ନିଜର ଇଚ୍ଛା ପୂରଣ କରିବା ପାଇଁ ମଣିଷ ସବୁ ଅସମ୍ଭବକୁ ସମ୍ଭବ କରିପାରେ। ଯେତେ କଷ୍ଟ ଆସିଲେ ବି ଲକ୍ଷ୍ୟସ୍ଥଳରେ ପହଞ୍ଚିବା ପାଇଁ କିଛି ଲୋକ ଚାହିଁଥାନ୍ତି। ଏମିତି ଏକ ଯୋଡ଼ି ଅଛନ୍ତି, ଯିଏ କି ସେମାନଙ୍କ ଇଚ୍ଛା ପୂରଣ କରିବାକୁ ବହୁତ ପରିଶ୍ରମ କରିଥିଲେ। ସେ ପୂରା ଦୁନିଆ ଭ୍ରମଣ କରିବାକୁ ଭଲ ପାଉଥିଲେ। ତାଙ୍କର ଏହି ଇଚ୍ଛାରେ ବାଧକ ସାଜିଥିଲା କରୋନା ମହାମାରୀ। ଏବେ ମହାମାରୀ ଟିକେ ହ୍ରାସ ପାଇଥିବାରୁ ସେମାନେ ତାଙ୍କର ଇଚ୍ଛା ପୂରଣ ପାଇଁ ବାହାରକୁ ବୁଲି ବାହାରିଛନ୍ତି। ନିଜେ ଏକ ବସ୍କୁ ଘର କରିଛନ୍ତି। ଏଥିରେ ସମସ୍ତ ପ୍ରକାର ସୁବିଧା ରହିଛି। ଏହା କୌଣସି ବିଳାସମୟ ଘରଠାରୁ ବି କମ୍ ନୁହେଁ।
ବ୍ରିଟେନର କ୍ୟାଜି ମ୍ୟାଗେନିସ୍ ଏବଂ ବ୍ରାଡଲି ଓ୍ବିଲିୟମ୍ସ ବର୍ଷ ବର୍ଷ ଧରି ଅନେକ ଦେଶ ଭ୍ରମଣ କରିଛନ୍ତି। ସେମାନେ ପ୍ରାୟ ୪୫ଟି ଦେଶ ଭ୍ରମଣ କରିଛନ୍ତି। ଏବେ ଏକ ନୂତନ ଉଦ୍ଭାବନ କରିଛନ୍ତି ଏହି ଦମ୍ପତି। ନିଜ ଇଚ୍ଛାରେ ଭ୍ରମଣ କରିବେ, ଯେଉଁଠି ଚାହିଁବେ ସେଠି ରହିବେ। ସେଥିପାଇଁ ବସ୍କୁ ବାଛିଲେ। ଏହାକୁ ନିଜ ଘର ପରି କରିଦେଲେ। ଫଳରେ କେଉଁ ହୋଟେଲ କିମ୍ବା ରେଷ୍ଟୁରାଣ୍ଟକୁ ଯିବାକୁ ପଡ଼ିଲାନି।
ଏହି ବସ୍ରେ ବେଡ୍, ବାଥ୍ରୁମ, ମାଇକ୍ରୋଓ୍ବେଭ୍, ଏୟାର କଣ୍ଡିଶନର ପରି ସୁବିଧା ରହିଛି। ସେମାନେ ଆମେରିକାରୁ ତାଙ୍କର ଯାତ୍ରା ଆରମ୍ଭ କରିଥିଲେ। ଗତବର୍ଷ ମନକୁ ଆସିଲା ବୁଲିବା ସହ ଏଥିରୁ କିଛି ଟଙ୍କା ରୋଜଗାର କରିବେ। ତେଣୁ ସେମାନେ ଯେଉଁ ଯେଉଁ ସ୍ଥାନ ବୁଲିବାକୁ ଯାଉଥିଲେ ସେଠାରେ ଲୋକମାନଙ୍କୁ ସୂଚନା ଦେଉଥିଲେ। ବ୍ଲଗର ହେବା ପରେ ଏଥିରୁ କିଛି ରୋଜଗାର କରୁଛନ୍ତି ବୋଲି କୁହନ୍ତି, କ୍ୟାଜି ଏବଂ ବ୍ରାଡ୍ଲି। ତାଙ୍କର ଏହି ଯାତ୍ରାକୁ ବହୁ ଲୋକ ପସନ୍ଦ କରୁଛନ୍ତି।