ନୂଆଦିଲ୍ଲୀ,୫।୪: ବିରାଟ କୋହଲି ହେଉଛନ୍ତି ଭାରତର ସବୁଠାରୁ ସଫଳ ଟେଷ୍ଟ ଅଧିନାୟକ। ତାଙ୍କ ଅଧିନାୟକତ୍ୱରେ ଭାରତ ଗତ କିଛି ମାସ ମଧ୍ୟରେ ଅଷ୍ଟ୍ରେଲିଆ, ଇଂଲଣ୍ଡ ଭଳି ଶକ୍ତିଶାଳୀ ଦଳକୁ ପରାସ୍ତ କରିଛି। କିନ୍ତୁ ଆଜି ବି ଆଇପିଏଲ ଟାଇଟଲ ଜିତିବାର ସ୍ବପ୍ନ ପୂରଣ ହୋଇନାହିଁ। ତାଙ୍କ ଅଧିନାୟକତ୍ୱରେ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ (ଆରସିବି) ୨୦୧୬ ରେ ଆଇପିଏଲ ଫାଇନାଲ ଖେଳିଥିଲା। କିନ୍ତୁ ସନରାଇଜର୍ସ ହାଇଦ୍ରାବାଦଠାରୁ ଦଳ ପରାସ୍ତ ହୋଇଥିଲା। ଗତ ସିଜନରେ ଆରସିବି ପ୍ଲେ ଅଫରେ ମଧ୍ୟ ପହଞ୍ଚିଥିଲା, କିନ୍ତୁ ଟାଇଟଲ ଜିତିବାରେ ବଞ୍ଚିତ ହୋଇଥିଲା। ପୂର୍ବତନ ଭାରତୀୟ ବ୍ୟାଟ୍ସମ୍ୟାନ ତଥା ସମୀକ୍ଷକ ଆକାଶ ଚୋପ୍ରା ମଧ୍ୟ ଚଳିତ ସିଜନରେ ଆରସିବି ପାଇଁ ଏକ ବଡ଼ ଭବିଷ୍ୟବାଣୀ କରିଛନ୍ତି। ସେ କହିଛନ୍ତି ଯେ ଆଇସିପି ୨୦୨୧ରେ ପ୍ଲେ ଅଫ ଆରସିବି ପହଞ୍ଚି ପାରିବ ନାହିଁ।
ତାଙ୍କ ୟୁଟ୍ୟୁବ ଚ୍ୟାନେଲରେ କଥାବାର୍ତ୍ତା କରି ଆକାଶ କହିଛନ୍ତି ଯେ, ଚଳିତ ବର୍ଷ ଆରସିବି ପୂର୍ବ ସିଜିନର ପ୍ରଦର୍ଶନକୁ ପୁନରାବୃତ୍ତି କରିପାରିବ ନାହିଁ। ଏଥର ପ୍ଲେ ଅଫ ଯୋଗ୍ୟତା ଅର୍ଜନ କରିପାରିବେ ନାହିଁ। ଯଦି ଆମେ ଗତ ତିନି-ଚାରି ବର୍ଷକୁ ଦେଖିବା, ସେମାନଙ୍କର ଶେଷ ସିଜିନ ସର୍ବୋତ୍ତମ ଥିଲା, କିନ୍ତୁ ଦଳ ଶେଷରେ ହାରିଗଲା। ଏହା ହେଉଛି ଦଳର ସମସ୍ୟା। ଯଦି ଆରସିବି ଭଲ ଆରମ୍ଭ ନ କରେ ତେବେ ଏହି ଦଳ ଲିଗରେ ସମସ୍ୟା ହୋଇପାରେ। ଆକାଶ ଆହୁରି ମଧ୍ୟ କହିଛନ୍ତି ଯେ ବିରାଟ କୋହଲି ଚଳିତ ବର୍ଷ ଆଇପିଏଲର ସର୍ବାଧିକ ରନ ସ୍କୋରର ବୋଲି ପ୍ରମାଣ କରିବେ। ଏଥିପାଇଁ ସେ ଅରେଞ୍ଜ୍ କ୍ୟାପ ପାଇବେ ବୋଲି ଆକାଶ ଭବିଷ୍ୟବାଣୀ କରିଛନ୍ତି।
