ବ୍ରହ୍ମଗିରି,୧୮।୧(ଡି.ଏନ୍.ଏ.): ଚିଲିକାରେ ପର୍ଯ୍ୟଟକଙ୍କ ଆକର୍ଷଣର କେନ୍ଦ୍ରବିନ୍ଦୁ ପାଲଟିଥିବା ଇର୍ୱାଡି ଡଲ୍ଫିନର ଗଣନା ରବିବାର କରାଯାଇଥିଲା। ବନ ବିଭାଗ ଓ ଚିଲିକା ଉନ୍ନୟନ କର୍ତ୍ତୃପକ୍ଷ(ସିଡିଏ)ଙ୍କ ମିଳିତ ଉଦ୍ୟମରେ ଗୋଟିଏ ଦିନରେ ଗଣନା କାର୍ଯ୍ୟ ସରିଥିଲେ ମଧ୍ୟ ଫଳାଫଳ ଅଘୋଷିତ ରହିଛି। ଇର୍ୱାଡି ଡଲ୍ଫିନ ପାଇଁ ଚିଲିକା ପର୍ଯ୍ୟଟନ ମାନଚିତ୍ରରେ ସ୍ବତନ୍ତ୍ର ସ୍ଥାନ ହାସଲ କରିଛି। ଏହି ବିରଳ ଡଲ୍ଫିନଙ୍କ ସୁରକ୍ଷା ପାଇଁ ସରକାର ଗୁରୁତ୍ୱ ଦେବା ସହ ବିଭିନ୍ନ ପଦକ୍ଷେପ ଗ୍ରହଣ କରୁଛନ୍ତି। ପ୍ରତିବର୍ଷ ଏମାନଙ୍କ ସ୍ଥିତି ସମ୍ପର୍କରେ ଜାଣିବା ପାଇଁ ଗଣନା କରାଯାଉଛି। ରବିବାର ସକାଳ ୬ଟା ୩୦ରୁ ଗଣନା ଆରମ୍ଭ ହୋଇ ମଧ୍ୟାହ୍ନ ୧୨ଟା ପର୍ଯ୍ୟନ୍ତ ଚାଲିଥିଲା। ଗଣନା କାର୍ଯ୍ୟରେ ବନ ବିଭାଗ କର୍ମଚାରୀ, ସିଡିଏ କର୍ମଚାରୀ, ସ୍ବେଚ୍ଛାସେବୀ ସଂଗଠନର ସଦସ୍ୟ, ଓୟୁଏଟିର ଛାତ୍ର ଓ ପରିବେଶବିତ୍ମାନେ ସାମିଲ ଥିଲେ। ଏମାନେ ୧୮ଟି ଦଳରେ ବିଭକ୍ତ ହୋଇ ଚିଲିକାର ନର୍ଦ୍ଦନ ସେକ୍ଟର, ସେଣ୍ଟ୍ରାଲ ସେକ୍ଟର ଓ ବାହ୍ୟ ନାଳି ଅଞ୍ଚଳକୁ ଯାଇ ଗଣନା କରିଥିଲେ। ଟ୍ରାନ୍ସେକ୍ଟ ସର୍ଭେ ମେଥଡ୍ରେ ଜିପିଏସ୍, ବାଇନା କୁଲାର, ରେଞ୍ଜ ଫାଇଣ୍ଡର ମାଧ୍ୟମରେ ଡଲ୍ଫିନର ଗତିବିଧି ଅନୁଧ୍ୟାନ କରାଯାଇ ଗଣନା ହୋଇଥିଲା। କିନ୍ତୁ ଘନକୁହୁଡି ଯୋଗୁ ଗଣନା କାର୍ଯ୍ୟ ବାଧାପ୍ରାପ୍ତ ହୋଇଥିବା ଗଣନାକାରୀ ଦଳର ସଦସ୍ୟମାନେ କହିଛନ୍ତି। ବାଲୁଗାଁ ରେଞ୍ଜ୍ରୁ ୧୦ ଗଣନାକାରୀ ଦଳ ନର୍ଦ୍ଦନ ସେକ୍ଟର, ସେଣ୍ଟ୍ରାଲ ସେକ୍ଟର କାଳିଜାଇ, ନଳବଣ, ନଇରି ଆଦି ଅଞ୍ଚଳ ଓ ସାତପଡ଼ା ରେଞ୍ଜ୍ରୁ ୮ଟି ଦଳ ନର୍ଦ୍ଦନ ସେକ୍ଟରର ଗୋଟିଏ ଚ୍ୟାନେଲ ଓ ବାହ୍ୟ ଚିଲିକା ଅଞ୍ଚଳ ଯାଇ ଗଣନା କରିଥିଲେ। ସମସ୍ତ ଗଣନା କାର୍ଯ୍ୟ ସରିଥିଲେ ମଧ୍ୟ ୨ଟି ରେଞ୍ଜର ଗଣତି ସଂଖ୍ୟାକୁ ମିଶାଇ ପରବର୍ତ୍ତୀ ସମୟରେ ଏହାର ଫଳାଫଳ ଘୋଷଣା କରାଯିବ ବୋଲି ବନ ବିଭାଗ ସୂତ୍ରରୁ ଜଣାପଡିଛି।
ଗତବର୍ଷ ଚିଲିକାରେ ଡଲଫିନ ସଂଖ୍ୟା ୧୫୬ ରହିଥିଲା। କିନ୍ତୁ ଶୁକ୍ରବାର ଚିଲିକା ଉନ୍ନୟନ କର୍ତ୍ତୃପକ୍ଷଙ୍କ କରାଯାଇଥିବା ସର୍ବେକ୍ଷଣ ରିପୋର୍ଟରେ ସର୍ବେକ୍ଷଣକାରୀ ଦଳ ସେହିଦିନ ଚିଲିକାରେ ୧୫୬ ଡଲ୍ଫିନ ଦେଖିଥିବା ରିପୋର୍ଟ ଦେଇଥିଲେ। ହେଲେ ରବିବାର ଗଣନା ସମୟରେ ଚିଲିକାରେ ଏହି ସଂଖ୍ୟ କେତେ ରହିଛି ଚୂଡ଼ାନ୍ତ ରିପୋର୍ଟ ଘୋଷଣା ପରେ ସ୍ପଷ୍ଟ ହେବ। ଏହି ଗଣନାକାରୀ ଦଳରେ ସିଡିଏର ଏସିଏଫ୍ ବିନୋଦ ଆଚାର୍ଯ୍ୟ, ଡବ୍ଲ୍ୟୁଡବ୍ଲ୍ୟୁଏଫ୍ର ମାଇକେଲ ପିଟର, ବିଶ୍ୱଜିତ ପରିଡ଼ା, ମନୋଜ ଦାସ, ମିନାକୁମାରୀ ନାୟକ, ରୋଟାରୀ ଶ୍ରୀକ୍ଷେତ୍ର ପୁରୀର ସଦସ୍ୟମାନେ ଉପସ୍ଥିତ ଥିଲେ।