କୋଲକାତା, ୨୧ା୧୦ (ପି.ଟି.)- ଆସନ୍ତାବର୍ଷ ପ୍ରଥମ ଭାଗରେ ଇଂଲଣ୍ଡର ଭାରତ ଟୁର୍ ବେଳେ ଅହମ୍ମଦାବାଦରେ ଦିବାରାତ୍ର ପିଙ୍କ୍ ବଲ ଟେଷ୍ଟ ଖେଳାଯିବ। ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ସଭାପତି ସୌରଭ ଗାଙ୍ଗୁଲି ଏଠାରେ ପ୍ରକାଶ କରିଛନ୍ତି। ଇଂଲଣ୍ଡ କ୍ରିକେଟ ଦଳ ଜାନୁୟାରୀରୁ ମାର୍ଚ୍ଚ ପର୍ଯ୍ୟନ୍ତ ଭାରତ ଟୁର୍ କରିବ। ଦଳ ୫ଟି ଟେଷ୍ଟ ଏବଂ ଏକ ସୀମିତ ଓଭର ସିରିଜ ଖେଳିବ। କୋଲକାତା ପ୍ରେସ୍ କ୍ଲବଠାରେ ସିପିଆଇ (ଏମ୍) ବିଧାୟକ ଆଲୋକ ଭଟ୍ଟାଚାର୍ଯ୍ୟଙ୍କ ଦ୍ୱାରା ଲିଖିତ ପୁସ୍ତକର ଉନ୍ମୋଚନ ଅବସରରେ ଗାଙ୍ଗୁଲି ଏକଥା କହିଛନ୍ତି। ବିଗତ କିଛି ଦିନ ହେଲା ଭାରତରେ କୋଭିଡ୍ ସଂକ୍ରମିତଙ୍କ ସଂଖ୍ୟା ବୃଦ୍ଧି ପାଇବାରେ ଲାଗିଥିବାରୁ ସିରିଜକୁ ସଂଯୁକ୍ତ ଆରବ ଏମିରେଟ୍ସ (ୟୁଏଇ) କୁୁ ସ୍ଥାନାନ୍ତର କରାଯାଇ ପାରେ। ୟୁଏଇରେ ବର୍ତ୍ତମାନ ଆଇପିଏଲ୍ ୨୦୨୦ ଚାଲିଛି। ବିସିସିଆଇ କିନ୍ତୁ ଦେଶରେ ଇଂଲଣ୍ଡ ଟୁର୍ ଆୟୋଜନ କରିବା ଲାଗି ଦୃଢମନା ରହିଛି। ଜୈବ ସୁରକ୍ଷିତ ବବଲ ସୃଷ୍ଟିକରିବା ସମେତ ସମସ୍ତ ପ୍ରକାର ସମ୍ଭାବ୍ୟ ବିକଳ୍ପ ବ୍ୟବସ୍ଥା ସମ୍ପର୍କରେ ବିଚାର କରି ଦେଖୁଛି। ଟେଷ୍ଟ ସିରିଜ ପାଇଁ ଅହମ୍ମଦାବାଦ, ଧର୍ମଶାଳା ଓ କୋଲକାତାକୁ ଭେନ୍ୟୁ ଭାବେ ମନୋନୀତ କରାଯାଇଛି। ଆହୁରି ୪ ମାସ ସମୟ ରହିଥିବାରୁ ଏ ନେଇ କୌଣସି ଚୂଡ଼ାନ୍ତ ନିଷ୍ପତ୍ତି ନିଆଯାଇ ପାରି ନ ଥିବା ଗାଙ୍ଗୁଲି କହିଛନ୍ତି। ଇଂଲଣ୍ଡ ବିପକ୍ଷ ଘରୋଇ ସିରିଜ ପୂର୍ବରୁ ଆମର ଅଷ୍ଟ୍ରେଲିଆ ଟୁର୍ ରହିଛି। ତେଣୁ ଏହାକୁ ଆମେ ଅଗ୍ରାଧିକାର ଦେଉଛୁ। ଏଥିପାଇଁ ଦଳ ଚୟନ କିଛି ଦିନ ମଧ୍ୟରେ ହେବ ବୋଲି ବିସିସିଆଇ ସଭାପତି କହିଛନ୍ତି।