ଭାରତୀୟ କ୍ରିକେଟ୍ ଦଳର ପୂର୍ବତନ କୋଚ୍ ଜନ୍ ରାଇଟ୍ ଆଜି ୬୭ ବର୍ଷରେ ପଦାର୍ପଣ କରିଛନ୍ତି। ନ୍ୟୁଜିଲାଣ୍ଡର ସଫଳ କ୍ରିକେଟ୍ର ଭାବେ ଜଣାଶୁଣା ରାଇଟ୍ ୨୦୦୦ରୁ ୨୦୦୫ ପର୍ଯ୍ୟନ୍ତ ଭାରତୀୟ ଦଳର କୋଚ ଥିଲେ। ଏହି ସମୟରେ ଭାରତୀୟ କ୍ରିକେଟକୁ ସେ ଏକ ଉଚ୍ଚ ସୋପାନରେ ପହଞ୍ଚାଇଥିଲେ।
୧୯୭୮ ରେ ଡେବ୍ୟୁ କରିଥିବା ରାଇଟ ନ୍ୟୁଜିଲାଣ୍ଡ ଟେଷ୍ଟ ଦଳର ଏକ ଗୁରୁତ୍ୱପୂର୍ଣ୍ଣ ଅଂଶ ଥିଲେ। ସେ ୧୯୭୭-୭୮ ମସିହାରେ ୱେଲିଙ୍ଗଟନରେ ପ୍ରଥମ ଇନିଂସରେ ୫୫ ରନ ସଂଗ୍ରହ କରିଥିଲେ କିନ୍ତୁ ପ୍ରାୟ ଛଅ ଘଣ୍ଟା ବ୍ୟାଟିଂ କରିଥିଲେ। ତାଙ୍କ ଇନିଂସ ଯୋଗୁ କିୱି ଦଳ ଇଂଲଣ୍ଡ ବିପକ୍ଷରେ ବିଜୟ ହାସଲ କରିଥିଲା। ଏହି ବିଜୟ ନ୍ୟୁଜିଲାଣ୍ଡ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଥିଲା କାରଣ ଏହା ୪୮ ତମ ମ୍ୟାଚରେ ଇଂଲଣ୍ଡ ବିପକ୍ଷରେ ପ୍ରଥମ ବିଜୟ ଥିଲା।
ଟେଷ୍ଟ କ୍ରିକେଟରେ ରାଇଟ ୧୨ ଶତକ ହାସଲ କରିଥିଲେ। ଏଥିମଧ୍ୟରୁ ୯ଟି ମ୍ୟାଚ ଡ୍ର ରହିଥିଲା। ଶତକ ଦୃଷ୍ଟିରୁ ସେ ମଧ୍ୟ ଟିକେ ଦୁର୍ଭାଗ୍ୟଶାଳୀ ଥିଲେ। ଦୁଇଥର ସେ ୯୯ରେ ଏବଂ ଥରେ ୯୮ ରେ ଆଉଟ୍ ହୋଇଥିଲେ। ଭାରତର କୋଚ ହେବା ପୂର୍ବରୁ ସେ ଭାରତୀୟ ବୋଲିଂକୁ ବହୁତ ପସନ୍ଦ କରୁଥିଲେ। ଭାରତ ବିପକ୍ଷରେ ସେ ୯ ଟେଷ୍ଟରେ ହାରାହାରି ୬୧.୮୪ରେ ୮୦୪ ରନ ସ୍କୋର କରିଥିଲେ। ଏଥିରେ ୩ ଶତକ ଏବଂ ୩ ଅର୍ଦ୍ଧ ଶତକ ଅନ୍ତର୍ଭୁକ୍ତ ଥିଲା। ସେ ପ୍ରାୟ ପାଞ୍ଚ ବର୍ଷ ଧରି ଭାରତୀୟ ଦଳର ପ୍ରଶିକ୍ଷକ ଥିଲେ। ଏହା ପରେ ସେ ନ୍ୟୁଜିଲାଣ୍ଡର କୋଚ ମଧ୍ୟ ଥିଲେ କିନ୍ତୁ ଏହି ଯାତ୍ରା ବେଶି ଦିନ ରହିଲା ନାହିଁ । ତାଙ୍କ ଯାତ୍ରା ସମୟରେ ନ୍ୟୁଜିଲାଣ୍ଡ ହୋବର୍ଟରେ ଅଷ୍ଟ୍ରେଲିଆ ବିପକ୍ଷରେ ଏକ ଐତିହାସିକ ବିଜୟ ହାସଲ କରିଥିଲା। ଏହା ବ୍ୟତୀତ କିୱି ଦଳ ବିଶ୍ୱକପ ୨୦୧୧ ରେ ସେମିଫାଇନାଲକୁ ଯାତ୍ରା କରିଥିଲା।
ତାଙ୍କ କ୍ୟାରିୟର ବିଷୟରେ କହିବାକୁ ଗଲେ ବାମହାତୀ ବ୍ୟାଟ୍ସମ୍ୟାନ ରାଇଟ୍ ନ୍ୟୁଜିଲାଣ୍ଡ ପାଇଁ ୮୨ଟି ଟେଷ୍ଟ ଏବଂ ୧୪୯ ଟି ଦିନିକିଆ ଖେଳିଥିଲେ। ସେ ଟେଷ୍ଟ ମ୍ୟାଚରେ ୫୩୩୪ ରନ ଏବଂ ଦିନିକିଆରେ ୩୮୯୧ ରନ ସଂଗ୍ରହ କରିଥିଲେ। ୧୯୮୦ରେ, ଜନ ରାଇଟ ଗୋଟିଏ ବଲରୁ ୮ ରନ ସ୍କୋର କରି ଚର୍ଚ୍ଚାକୁ ଆସିଥିଲେ। କ୍ରିକେଟ ଇତିହାସରେ ଦ୍ୱିତୀୟ ଖେଳାଳି ଭାବେ ସେ ଏହି କାରନାମା କରିଥିଲେ। ସେ ଚାରି ରନ ଦୌଡି ଦୌଡି ନେଇଥିବାବେଳେ ବାକି ରନ ଓଭର ଥ୍ରୋରୁ ଆସିଥିଲା।