ପଟ୍ଟାମୁଣ୍ଡାଇ,୧୧ା୯(କଳ୍ପତରୁ ନାୟକ): କେନ୍ଦ୍ରାପଡ଼ା ଜିଲା ପଟ୍ଟାମୁଣ୍ଡାଇ ଥାନା ନିକଟସ୍ଥ ନାଇଆଡିଆ ଗାଁ ଦେଇ ପ୍ରବାହିତ ବ୍ରାହ୍ମଣୀ ନଦୀରେ ରବିବାର ସନ୍ଧ୍ୟାରେ ଜଣେ ଧୀବର ମାଛ ଧରିବା ପାଇଁ ଜାଲ ଟାଣୁଥିବାବେଳେ ଏକ ୪ ଫୁଟ୍ ଲମ୍ବର କୁମ୍ଭୀର ପଡିଥିଲା। ବଡ ମାଛ ଭାବି ଡଙ୍ଗା ଦ୍ୱାରା ଧୀବର ନଦୀ କୂଳକୁ ଜାଲ ଆଣିବା ପରେ କୁମ୍ଭୀରଟି ସେଥିରେ ଫସି ରହିଥିବାର ଦେଖିଥିଲେ। ପରେ ଗ୍ରାମବାସୀ ରାଜନଗର ବନଖଣ୍ଡ ବିଭାଗକୁ ଖବର ଦେବା ପରେ ବନଖଣ୍ଡ ଅଧିକାରୀ କୁମ୍ଭୀରଟିକୁ ଉଦ୍ଧାର କରିଥିବା ରାଜନଗର ବନଖଣ୍ଡ ରେଞ୍ଜର ଚିତ୍ତରଞ୍ଜନ ବେଉରା କହିଛନ୍ତି। ଏଭଳି କୁମ୍ଭୀରକୁ ନେଇ ଗ୍ରାମବାସୀ ଭୟଭୀତ ହୋଇପଡିଛନ୍ତି। ସାମାଜିକ କର୍ମୀ ନରେନ୍ଦ୍ର ଧଳ କୁହନ୍ତି, କୁମ୍ଭୀର ଆତଙ୍କ ନେଇ ସ୍ଥାନୀୟ ଅଞ୍ଚଳରେ ଭୟର ବାତାବରଣ ଦେଖିବାକୁ ମିଳିଛି। ଏହି ବ୍ରାହ୍ମଣୀ ନଦୀରୁ ୨ ମାସ ଭିତରେ ୬ଜଣଙ୍କୁ ଟାଣି ନେଲାଣି ମଣିଷଖିଆ କୁମ୍ଭୀର। ଆଜି ଜାଲରେ ଧରା ପଡିଥିବା କୁମ୍ଭୀର ଛୋଟ ଥିଲେ ମଧ୍ୟ ତାର ମା’କୁମ୍ଭୀର ଥାଇପାରେ।
