ଲାଠୋର, ୩୧।୧(ଡି.ଏନ.ଏ.): ଅଗ୍ରିମ ଟଙ୍କା ନେଇ ୨୦୨୦ ନଭେମ୍ବରରେ ତେଲଙ୍ଗାନାକୁ ସ୍ତ୍ରୀଙ୍କ ସହ ଦାଦନ ଖଟିବାକୁ ଯାଇଥିଲେ ବଲାଙ୍ଗୀର ଜିଲା ତୁରେକେଲା ବ୍ଲକ ଡେବରିଆମୁଣ୍ଡା ଗ୍ରାମର ସ୍ବର୍ଣ୍ଣ ଶବର(୪୫)। ତେଲଙ୍ଗାନାର ଜଗତଲ ଜିଲା ମାଟିପୁଲି ଗ୍ରାମର ସମ୍ପଦ ଗୌଡଙ୍କ ଇଟାଭାଟିରେ ସେ କାମ କରୁଥିଲେ । ହେଲେ ସେଠାରେ ହଠାତ୍ ଅସୁସ୍ଥ ହୋଇପଡିଲେ। ଉପଯୁକ୍ତ ଚିକିତ୍ସା ନ ମିଳିବାରୁ ଦିନକୁ ଦିନ ତାଙ୍କ ସ୍ବାସ୍ଥ୍ୟବସ୍ଥା ଗୁରୁତର ହେଲା । ଭାଟି ମାଲିକ ସ୍ବର୍ଣ୍ଣଙ୍କ ଚିକିତ୍ସା ପାଇଁ କୌଣସି ଦାୟିତ୍ୱ ନ ନେଇ ସ୍ତ୍ରୀ ମିନାବତୀଙ୍କ ସହ ସ୍ବର୍ଣ୍ଣଙ୍କୁ ଘରକୁ ପଠାଇବା ବ୍ୟବସ୍ଥା କଲେ। ହେଲେ ସ୍ବର୍ଣ୍ଣଙ୍କ ୧୮ବର୍ଷୀୟା ଝିଅ କୁମାରୀଙ୍କୁ ଆଣି ଇଟାଭାଟିରେ ଛାଡିବା ପରେ ତୁମେ ଦୁହେଁ ଘରକୁ ଯାଇପାରିବ ବୋଲି ସେ ସର୍ତ୍ତ ରଖିଲେ। ମାଲିକଙ୍କ ନିର୍ଦ୍ଦେଶକ୍ରମେ ସର୍ଦ୍ଦାର କବି ମେହେର ସ୍ବର୍ଣ୍ଣ ଓ ମିନାବତୀ ବଲାଙ୍ଗୀରରେ ପହଞ୍ଚିବା ପୂର୍ବରୁ ଜାନୁୟାରୀ ୧୩ରେ କୁମାରୀଙ୍କୁ ନେଇ ଇଟାଭାଟିରେ ଛାଡି ଆସିଲେ। ଏବେ କୁମାରୀ ସେହି ଇଟା ଭାଟିରେ କାମ କରୁଛନ୍ତି। ମା’ବାପା ନେଇଥିବା ଅଗ୍ରିମ ଟଙ୍କା ସେ ଦିନରାତି ପରିଶ୍ରମ କରି ଭରଣା କରୁଛନ୍ତି। ଏଣେ ଗାଁରେ ପହଞ୍ଚତ୍ବା ପରେ ମିନାବତୀ ସ୍ବାମୀଙ୍କୁ ତୁରେକେଲା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଗତ ୨୬ତାରିଖରେ ଭର୍ତ୍ତି କରିଥିଲେ। ହେଲେ ୨୮ତାରିଖରେ ସେ ଆଖି ବୁଜିଲେ ା ଝିଅ କୁମାରୀ ତେଲଙ୍ଗାନାରେ ରହିଥିବା ବେଳେ ମୀନାବତୀ ଅନ୍ୟ ୨ ପିଲାଙ୍କୁ ଧରି ଗାଁରେ ରହିଛନ୍ତି। ଅନ୍ୟ କୌଣସି ଉପାୟ ତାଙ୍କ ପାଖରେ ନାହିଁ ା କେବଳ ଲୁହ ଢ଼ାଳିବା ଛଡ଼ା ସେ ଆଉ କିଛି କରିପାରିବେ ନାହିଁ ବୋଲି କହିଛନ୍ତି ା ସ୍ବାମୀଙ୍କ ଶୁଦ୍ଧିକ୍ରିୟା କରିବାକୁ ତାଙ୍କ ପାଖରେ ଟଙ୍କା ନାହିଁ। ଏପରି ପରିସ୍ଥିତିରେ କୁମାରୀଙ୍କୁ ସେଠାରୁ ଫେରାଇ ଆଣିବା ସହ ଶ୍ରମିକମାନଙ୍କ ପାଇଁ ରହିଥିବା ସରକାରୀ ସହାୟତା ଯୋଗାଇ ଦେବାକୁ ସ୍ବର୍ଣ୍ଣଙ୍କ ପରିବାରବର୍ଗ ନିବେଦନ କରିଛନ୍ତି।