ନୂଆଦିଲ୍ଲୀ,୭।୧: ଆଜି (ଜାନୁଆରୀ ୭) ମଙ୍ଗଳବାର ଦିଲ୍ଲୀ ବିଧାନସଭା ନିର୍ବାଚନର ତାରିଖ ଘୋଷଣା କରାଯିବ। ସୂଚନାନୁସାରେ, ଗୋଟିଏ ପର୍ଯ୍ୟାୟରେ ଦିଲ୍ଲୀରେ ନିର୍ବାଚନ ହେବାର ସମ୍ଭାବନା ରହିଛି। ନିର୍ବାଚନ ଆୟୋଗର ଯୋଜନା ଅନୁଯାୟୀ ଫେବୃଆରୀ ଦ୍ୱିତୀୟ ସପ୍ତାହରେ ଭୋଟ ଗ୍ରହଣ କରାଯାଇପାରେ ଏବଂ ଫଳାଫଳ ଫେବୃଆରୀ ୧୭ରେ ଘୋଷଣା ହେବାର ସମ୍ଭାବନା ରହିଛି। ମଙ୍ଗଳବାର ଅପରାହ୍ନ ୨ ଟାରେ ନିର୍ବାଚନ ଆୟୋଗଙ୍କ ଦ୍ୱାରା ଏକ ସାମ୍ବାଦିକ ସମ୍ମିଳନୀ ଆୟୋଜିତ ହେବ ଯେଉଁଥିରେ ଆଗାମୀ ନିର୍ବାଚନ ପ୍ରକ୍ରିୟା ଏବଂ ଆନୁଷଙ୍ଗିକ ଦିଗ ବିଷୟରେ ବିସ୍ତୃତ ସୂଚନା ଦିଆଯିବ।
ସୋମବାର (ଜାନୁଆରୀ ୬) ଦିନ ଦିଲ୍ଲୀ ବିଧାନସଭା ନିର୍ବାଚନ ପାଇଁ ନିର୍ବାଚନ କମିଶନ ଅନ୍ତିମ ଭୋଟର ତାଲିକା ପ୍ରକାଶ କରିଛି। ଏହି ତାଲିକାରେ ମୋଟ ୧ କୋଟି ୫୫ ଲକ୍ଷ ୨୪ ହଜାର ୮୫୮ ଭୋଟର ପଞ୍ଜିକୃତ ହୋଇଛନ୍ତି। ଏଥିମଧ୍ୟରୁ ୮୪ ଲକ୍ଷ ୪୯ ହଜାର ୬୪୫ ପୁରୁଷ ଭୋଟର ହୋଇଥିବାବେଳେ ୭୧ ଲକ୍ଷ ୭୩ ହଜାର ୯୫୨ ମହିଳା ଭୋଟର ଅଟନ୍ତି।
ଦିଲ୍ଲୀ ବିଧାନସଭାର କାର୍ଯ୍ୟକାଳ ୧୫ ଫେବୃଆରୀ ୨୦୨୫ରେ ଶେଷ ହେବାକୁ ଯାଉଛି। ଗତ ବିଧାନସଭା ନିର୍ବାଚନ ବିଷୟରେ କହିବାକୁ ଗଲେ, ୨୦୨୦ରେ ମଧ୍ୟ ଫେବୃଆରୀ ମାସରେ ଦିଲ୍ଲୀରେ ନିର୍ବାଚନ ଅନୁଷ୍ଠିତ ହୋଇଥିଲା। ସେହି ନିର୍ବାଚନରେ ଆମ ଆଦମୀ ପାର୍ଟି ବିଜୟୀ ହୋଇ ସରକାର ଗଠନ କରିଥିଲା। ବର୍ତ୍ତମାନ କାର୍ଯ୍ୟକାଳର ଶେଷ ତାରିଖ ପାଖେଇ ଆସୁଥିବାରୁ ଦିଲ୍ଲୀରେ ଆଗାମୀ ନିର୍ବାଚନ ପାଇଁ ପ୍ରସ୍ତୁତି ଜୋରଦାର ହେଉଛି।
