ରାଜନଗର,୨୧ା୬(ଭାସ୍କର ରାଉତରାୟ): କେନ୍ଦ୍ରାପଡ଼ା ରାଜନଗର ବ୍ଲକ ଚାନ୍ଦିବାଉଁଶମୂଳ ପଞ୍ଚାୟତ ହାତିଆଗଡ଼ି ଗାଁ ପୋଖରୀରେ ବୁଧବାର ବାସନ ମାଜୁଥିବା ବେଳେ ଜଣେ ମହିଳାଙ୍କୁ ଟାଣି ନେଇଛି କୁମ୍ଭୀର। ମହିଳା ଜଣଙ୍କ ହାତିଆଗଡ଼ି ଗାଁର ସୀତା ରାଣୀ ଦାସ । ଦଳ ଭର୍ତ୍ତି କେନାଲରୁ ତାଙ୍କର କ୍ଷତ ବିକ୍ଷତ ମୃତଦେହ ମିଳିଛି। ଆଜି ଅପରାହ୍ନରେ ରାଜନଗର ବ୍ଲକ ହାତୀଆଗଡ଼ି ଗାଁର ସୀତାରାଣୀ ତାଙ୍କ ବାଡ଼ି ପଛପଟ ପୋଖରୀ ତୁଠରେ ବାସନ ମାଜିବା ସମୟରେ ଏକ କୁମ୍ଭୀର ତାଙ୍କୁ ଟାଣି ନେଇଥିଲା। ଟାଣିନେଇ ଚଡ଼ଦିଆ କେନାଲ ମଧ୍ୟରେ ରଖିଥିଲା। ଘଟଣାସ୍ଥଳରେ ରାଜନଗର ବନବିଭାଗ ଓ ଅଗ୍ନିଶମ ବାହିନୀ ପହଞ୍ଚି ଜେସିବି ସାହାଯ୍ୟରେ କେନାଲରୁ ଦଳ ସଫା କରି ତାଙ୍କ ମୃତଦେହ ଉଦ୍ଧାର କରିଛି। କୁମ୍ଭୀର ମହିଳାଙ୍କୁ ଟାଣି ନେବା ଘଟଣାରେ ସ୍ଥାନୀୟ ଲୋକମାନେ ରାଜନଗର ଭିତରକନିକା ରାସ୍ତା ହାତିଆଗଡ଼ି ନିକଟରେ ଟାୟାର ଜାଳି ରାସ୍ତାରୋକୋ କରିଥିଲେ। ଯେପର୍ଯ୍ୟନ୍ତ ସମସ୍ୟାର ସମାଧାନ ହୋଇନାହିଁ ରାସ୍ତାରୁ ଉଠିବୁ ନାହିଁ ବୋଲି ଲୋକମାନେ କହିଥିଲେ। ତହସିଲଦାର ଘଟଣାସ୍ଥଳରେ ପହଞ୍ଚି ବୁଝାଶୁଝା କରିବା ପରେ ରାସ୍ତାରୋକୋ ହଟିଥିଲା।