ସିଂହପୁର,୨୦ା୭(ଡି.ଏନ୍.ଏ.): ଯାଜପୁର ଜିଲା ବିଞ୍ଝାରପୁର ଜଳସମ୍ପଦ ବିଭାଗ ଅନ୍ତର୍ଗତ ଖରସ୍ରୋତା ନଦୀବନ୍ଧ ପ୍ରସସ୍ତିକରଣ କାର୍ଯ୍ୟ ଚାଲିଛି। ଏହି ନଦୀବନ୍ଧରେ ଠିକାଦାର ପକାଉଥିବା ମାଟି ଦୂରରୁ ନ ଆଣି ନଦୀବନ୍ଧ ପରଠାରୁ ମାଟି ଆଣୁଥିବାରୁ ନଦୀବନ୍ଧ ପ୍ରତି ବିପଦ ସୃଷ୍ଟି ହେଉଛି। ଏ ସମ୍ପର୍କରେ ସ୍ଥାନୀୟ ଲୋକେ ବିଭାଗୀୟ ଅଧିକାରୀଙ୍କୁ ଜଣାଇଥିଲେ ମଧ୍ୟ ଏଥିପ୍ରତି କୌଣସି ପଦକ୍ଷେପ ନିଆଯାଇ ନାହିଁ। ଅନ୍ୟପକ୍ଷରେ ଓଳେଇ ଚନ୍ଦନପୁର ଗ୍ରାମ ନିକଟରେ ପ୍ରଶସ୍ତିକରଣ କାର୍ଯ୍ୟରେ ନଦୀବନ୍ଧକୁ କାଟିଥିଲେ ମଧ୍ୟ ସେହି ସ୍ଥାନରେ କାର୍ଯ୍ୟ କରାଯାଉ ନ ଥିବାରୁ ନଦୀବନ୍ଧଟି ମୁକୁଳା ପଡ଼ିଛି। ଗତ କିଛିଦିନ ହେଲା ବର୍ଷା ଲାଗି ରହିଥିବାରୁ ନଦୀର ଜଳସ୍ତର ମଧ୍ୟ ବୃଦ୍ଧି ପାଇଛି। ଲଗାତର ବର୍ଷା ଜାରି ରହିଲେ ନଦୀରେ ବନ୍ୟାଜଳ ପ୍ରବେଶ କରି ବନ୍ଧ ପ୍ରତି ବିପଦ ସୃଷ୍ଟି କରିବ। ଫଳରେ ନଦୀକୂଳିଆ ଲୋକେ ଭୟଭୀତ ହୋଇପଡ଼ିଛନ୍ତି। ଠିକାଦାରଙ୍କ ଏପରି ବେପରୁଆ ମନଭାବ କାର୍ଯ୍ୟ ଲୋକମାନଙ୍କ ପାଇଁ କାଳ ସାଜିଛି। ଏଥିପ୍ରତି ଜଳ ସମ୍ପଦ ବିଭାଗର ନିର୍ବାହୀ ଯନ୍ତ୍ରୀ ଓ ଉଚ୍ଚ କର୍ତ୍ତୃପକ୍ଷ ଦୃଷ୍ଟି ଦେବାକୁ ଲୋକେ ଦାବି କରିଛନ୍ତି।
