ଅହମ୍ମଦାବାଦ,୯।୮: ୨୦୧୮ ମସିହାରେ ଭାରତୀୟ ଦୃଷ୍ଟିହୀନ କ୍ରିକେଟ ଦଳ ବିଶ୍ୱକପ ଟାଇଟଲ ଜିତି ଇତିହାସ ସୃଷ୍ଟି କରିଥିଲା। ଏହି ବିଜୟ ଅତ୍ୟନ୍ତ ସ୍ବତନ୍ତ୍ର ଥିଲା। ଫାଇନାଲରେ ଟିମ ଇଣ୍ଡିଆ ପାକିସ୍ତାନକୁ ପରାସ୍ତ କରିଥିଲା। ଏହି ବିଜୟ ପରେ ଭାରତୀୟ ଖେଳାଳିମାନେ ବହୁ ପ୍ରଶଂସା ଲାଭ କରିଥିଲେ। ରାଷ୍ଟ୍ରପତିଙ୍କଠାରୁ ଆରମ୍ଭ କରି ପ୍ରଧାନମନ୍ତ୍ରୀ ପର୍ଯ୍ୟନ୍ତ ସମସ୍ତେ ଖେଳାଳିଙ୍କୁ ଅଭିନନ୍ଦନ ଜଣାଇଥିଲେ। କିନ୍ତୁ ଏହି ବଡ ସଫଳତାର ତିନି ବର୍ଷ ପରେ, ଆଜି ସେହି ବିଜୟୀ ଦଳର ଜଣେ ସଦସ୍ୟ ପେଟ ପୋଷିବା ପାଇଁ ଶ୍ରମିକ କାମ କରୁଛନ୍ତି। ସେ ହେଉଛନ୍ତି ଗୁଜରାଟର ନରେଶ ତୁମ୍ଡା। ନରେଶ କହିଛନ୍ତି ଯେ, ସରକାରଙ୍କୁ ସହାୟତା ପାଇଁ ବାରମ୍ବାର ଅନୁରୋଧ ସତ୍ତ୍ୱେ ଏପର୍ଯ୍ୟନ୍ତ କିଛି ମିଳିନାହିଁ। ମୁଁ ଦିନକୁ ଶ୍ରମିକ ଭାବେ ଖଟି ମାତ୍ର ୨୫୦ ଟଙ୍କା ରୋଜଗାର କରେ। ମୋର ମାତାପିତା ବୃଦ୍ଧ। ମୁଁ ପରିବାରର ଏକମାତ୍ର ଅନ୍ନଦାତା। ମୁଁ ସାହାଯ୍ୟ ପାଇଁ ଗୁଜୁରାଟର ମୁଖ୍ୟମନ୍ତ୍ରୀଙ୍କୁ ତିନିଥର ନିବେଦନ କଲି, କିନ୍ତୁ ଏପର୍ଯ୍ୟନ୍ତ ତାଙ୍କଠାରୁ କୌଣସି ପ୍ରତିକ୍ରିୟା ଆସିନାହିଁ। ମୁଁ ସରକାରଙ୍କୁ ଅନୁରୋଧ କରୁଛି ମୋତେ ଚାକିରି ଦିଅନ୍ତୁ ଯାହା ଦ୍ୱାରା ମୁଁ ମୋ ପରିବାର ଚଳାଇବି। ୨୯ ବର୍ଷ ବୟସ୍କ ନରେଶ ଗତ ବର୍ଷ ଲକ୍ଡାଉନରେ ପନିପରିବା ବିକ୍ରି କରୁଥିଲେ। ଏହି ରୋଜଗାରରେ ପରିବାରର ଖର୍ଚ୍ଚ ମେଣ୍ଟି ନ ଥିଲା, ତେଣୁ ସେ ଜଣେ ଶ୍ରମିକ ଭାବରେ କାମ କରିବା ଆରମ୍ଭ କଲେ।
ନରେଶ ଜଣେ ଦକ୍ଷ କ୍ରିକେଟର। ସେ ମାତ୍ର ପାଞ୍ଚ ବର୍ଷ ବୟସରେ କ୍ରିକେଟ ଖେଳିବା ଆରମ୍ଭ କରିଥିଲେ। ଅସୁବିଧାକୁ ଖାତିର ନ କରି ସେ ଦ୍ୱାଦଶ ପର୍ଯ୍ୟନ୍ତ ଅଧ୍ୟୟନ କରିଥିଲେ। ପାଞ୍ଚ ବର୍ଷ ବୟସରେ ସେ ଦୃଷ୍ଟି ଶକ୍ତି ହରାଇଥିଲେ। ୨୦୧୪ ମସିହାରେ, ସେ ଗୁଜରାଟର ଦଳରେ ମନୋନୀତ ହୋଇଥିଲେ। ଏହା ପରେ ସେ ଭାରତୀୟ ଦଳରେ ଖେଳିବାର ସୁଯୋଗ ପାଇଲେ। ବିଶ୍ୱକପ୍ର ଫାଇନାଲରେ ଭାରତ ୮ ଉଇକେଟ ହରାଇ ପାକିସ୍ତାନର ୩୦୮ ରନ୍ରୀ ବଡ ଲକ୍ଷ୍ୟ ହାସଲ କରିଥିଲା।
