ଭୁବନେଶ୍ୱର,୧୩।୧୧(ବ୍ୟୁରୋ): ଓଡ଼ିଶା କମ୍ପ୍ୟୁଟର ଆପ୍ଲିକେଶନ ସେଣ୍ଟର (ଓକାକ୍) ସିଇଓ ତଥା ରାଜ୍ୟ ଇଲେକ୍ଟ୍ରୋନିକ୍ସ ଆଣ୍ଡ୍ ଆଇଟି ବିଭାଗର ଅତିରିକ୍ତ ସଚିବ ମନୋଜ କୁମାର ପଟ୍ଟନାୟକଙ୍କ ହ୍ବାଟ୍ସଆପ୍ ହ୍ୟାକ୍ କରାଯିବା ଏବଂ ତାଙ୍କର ୫ଜଣ ସମ୍ପର୍କୀୟଙ୍କୁ ମେସେଜ୍ କରି ୭ ଲକ୍ଷ ଟଙ୍କା ନେଇଯାଇଥିବା ମାମଲାରେ କ୍ରାଇମ୍ବ୍ରାଞ୍ଚର ସାଇବର୍ ଥାନା ତଦନ୍ତ ଜାରି ରଖିଛି। ତେବେ ଟଙ୍କା ନେଇଥିବା ହ୍ୟାକର ଜଣକ ବାଙ୍ଗାଲୋରର ବୋଲି କ୍ରାଇମବ୍ରାଞ୍ଚ ତଦନ୍ତରୁ ଜାଣିବାକୁ ପାଇଛି। ଏଥିସହ ଉକ୍ତ ଟଙ୍କା ପର୍ଯ୍ୟାୟକ୍ରମେ ୩ଟି ବ୍ୟାଙ୍କକୁ ଯାଇଛି। ତେଣୁ ବ୍ୟାଙ୍କଗୁଡ଼ିକର ଶାଖା ମୁଖ୍ୟଙ୍କୁ କ୍ରାଇମ୍ବ୍ରାଞ୍ଚ ଚିଠି ଲେଖି ଆକାଉଣ୍ଟକୁ ଅଚଳ କରିଛି। ତେବେ ଖୁବଶ୍ରୀଘ୍ର ଏହି ମାମଲାରେ ତଦନ୍ତ ପାଇଁ କ୍ରାଇମବ୍ରାଞ୍ଚର ଏକ ଟିମ୍ ବାଙ୍ଗାଲୋର ଯିବ। ସମ୍ପୃକ୍ତ ହ୍ୟାକରଙ୍କ ଠିକଣା ଜଣାପଡିଛି, ଖୁବଶ୍ରୀଘ୍ର ସେ ଧରାପଡିବ ବୋଲି କ୍ରାଇମବ୍ରାଞ୍ଚ ଏଡିଜି ସଞ୍ଜୀବ ପଣ୍ଡା କହିଛନ୍ତି।
ସୂଚନା ଅନୁଯାୟୀ, ବୁଧବାର ଏକ ଅଜଣା ନମ୍ବରରୁ ମନୋଜଙ୍କ ଫୋନ୍କୁ ଏକ କଲ୍ ଆସିଥିଲା। ହେଲେ ୩୦ ସେକେଣ୍ଡ ଧରି କେହି କିଛି ନ କହିବାରୁ ସେ ଉକ୍ତ କଲ୍କୁ କାଟିଦେଇଥିଲେ। ପରେ ଜଣେ ସମ୍ପର୍କୀୟ ମନୋଜଙ୍କୁ ଫୋନ୍ କରି ତାଙ୍କ ନାମରେ କେହି ଜଣେ ଟଙ୍କା ମାଗୁଥିବା ଜଣାଇଥିଲେ। ହ୍ବାଟ୍ସଆପ୍ କଲ୍ କରୁଥିବା ବ୍ୟକ୍ତିଜଣକ ମନୋଜଙ୍କ ସ୍ବାସ୍ଥ୍ୟାବସ୍ଥା ଅତ୍ୟନ୍ତ ଖରାପ ରହିଥିବା ଜଣାଇ ଆର୍ଥିକ ସହାୟତା ଚାହିଁବାରୁ ସେ କିଛି ଟଙ୍କା ଦେଇଥିବା ଜଣାଇଥିଲେ। ପରେ ଆଉ କେତେଜଣ ସମ୍ପର୍କୀୟ ଫୋନ୍ କରି ଠକଙ୍କୁ ଟଙ୍କା ଦେଇଦେଇଥିବା ମନୋଜଙ୍କୁ କହିବାରୁ ତାଙ୍କ ହ୍ବାଟ୍ସଆପ୍ ହ୍ୟାକ୍ ହୋଇ ଟଙ୍କା ଠକେଇ କରାଯାଇଥିବା ସେ ଜାଣିବାକୁ ପାଇଥିଲେ। ଏନେଇ ଶହୀଦନଗର ଥାନାରେ ଅଭିଯୋଗ ପରେ କ୍ରାଇମ୍ବ୍ରାଞ୍ଚ ନିଜ ଆଡୁ ମାମଲା (ନଂ.୨୫/୨୧) ରୁଜୁ କରି ତଦନ୍ତ ଆରମ୍ଭ କରିଥିଲା।
