ହରାରେ,୧୧।୭: ପାକିସ୍ତାନ ଏବଂ ଜିମ୍ବାୱେ ମଧ୍ୟରେ ଖେଳାଯାଉଥିବା ହରାରେ ଟେଷ୍ଟରେ ପାକିସ୍ତାନ ଜିମ୍ବାୱେକୁ ଇନିଂସ ଏବଂ ୧୪୭ରନରେ ପରାସ୍ତ କରି ଏହି ସିରିଜକୁ ନିଜ ନାମରେ ନାମିତ କରିଛି। ଦ୍ୱିତୀୟ ଟେଷ୍ଟରେ ପାକିସ୍ତାନ ପ୍ରଥମ ଇନିଂସରେ ୫୧୦ ରନ ସଂଗ୍ରହ କରିଥିଲା ଏବଂ ଏହା ପରେ ସେମାନେ ଆୟୋଜକ ଜିମ୍ବାୱେକୁ ପ୍ରଥମ ଇନିଂସରେ ମାତ୍ର ୧୩୨ ଏବଂ ଦ୍ୱିତୀୟ ଇନିଂସରେ ୨୩୧ ରନରେ ଅଲଆଉଟ୍ କରିଥିଲେ। ପାକିସ୍ତାନ ପକ୍ଷରୁ ଆବିଦ ଅଲି ଅପରାଜିତ ୨୧୫ ରନ ଏବଂ ଅଜହର ଅଲି ୧୨୬ ରନ କରିଥିଲେ। ତେବେ ବିଜୟର ସବୁଠାରୁ ବଡ ହିରୋ ଥିଲେ ବୋଲର୍ ହାସନ୍ ଅଲି। ଡାହାଣହାତୀ ଏହି ଦ୍ରୁତ ବୋଲର ପ୍ରଥମ ଇନିଂସରେ ମାତ୍ର ୨୭ ରନ ଦେଇ ୫ ଉଇକେଟ ନେଇଥିଲେ। ଦ୍ୱିତୀୟ ଇନିଂସରେ ହାସନ ଅଲିଙ୍କୁ କୌଣସି ଉଇକେଟ ମିଳି ନ ଥିଲା କିନ୍ତୁ ସେ ନିଶ୍ଚିତ ଭାବେ ଟେଷ୍ଟ ସିରିଜର ଶ୍ରେଷ୍ଠ ଖେଳାଳି ଭାବରେ ମନୋନୀତ ହୋଇଥିଲେ।
ଜିମ୍ବାୱେ ବିପକ୍ଷ ଟେଷ୍ଟ ସିରିଜରେ ହାସନ ଅଲି ୪ ଇନିଂସରେ ସର୍ବାଧିକ ୧୪ ଉଇକେଟ ନେଇଥିଲେ। ଉଭୟ ଟେଷ୍ଟରେ ହାସନ ଅଲି ଗୋଟିଏ ଇନିଂସରେ ପାଞ୍ଚଟି ଉଇକେଟ ନେଇଛନ୍ତି। ତାଙ୍କର ଶକ୍ତିଶାଳୀ ବୋଲିଂ ହେତୁ ହାସନ ଅଲି ୨୦୨୧ ମସିହାରେ ସର୍ବାଧିକ ଉଇକେଟ ପାଇବାରେ ସଫଳ ହୋଇଥିଲେ। କ୍ରିକେଟର ତିନୋଟି ଫର୍ମାଟ ବିଷୟରେ କହିବାକୁ ଗଲେ ହାସନ ଅଲି ଚଳିତ ବର୍ଷ ସର୍ବାଧିକ ଉଇକେଟ ନେଇଛନ୍ତି। ୧୫ ଇନିଂସରେ ସର୍ବାଧିକ ସେ ୪୦ ଉଇକେଟ ନେଇଛନ୍ତି। ୧୦ ଇନିଂସରେ ୩୪ ଉଇକେଟ ନେଇଥିବା ଅଶ୍ୱିନଙ୍କୁ ମଧ୍ୟ ହାସନ ଅଲି ପଛରେ ପକାଇଛନ୍ତି। ଉଲ୍ଲେଖଥାଉ କି, ଅଶ୍ୱିନ ଏକଦିବସୀୟ ଏବଂ ଟି୨୦ କ୍ରିକେଟ ଖେଳନ୍ତି ନାହିଁ। ଶାହିନ ଆଫ୍ରିଦି ୨୯ ଉଇକେଟ ନେଇ ତୃତୀୟ ସ୍ଥାନରେ ଅଛନ୍ତି।
ହାସନ ଅଲି ୨୦୧୯ରେ ଆଘାତ ହେତୁ ପାକିସ୍ତାନୀ ଦଳରୁ ଓହରି ଯାଇଥିଲେ। ତାଙ୍କର ଆଘାତ ଏତେ ଭୟଙ୍କର ଥିଲା ଯେ ତାଙ୍କୁ ଫେରିବା ପାଇଁ ଦୁଇ ବର୍ଷ ଲାଗିଗଲା।ଏହି ସମୟ ମଧ୍ୟରେ ହାସନ ଅଲି ମାନସିକ ସ୍ତରରେ ଭାଙ୍ଗି ଯାଇଥିଲେ। ହାସନ ଅଲି ଏକ ସାକ୍ଷାତକାରରେ କହିଥିଲେ ଯେ ସେ ରୁମରେ ଏକୁଟିଆ ବସି କାନ୍ଦୁଥିଲେ। ତେବେ ଏହା ପରେ ହାସନ ଅଲି ଏକ ଦୃଢ ପ୍ରତ୍ୟାବର୍ତ୍ତନ କରିଥିଲେ।
