ଇସଲମାବାଦ,୨୩।୮: ୧୦ ବର୍ଷ ପରେ କୌଣସି ଖେଳାଳି ଦଳକୁ ଫେରିବା ହୁଏତ ସମ୍ଭବ ହୁଏନି। ଏତେ ଦିନ ଅପେକ୍ଷା କରିବା ପୂର୍ବରୁ ମଧ୍ୟ କିଛି ଖେଳାଳି ଆଶା ଛାଡି ଘରେ ବସି ଅବସର ନେଇଯାଆନ୍ତି। କ୍ରିକେଟ ଦୁନିଆରେ ଏମିତି ଅନେକ ଉଦାହରଣ ଅଛି, କିନ୍ତୁ ପାକିସ୍ତାନର ଫୱାଦ ଆଲାମ ଏକ ନୂଆ କାହାଣୀ ଲେଖିଛନ୍ତି। କଦାପି ଆଶା ଛାଡିବା ଏବଂ କେବେ ହାର ମାନିବାର ଏକ ନୂତନ ଉଦାହରଣ ସୃଷ୍ଟି କରିଛନ୍ତି ସେ। ପ୍ରାୟ ୧୦ ବର୍ଷ ପାଇଁ ଟେଷ୍ଟ ଦଳରୁ ବାହାରେ ଥିଲେ ମଧ୍ୟ ସେ ଆଶା ଛାଡି ନ ଥିଲେ ଏବଂ ପଳକୁ ପ୍ରତ୍ୟାବର୍ତ୍ତନ କରିଥିଲେ। ଦୀର୍ଘ ସମୟ ପରେ ଦଳକୁ ଫେରି ପାକିସ୍ତାନ ବୋର୍ଡ ଏବଂ ଚୟନକର୍ତ୍ତାଙ୍କୁ ଆଇନା ଦେଖାଇଛନ୍ତି। ୨୦୦୯ରେ ଶ୍ରୀଲଙ୍କା ବିପକ୍ଷରେ ଏକ ଶତକ ହାସଲ କରି ଟେଷ୍ଟ ଡେବ୍ୟୁ କରିଥିବା ଫୱାଦ ଏହା ପରେ ମାତ୍ର ୨ ଟି ଟେଷ୍ଟ ମ୍ୟାଚ ଖେଳିବାରେ ସକ୍ଷମ ହୋଇଥିଲେ ଏବଂ ଦଳ ବାହାରେ ଥିଲେ।
ପାକିସ୍ତାନର ଚୟନକର୍ତ୍ତାମାନେ ପ୍ରାୟ ୧୦ ବର୍ଷ ପରେ ଫୱାଦଙ୍କୁ ମନେ ପକାଇ ଦଳରେ ସାମିଲ କରିଥିଲେ। ଗତ ବର୍ଷ ଇଂଲଣ୍ଡ ବିପକ୍ଷ ସାଉଥମ୍ପଟନ ଟେଷ୍ଟରୁ ଦଳକୁ ଫେରିଥିଲେ। ସେ ଫେରିବା ପରେ ପ୍ରଥମ ମ୍ୟାଚରେ ଶୂନରେ ଆଉଟ୍ ହୋଇଥିଲେ ସତ, କିନ୍ତୁ ଏହା ପରେ ଏହି ଖେଳାଳି ଏକ ଚମତ୍କାର ଖେଳିଥିଲେ। ପ୍ରତ୍ୟାବର୍ତ୍ତନ କରିବା ପରେ ଫୱାଦ ଗୋଟିଏ ବର୍ଷରେ ୪ ଶତକ ହାସଲ କରିଥିଲେ। ସେ ଡିସେମ୍ବର ୨୦୨୦ ରେ ନ୍ୟୁଜିଲାଣ୍ଡ ବିପକ୍ଷରେ ୧୦୨, ଜାନୁଆରୀ ୨୦୨୧ ରେ ଦକ୍ଷିଣ ଆଫ୍ରିକା ବିପକ୍ଷରେ ୧୦୯, ଏପ୍ରିଲ ୨୦୨୧ରେ ଜିମ୍ବାୱେ ବିପକ୍ଷରେ ୧୪୦ ଏବଂ ଏବେ ୱେଷ୍ଟ ଇଣ୍ଡିଜ ବିପକ୍ଷରେ ୧୨୪ ରନ କରିଥିଲେ। ୱେଷ୍ଟଇଣ୍ଡିଜ ବିପକ୍ଷ ଚାଲିଥିବା ୨ ଟେଷ୍ଟ ସିରିଜର ଦ୍ୱିତୀୟ ମ୍ୟାଚରେ ଫୱାଦ ଆଲାମ ପାକିସ୍ତାନକୁ ସଙ୍କଟରୁ ରକ୍ଷା କରିଥିଲେ। ସେ ପଡ଼ିଆକୁ ଫେରି ଅପରାଜିତ ୧୨୪ ରନର ଇନିଂସ ଖେଳିଥିଲେ।
