ସୋରଡ଼ା,୨୪ା୬(ଲମ୍ବୋଦର ପାଣିଗ୍ରାହୀ): ବ୍ୟାଗ୍ କିଣିବାକୁ ଆସି ନଗଦ ଟଙ୍କା ସହ ସୁନା ଅଳଙ୍କାର ଲୁଟିନେବା ମାମଲାରେ ସୋରଡ଼ା ପୋଲିସ ୧୪ ଦିନ ମଧ୍ୟରେ ଡକାୟତମାନଙ୍କୁ ଗିରଫ ସହ ଲୁଟ୍ ସୁନା ଟଙ୍କା ଜବତ କରିଛି। ତେବେ ଲୁଟ୍ର ଶିକାର ହୋଇଥିବା ସ୍ଥାନୀୟ ବଡ଼ଦାଣ୍ଡର ବ୍ୟବସାୟୀ ଦୀନବନ୍ଧୁ ଚୌଧୁରୀଙ୍କ ଘରକୁ ଯାଇ ସମସ୍ତ ଉଦ୍ଧାର ଟଙ୍କା,ସୁନା ଫେରାଇଛି। ୨୨ ଭରି ସୁନା ଅଳଙ୍କାର,ନଗଦ ୨୮୯୦୦୦ ( ଦୁଇଲକ୍ଷ ଅଣାନବେ ହଜାର ),୨ ଟି ମୋବାଇଲକୁ ସାର୍ବସାଧାରଣଙ୍କ ଉପସ୍ଥିତିରେ ଆଇଆଇସି ରମେଶ କୁମାର ପ୍ରଧାନ,ଏସ୍ଆଇ କୈଳାସ ଚନ୍ଦ୍ର ସାହୁ,ସୁକାନ୍ତି ଦେଇ ପ୍ରମୁଖ ଦୀନବନ୍ଧୁଙ୍କ ହାତରେ ଦେଇଛନ୍ତି।
ସୂଚନାଯୋଗ୍ୟ, ଗତ ୧୧ା୬ା୨୩ରେ ବ୍ୟାଗ୍ କିଣିବା ବହାନାରେ ଦୀନବନ୍ଧୁଙ୍କ ଦୋକାନରେ ପଶି ଖାରିଗଡ଼ା ଗ୍ରାମର ସୁଧାଂଶୁ କୁମାର ଗଉଡ,ସନାତନ ଗଉଡ଼,ଉମା ଗଉଡ଼ ୩ ଯୁବକ ବନ୍ଧୁକ ଦେଖାଇ ଲୁଟ୍ କରିଥିଲେ। ପୋଲିସ ଦୀନବନ୍ଧୁଙ୍କ ଏତଲାକୁ ଭିତ୍ତିକରି ୨୬୫/୨୦୨୩ରେ ଏକ ମାମଲା ରୁଜୁକରି ବିଭିନ୍ନ ସ୍ଥାନରେ ଲାଗିଥିବା ସିସିଟିଭି ଯାଞ୍ଚ କରି ୪ ଦିନରେ ସେମାନଙ୍କୁ ଧରି ସୁନା,ଅର୍ଥ ଜବତ କରି କୋର୍ଟ ଚାଲାଣ କରିଥିଲା। ଯୁବକମାନେ ନିଜ ବ୍ୟାଙ୍କ ଖାତାରେ ୨୭୦୦୦ ଟଙ୍କା ଜମା କରିଥିଲେ। ଶୁକ୍ରବାର ସେମାନଙ୍କୁ ରିମାଣ୍ଡରେ ଆଣି ବ୍ୟାଙ୍କରୁ ଅର୍ଥ ଉଠାଯାଇଥିଲା। ଶନିବାର ସକାଳୁ ସମସ୍ତ ଜିନିଷ ଫେରାଯାଇଛି । ଲୁଟ୍ ଜିନିଷ, ଅର୍ଥ ପାଇ ଦୀନବନ୍ଧୁ ପୋଲିସର କାର୍ଯ୍ୟ ଦକ୍ଷତାକୁ ପ୍ରଶଂସା କରିଛନ୍ତି। ସେହିପରି ଗତ ୧୪ା୫ା୨୩ ମଧ୍ୟାହ୍ନରେ ଏମାନେ ଦାରିଙ୍ଗବାଡ଼ି ଘାଟି ରାସ୍ତାରେ ଦାରିଙ୍ଗବାଡିର ଦମ୍ପତି ବିକ୍ରମ କିଶୋର ପଟ୍ଟନାୟକ ଓ ସାଗରପ୍ରିୟା ପଟ୍ଟନାୟକଙ୍କୁ ଅଟକାଇ ସୁନା ଚେନ ଲୁଟିନେଇଥିଲେ। ଯାହାକି କେସ ନମ୍ବର ୨୧୧/୨୩ରେ ମାମଲା ରୁଜୁ ହୋଇଥିଲା। ଉକ୍ତ ଚେନ୍କୁ ଆସ୍କାର ଏକ ଘରୋଇ ବ୍ୟାଙ୍କରେ ବନ୍ଧା ପକାଇ ଦେଇଥିଲେ। ତାକୁ ମଧ୍ୟ ଉଦ୍ଧାର କରି ଶନିବାର ଥାନା ପରିସରରେ ଦମ୍ପତିଙ୍କୁ ହସ୍ତାନ୍ତର କରିଛି ପୋଲିସ।