ପାଟଣା,୧୭ା୩(ସ୍ବ.ପ୍ର.): କେନ୍ଦୁଝର ଜିଲା ପାଟଣା ବ୍ଲକ ଡ୍ରାଇଭର ସଂଘ ପକ୍ଷରୁ ଶୁକ୍ରବାର ଷ୍ଟିଅରିଂ ଛାଡ଼ ଆନ୍ଦୋଳନ ୩ୟ ଦିନରେ ପହଞ୍ଚିଛି। ଢେଙ୍କିକୋଟ ପାଟଣା ଦେଇଯାଇଥିବା ୨୨୦ ନମ୍ବର ରାଞ୍ଚି ବିଜୟଓ୍ବାଡା ଜାତୀୟ ରାଜପଥ ଉପରେ ମଙ୍ଗଳପୁର ନିକଟରେ ଡ୍ରାଇଭର ସଂଘ ବ୍ଲକ ସଭାପତି ସଞ୍ଜୟ ଭୂମିଜଙ୍କ ନେତୃତ୍ୱରେ ଆଜି ବି ଆନ୍ଦୋଳନ ଜାରି ରହିଛି। ଆନ୍ଦୋଳନର ତୃତୀୟ ଦିନରେ ଏହାର ପ୍ରଭାବ ସିଧାସଳଖ ଖାଉଟିମାନଙ୍କ ଉପରେ ପଡ଼ିଛି। ଅତ୍ୟାବଶକ ସାମଗ୍ରୀ ପରିବହନ କରୁଥିବା ଟ୍ରକ୍ଗୁଡିକ ଚାଲୁ ନ ଥିବାରୁ ଧିରେ ଧିରେ ବଜାରରେ ଆଳୁ ୧୦ ଟଙ୍କା, ପିଆଜ ୧୬ରୁ ୧୮, ଡାଲି ୧୧୮ରୁ ୧୨୦ରେ ପହଞ୍ଚିଛି। ପେଟ୍ରୋଲ,ଡିଜେଲ ଓ ଗ୍ୟାସ କଳାବଜାରରେ ଅଧିକ ଦରରେ ବିକ୍ରି ହେଉଛି। ନିତ୍ୟ ବ୍ୟବହାର୍ଯ୍ୟ ସାମଗ୍ରୀ ଆସି ପାରୁ ନ ଥିବାରୁ ମୁନାଫାଖୋର ବ୍ୟବସାୟୀମାନେ ଚଢ଼ା ଦରରେ ସାମଗ୍ରୀ ବିକ୍ରି କରୁଛନ୍ତି। ଏଣେ ବଜାରରୁ ଖାଦ୍ୟ ସାମଗ୍ରୀ ସହ ପେଟ୍ରୋଲ ସରିଯିବା ଆଶଙ୍କା କରି ଲୋକେ ଆବଶ୍ୟକତାଠାରୁ ଅଧିକ ପେଟ୍ରୋଲ ଭର୍ତ୍ତି କରି ରଖୁଥିବା ଓ ଖାଦ୍ୟ ସାମଗ୍ରୀ ମହଜୁଦ୍ ରଖୁଥିବାରୁ ବଜାରରେ କୃତ୍ରିମ ଦର ବୃଦ୍ଧି ଦେଖା ଦେଇଥିବା କୁହାଯାଉଛି। ପାଟଣା ମୁଖ୍ୟାଳୟରେ ଥିବା ପେଟ୍ରୋଲ ପମ୍ପ୍ରେ ନାହିଁ ନ ଥିବା ଭିଡ଼ ପରିଲକ୍ଷିତ ହୋଇଛି। ଲୋକମାନେ ଖାଉଟି ସାମଗ୍ରୀ ସରି ଯିବା ଭୟରେ ଅତ୍ୟାବଶ୍ୟକ ସାମଗ୍ରୀ ଆବଶ୍ୟକଠାରୁ ଅଧିକ କିଣି ମହଜୁଦ ରଖିବା ଆରମ୍ଭ କଲେଣି।
