ଭୁବନେଶ୍ୱର,୧୪।୪: ସମାଜର ମଙ୍ଗଳ ପାଇଁ ବିଭିନ୍ନ ଶିଳ୍ପ ସଂସ୍ଥା ମଧ୍ୟରେ ଏକ ପ୍ରକାର ତୀବ୍ର ପ୍ରତିଦ୍ବନ୍ଦ୍ୱିତା ଦେଖାଦେଇଛି। ଫଳରେ ବର୍ତ୍ତମାନ ଏକ ନୂଆ ଧାରା ଦେଖିବାକୁ ମିଳୁଛି, ବଡ କଥା ହେଉଛି ଏ ଦିଗରେ ମୋଟ ବଜେଟ ଦୁଇ ଗୁଣା ବୃଦ୍ଧି ହୋଇଛି। ୨୦୧୫ରେ ସିଏସ୍ଆର୍ ବାବଦରେ ପ୍ରାୟ୧୦ହଜାର କୋଟି ଟଙ୍କାର ବଜେଟ ପରିମାଣ ଧାର୍ଯ୍ୟ ହେଉଥିବା ବେଳେ ୨୦୧୯ରେ ତାହା ୧୯ହଜାର କୋଟିକୁ ବୃଦ୍ଧି ଘଟିଛି। ରାଜ୍ୟର ପ୍ରମୁଖ ଶିଳ୍ପସଂସ୍ଥାଗୁଡିକର ଏକ ରାଜ୍ୟସ୍ତରୀୟ ସିଏସଆର ସମ୍ମିଳନୀରୁ ଉକ୍ତ ସୂଚନା ସମ୍ପର୍କରେ ଜଣାପଡିଛି। ନିକଟରେ ଭର୍ଚୁଆଲ୍ ମୋଡ୍ରେ ଆୟୋଜିତ ହୋଇଥିବା ଉକ୍ତ ସମ୍ମିଳନୀ ‘ସାମାଜିକ କାର୍ଯ୍ୟକ୍ରମ କରିବା,ରାଜ୍ୟକୁ ପରିବର୍ତ୍ତନର ସ୍ରୋତରେ ଆଗେଇ ନେବା’ ଶୀର୍ଷକ ଆଲୋଚନାଚକ୍ରରେ ରାଜ୍ୟର ବିଶିଷ୍ଟ ବକ୍ତାମାନେ ନିଜ ନିଜର ମତ ଉପସ୍ଥାପନ କରିଥିଲେ।
ବେଦାନ୍ତ,ଜେଏସପିଏଲ,ଜେଏସଡବ୍ଲ୍ୟୁ, ଏମସିଏଲ, ହାଲ, ଆର୍ସେଲର ମିତ୍ତଲ, ହିଣ୍ଡାଲକୋ-ଉତ୍କଳ ଆଲୁମିନା, ଟିପିସିଓଡିଏଲ୍, ଡାଲମିଆ ସିମେଣ୍ଟ, ନାଲୋକ, ଫେକର, ଟାଟା ଷ୍ଟିଲ୍ ଭଳି ଅଗ୍ରଣୀ କମ୍ପାନୀର ବରିଷ୍ଠ ଅଧିକାରୀମାନେ ଉକ୍ତ ସମ୍ମିଳନୀରେ ସାମିଲ ଥିଲେ। ସେହିଭଳି ସିଆଇଆଇ, ୟୁସିସିଆଇ ଭଳି ଶିଳ୍ପସଂଘ ମଧ୍ୟ ସମ୍ମିଳନୀରେ ଅଂଶଗ୍ରହଣ କରିଥିଲେ।
ଏହି ଅବସରରେ ଅତିରିକ୍ତ ମୁଖ୍ୟ ଶାସନ ସଚିବ ସି.ଜେ.ଭେନୁଗୋପାଳ ମୁଖ୍ୟ ଅତିଥି ଭାବେ ଯୋଗ ଦେଇ ପରିବେଶ ସୁରକ୍ଷା ଓ ଜଳବାୟୁ ଏବଂ ସବୁଜ ଶକ୍ତି ଉପରେ ଗୁରୁତ୍ୱାରୋପ କରିଥିଲେ। ଅପରପକ୍ଷରେ କର୍ପୋରେଟ ଆଇକନ ତପନ ଚାନ୍ଦ ସ୍ବତନ୍ତ୍ର ଅତିଥି ଭାବେ ଯୋଗ ଦେଇ କହିଥିଲେ ସିଏସ୍ଆର୍ ଉପରେ ଆଇନଗତ ବ୍ୟବସ୍ଥା ପ୍ରଣୟନ ହେବା ଫଳରେ ଉକ୍ତ ବଜେଟ୍ ପରିମାଣ ଦ୍ୱିଗୁଣିତ ହୋଇପାରିଛି। ବିଶେଷକରି ଶିଳ୍ପପତିଙ୍କ ମଧ୍ୟରେ ପ୍ରତିଦ୍ବନ୍ଦ୍ୱିତା ବଢିଛି, ତେବେ ସିଏସଆରରେ ନୂଆ ଟ୍ରେଣ୍ଡ ଉପରେ ଆମକୁ ଅଧିକ ଫୋକସ ଦେବାକୁ ପଡିବ ବୋଲି ସେ କହିଛନ୍ତି। ସେହିଭଳି ସମସ୍ତ ଶିଳ୍ପ ସଂସ୍ଥା ସେମାନଙ୍କର ଫ୍ଲାଗସିପ୍ ସିଏସଆର ପ୍ରକଳ୍ପ ବିଷୟରେ ଏଥିରେ ଉପସ୍ଥାପନା କରିଥିଲେ।