ଭୁବନେଶ୍ୱର,୨୦।୬(ବ୍ୟୁରୋ): ଟେଲି ଅଭିନେତ୍ରୀ ରଶ୍ମିରେଖା ଓଝା ଆତ୍ମହତ୍ୟା କରିଛନ୍ତି। ଏହା ସ୍ପଷ୍ଟ ଭାବେ ଜଣାପଡୁଥିବା ଭୁବନେଶ୍ୱର ଡିସିପି ପ୍ରତୀକ ସିଂହ ଏକ ଖବରଦାତା ସମ୍ମିଳନୀରେ କହିଛନ୍ତି ।
ଏହାସହ ଡିସିପି କହିଛନ୍ତି ଯେ, ଘଟଣାସ୍ଥଳକୁ ପୋଲିସର ଏକ ଟିମ ଯାଇ ତଦନ୍ତ କରିଛି । ସେଠାରୁ ଏକ ହାତଲେଖା ଚିଠି ଓ ଲାପ୍ଟପ୍ ମିଳିଛି । ରଶ୍ମିରେଖା ଡିପ୍ରେଶନରେ ରହୁଥିବା ପରି ଜଣାପଡୁଛି। ପୋଲିସ ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ପଠାଯାଇଛି । ରିପୋର୍ଟ ଆସିବା ମୃତ୍ୟୁର କାରଣ ଆହୁରି ସ୍ପଷ୍ଟ ହେବ ବୋଲି ସେ କହିଛନ୍ତି। ଅନ୍ୟପକ୍ଷେ ମୃତଦେହରେ କୌଣସି କ୍ଷତାକ୍ତ ଚିହ୍ନ ନ ଥିବା ସେ କହିଛନ୍ତି।
ଅନ୍ୟପଟେ ରଶ୍ମିଙ୍କ ମୃତ୍ୟୁ ପାଇଁ ସନ୍ତୋଷ ପାତ୍ର ନାମକ ଜଣେ ଯୁବକଙ୍କୁ ପରିବାର ଲୋକେ ଦାୟୀ କରିଛନ୍ତି। ଘଟଣାର ତଦନ୍ତ କରି ଅଭିଯୁକ୍ତଙ୍କୁ ଉପଯୁକ୍ତ ଦଣ୍ଡ ଦେବାକୁ ଦାବି କରିଛନ୍ତି । ପରିବାର ଲୋକେ କହିଛନ୍ତି, ଘର ମାଲିକଙ୍କ କହିବା ଅନୁସାରେ ରଶ୍ମି ଜଣେ ଯୁବକଙ୍କ ସହିତ ରହୁଥିଲା । ଉଭୟେ ବିବାହ କରିଥିଲେ। କିନ୍ତୁ ଏ ଖବର ଆମ ପାଖରେ ନ ଥିଲା ।