ନୂଆଦିଲ୍ଲୀ,୨୧।୧୧: ଟି -୨୦ ବିଶ୍ୱକପ ୨୦୨୧ ଶେଷ ହୋଇଛି। ଏହାର କିଛି ଦିନ ପରେ ଇଂଲଣ୍ଡ କ୍ରିକେଟର ସାମ ବିଲିଙ୍ଗସ ତାଙ୍କ ଗର୍ଲଫ୍ରେଣ୍ଡ ସାରା କେଣ୍ଟଲିଙ୍କ ସହ ନିର୍ବନ୍ଧ ଶେଷ କରିଛନ୍ତି। ନ୍ୟୁଜିଲାଣ୍ଡ ବିପକ୍ଷରେ ଟି -୨୦ ବିଶ୍ୱକପର ସେମିଫାଇନାଲ ମ୍ୟାଚ ଖେଳିଥିବା ବିଲିଙ୍ଗସ ସମୁଦ୍ର ମଝିରେ ସାରାଙ୍କୁ ମୁଦି ପିନ୍ଧାଇଥିଲେ। ବିଲିଙ୍ଗ୍ସଙ୍କ ପ୍ରେମିକା ସାରା ଜଣେ ଟେନିସ ଖେଳାଳି। ସେ ତାଙ୍କ କ୍ୟାରିୟରରେ ଅନେକ ପୁରସ୍କାର ଜିତିଛନ୍ତି । ସେ ସାଇକୋଲୋଜିରେ ସ୍ନାତକ ମଧ୍ୟ କରିଛନ୍ତି। ସାମ ବିଲିଙ୍ଗସ ଏବଂ ସାରା କେଣ୍ଟଲି ମାଲଦ୍ୱୀପର ସମୁଦ୍ର କୂଳରେ ପରସ୍ପରକୁ ମୁଦି ପିନ୍ଧାଇଥିଲେ। ବିଲିଙ୍ଗସ ସୋସିଆଲ ମିଡିଆରେ କିଛି ଫଟୋ ଶେୟାର କରିଥିଲେ। ଫଟୋରେ ସାରା ହାତରେ ନିର୍ବନ୍ଧ ମୁଦି ଦେଇଥିବା ନଜର ଆସିଛନ୍ତି। ଏହା ସହିତ ସେ କ୍ୟାପସନ ଲେଖିଛନ୍ତି ଯେ ଆଗାମୀ ଶ୍ରୀମତୀ ବି। ମୁଁ ଦୁନିଆର ସବୁଠାରୁ ଭାଗ୍ୟବାନ ବ୍ୟକ୍ତି।
ଟି -୨୦ ବିଶ୍ୱକପରେ ବିଲିଙ୍ଗସ କେବଳ ଗୋଟିଏ ମ୍ୟାଚ ଖେଳିବାର ସୁଯୋଗ ପାଇଲେ। ତେବେ ସେ ନ୍ୟୁଜିଲାଣ୍ଡ ବିପକ୍ଷ ସେମିଫାଇନାଲ ମ୍ୟାଚରେ ବ୍ୟାଟିଂ କରିବାର ସୁଯୋଗ ପାଇ ନ ଥିଲେ।
ଟୁର୍ନାମେଣ୍ଟ ପୂର୍ବରୁ ଖେଳାଯାଇଥିବା ଦୁଇଟି ୱାର୍ମ ଅପ ମ୍ୟାଚରେ ସେ ନ୍ୟୁଜିଲାଣ୍ଡ ବିପକ୍ଷରେ ଅପରାଜିତ ୨୭ ସ୍କୋର କରିଥିବାବେଳେ ଭାରତ ବିପକ୍ଷରେ ବ୍ୟାଟିଂ କରିବାର ସୁଯୋଗ ପାଇ ନ ଥିଲେ। ବିଲିଙ୍ଗସ ଇଂଲଣ୍ଡ ପାଇଁ ୨୫ଟି ଦିନିକିଆ ଏବଂ ୩୩ଟି -୨୦ ଖେଳିଛନ୍ତି । ତାଙ୍କ ନାମରେ ୬୦୭ଟି ଦିନିକିଆ ରନ ଏବଂ ୪୧୭ଟି -୨୦ ରନ ଅଛି।
