାହି ଲୋକ ଛାଡିଥିଲେ। ମାଜିଷ୍ଟ୍ରେଟଙ୍କ ଉପସ୍ଥିତିରେ ଅନ୍ତିମ ସତ୍କାର ପାଇଁ ନେଇଥିବା ଦେଖିବାକୁ ମିଳିଛି। ଏନେଇ ତହସିଲଦାର ଆଶୀଷ ମହାପାତ୍ର କହିଛନ୍ତି ଯେ ସାମୟିକ ଭାବେ ଘଟଣାର ସମାଧାନ ହୋଇ ଅନ୍ତିମ ସତ୍କାର ସରିଛି। ଘଟଣା ଉପରେ ନଜର ରଖୁଥିବା କହିଛନ୍ତି।