ରସୁଲପୁର,୨୬ା୧୨(ଡି.ଏନ.ଏ.):ରସୁଲପୁର ବ୍ଲକ ଅଧୀନ ଓଡ଼ିଶୋ ପଞ୍ଚାୟତ ମାନପୁର ଗାଁର ପରିବା ବ୍ୟବସାୟୀ ନାରାୟଣ ପଣ୍ଡାଙ୍କ ଝିଅ ସଂଘମିତ୍ରା ପଣ୍ଡା ଉତ୍କଳ ବିଶ୍ୱବିଦ୍ୟାଳୟ ଟପ୍ପର ହୋଇଛନ୍ତି। ସେ ବିଶ୍ୱବିଦ୍ୟାଳୟରେ ଓଡ଼ିଆ ଭାଷା ସାହିତ୍ୟ ବିଷୟ ସ୍ନାତକୋତ୍ତର ପରୀକ୍ଷାରେ ଶ୍ରେଷ୍ଠ ସ୍ଥାନ ଅଧିକାର କରି ସ୍ବର୍ଣ୍ଣପଦକ ହାସଲ କରିଛନ୍ତି। ବିଶ୍ୱବିଦ୍ୟାଳୟ ତରଫରୁ ଆୟୋଜିତ ଏକ ସମାବର୍ତ୍ତନ ଉତ୍ସବରେ ସେ ରାଜ୍ୟପାଳ ପ୍ରଫେସର ଗଣେଶୀ ଲାଲଙ୍କଠାରୁ ପଦକ ସହ ପ୍ରମାଣପତ୍ର ହାସଲ କରିଛନ୍ତି। ଏଥିସହ ତାଙ୍କର ଚୟସ ବେସଡ୍ କ୍ରେଡିଟ୍ ସିଷ୍ଟମ ଜରିଆରେ କରାଯାଇଥିବା ର଼୍ୟାକିଂରେ ତାଙ୍କୁ ଭକ୍ତକବି ମଧୁସୂଦନ ରାଓ ମେମୋରିଆଲ ସଂସ୍ଥା ପକ୍ଷରୁ ଆଉ ଏକ ସ୍ବର୍ଣ୍ଣ ପଦକ ପ୍ରଦାନ କରାଯାଇ ସମ୍ମାନିତ କରାଯାଇଛି।
ସଂଘମିତ୍ରା ଦୁଇଟି ଲେଖାଏ ସ୍ବର୍ଣ୍ଣପଦକ ଜିଣି ଅଞ୍ଚଳ ପାଇଁ ଗୌରବ ଆଣି ଦେଇଛନ୍ତି। ସଫଳତା ଖବର ଜାଣି ତାଙ୍କ ନିକଟକୁ ବିଭିନ୍ନ ମହଲରୁ ଶୁଭେଚ୍ଛାର ସୁଅ ଛୁଟିବାରେ ଲାଗିଛି। ସେ ଅଖ୍ୟାତ ପଲ୍ଲୀ ମାନପୁରରେ ଜନ୍ମଗ୍ରହଣ କରିଥିଲେ। ବାପାଙ୍କ ସ୍ବଳ୍ପ ରୋଜଗା ଯୋଗୁ ଘରୋଇ ବିଦ୍ୟାଳୟରେ ପାଠ ନ ପଢି, ସରକାରୀ ସ୍କୁଲରୁ ପାଠପଢା ଆରମ୍ଭ କରିଥିଲେ। ଗାଁର ସ୍ବପ୍ନେଶ୍ୱର ସରକାରୀ ଉଚ୍ଚ ବିଦ୍ୟାଳୟ ଓ ମଧୁପୁର କଲେଜ-କଲଣରେ ଡିଗ୍ରୀ ହାସଲ କରିଥିଲେ। ଓଡ଼ିଆ ଭାଷା ସାହିତ୍ୟରେ ସ୍ନାତକୋତ୍ତର ପାଇଁ ସେ ଉତ୍କଳ ବିଶ୍ୱବିଦ୍ୟାଳୟରେ ନାମ ଲେଖାଇଥିଲେ। ୨୩ ଡିସେମ୍ବର, ୨୦୨୨ରେ ସ୍ନାତକୋତ୍ତର ପରୀକ୍ଷାଫଳ ପ୍ରକାଶ ପାଇଥିଲା। ସେଥିରେ ବିଶ୍ୱବିଦ୍ୟାଳୟ ଟପ୍ପର ହୋଇଛନ୍ତି ବୋଲି ଜାଣି ଖୁସି ହୋଇଥିଲେ। ମାତ୍ର ତାଙ୍କ ମା’ ସତ୍ୟଭାମା ପଣ୍ଡାଙ୍କ ଅକାଳ ବିୟୋଗ ତାଙ୍କୁ ମର୍ମାହତ କରିଥିଲା। ମା’ଙ୍କ ସ୍ବାସ୍ଥ୍ୟ ଅବସ୍ଥା ଖରାପ ଯୋଗୁ ସେ ୨ବର୍ଷ ତଳେ ଆରପାରିକୁ ଚାଲିଯାଇଛନ୍ତି। ସେ ଥିଲେ ଝିଅର ସଫଳତାକୁ ଦେଖି ଖୁସି ହୋଇଥାନ୍ତେ। କିନ୍ତୁ ସେହି ସୌଭାଗ୍ୟ ତାଙ୍କ ପାଖରେ ନାହିଁ। ହେଲେ ବାପାଙ୍କ ସମର୍ଥନ, ପ୍ରେରଣା ତାଙ୍କୁ ସଫଳତା ଆଣି ଦେଇଛି ବୋଲି ସଂଘମିତ୍ରା ପ୍ରକାଶ କରିଛନ୍ତି। ସେ କଲେଜର ସହକାରୀ ପ୍ରଫେସର ଭାବେ ନିଯୁକ୍ତି ପାଇଁ ଏନ୍ଇଟି (ନ୍ୟାଶନାଲ ଏଲିଜିବିଲିଟି ଟେଷ୍ଟ) ପରୀକ୍ଷାରେ କୃତକାର୍ଯ୍ୟ ହୋଇଛନ୍ତି। ଏବେ ପିଏଚ୍ଡି ପାଇଁ ପଢ଼ାପଢ଼ି କରୁଛନ୍ତି। ସେ ଅଧ୍ୟାପନା ଦିଗରେ କାର୍ଯ୍ୟ କରିବେ। ଜ୍ଞାନର ବାର୍ତ୍ତାବାହକ ହେବେ ବୋଲି ଇଚ୍ଛା ରଖିଛନ୍ତି। ତେବେ ଆଗକୁ କ’ଣ ହେବ ତାକୁ କେହି ଦେଖି ନାହାନ୍ତି। ସମସ୍ତେ ଭଲ ହିଁ ଆଶା କରନ୍ତି ବୋଲି ସଂଘମିତ୍ରାଙ୍କ ସହ ବାର୍ତ୍ତାଳପ ସମୟରେ ସେ କହିଛନ୍ତି।
