ମହାକାଳପଡ଼ା,୧୫ା୧୦(ଡି.ଏନ.ଏ.): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଜମ୍ବୁ ଗଁାରେ ସ୍ତ୍ରୀଙ୍କ ପରକୀୟା ପ୍ରୀତିକୁ ସନ୍ଦେହ କରିବାରୁ ଗତ ୧୧ ତାରିଖ ରାତିରେ ସ୍ବାମୀଙ୍କୁ ହତ୍ୟା କରାଯାଇଥିବା ନେଇ ଅଭିଯୋଗ ହୋଇଥିଲା। ମୃତ ଯୁବକଙ୍କ ବାପା ଏ ନେଇ ଗତ ୧୨ ତାରିଖରେ ଜମ୍ବୁ ସାମୁଦ୍ରିକ ଥାନାରେ ଲିଖିତ ଅଭିଯୋଗ କରିଥିଲେ। ଅଭିଯୋଗ ଅନୁଯାୟୀ, ଶ୍ୱଶୁର ଘର ଲୋକ ମିଳିମିଶି ପୁଅକୁ ମାରି ପାଟିରେ ବିଷ ପିଆଇ ଆତ୍ମହତ୍ୟାର ନଁା ଦେବାକୁ ଚେଷ୍ଟା କରିଥିଲେ। ପରିବାର ଲୋକଙ୍କୁ ନ ଜଣାଇ ଯୁବକଙ୍କ ମୃତଦେହ କେନ୍ଦ୍ରାପଡ଼ା ଜିଲା ମୁଖ୍ୟ ଚିକିତ୍ସାଳୟରେ ଶ୍ୱଶୁର ଘର ଲୋକେ ବ୍ୟବଚ୍ଛେଦ କରାଇ ଆଣି ଘରେ ପହଞ୍ଚାଇଥିଲେ। ମୃତକଙ୍କ ପରିବାରକୁ ନ୍ୟାୟ ଦାବିରେ ସ୍ଥାନୀୟ ମହିଳାମାନେ ରାସ୍ତା ଅବରୋଧ କରିବା ସହ ମୃତଦେହକୁ ୩ ଦିନ ଧରି ପକାଇ ରଖିଥିଲେ। ଶୁକ୍ରବାର ପୋଲିସ ପହଞ୍ଚତ୍ ଉତ୍ତ୍ୟକ୍ତ ଲୋକଙ୍କୁ ବୁଝାଶୁଝା କରି ଅଭିଯୁକ୍ତଙ୍କୁ ଗିରଫ କରିବାର ପ୍ରତିଶ୍ରୁତି ଦେବା ପରେ ଅପରାହ୍ନରେ ମୃତଦେହ ସଂସ୍କାର ହୋଇଛି।
ସୂଚନାଯୋଗ୍ୟ, ମୃତ ଯୁବକ ନିଜ ଗଁା ନିକଟ ଜଣେ ଯୁବତୀଙ୍କୁ ୨୦୧୬ରେ ପ୍ରେମ ବିବାହ କରିଥିଲେ। ତାଙ୍କର ଦୁଇ ସନ୍ତାନ ଅଛନ୍ତି। ତେବେ ସ୍ତ୍ରୀ ଅନ୍ୟ ଜଣେ ପୁରୁଷ ବନ୍ଧୁଙ୍କ ସହ ଫୋନ୍ରେ କଥା ହେଉଥିବା ନେଇ ଯୁବକ ଜଣକ ସନ୍ଦେହ କରିଥିଲେ। ପରେ ଉଭୟଙ୍କ ମଧ୍ୟରେ ମନାନ୍ତର ହୋଇ ଯୁବକଙ୍କୁ ହତ୍ୟା କରାଯାଇଥିବା ଅଭିଯୋଗ ହୋଇଛି। ସ୍ଥାନୀୟ ମହିଳାମାନେ ମୃତ ଯୁବକଙ୍କ ପରିବାରକୁ ନ୍ୟାୟ ଦାବିରେ ୨ଦିନ ଧରି ଜମ୍ବୁ ଗଁାର ଫେରିଘାଟ, ବଜାର ଓ ମୁଖ୍ୟରାସ୍ତାକୁ ଅବରୋଧ କରି ରଖିଥିଲେ। ଫଳରେ ୨ ଦିନ ଧରି ଜମ୍ବୁ ଅଞ୍ଚଳରେ ଯାତାୟାତ ବାଧାପ୍ରାପ୍ତ ହୋଇଥିଲା। ୩ ଦିନ ଧରି ଯୁବକଙ୍କ ମୃତଦେହ ଘର ସମ୍ମୁଖରେ ପଡ଼ି ରହିଥିବାରୁ ସଂସ୍କାର ଲାଗି ପୋଲିସ ସ୍ଥାନୀୟ ଲୋକଙ୍କ ସହ ଆଲୋଚନା କରିଥିଲା। ମୃତଦେହ ଦୁର୍ଗନ୍ଧ ଯୋଗୁ ଘଟଣାସ୍ଥଳରେ ରହିବା ସମ୍ଭବ ହୋଇ ନ ଥିଲା। ମହିଳାମାନଙ୍କ କହିବା କଥା, ହତ୍ୟାକାରୀଙ୍କୁ ଗିରଫ ନ କରିବା ପର୍ଯ୍ୟନ୍ତ ଧାରଣା ଜାରି ରହିବ। ଏହାପରେ ପୋଲିସ ଯୁବକଙ୍କ ଶ୍ୱଶୁର ଘରର ୨ ଜଣଙ୍କୁ ଅଟକ ରଖି ପଚରାଉଚରା କରୁଥିବା କହିଥିଲା। ଏହି ଘଟଣାରେ ସମ୍ପୃକ୍ତ ବ୍ୟକ୍ତିମାନଙ୍କୁ ଆଇନ ଅନୁସାରେ ତଦନ୍ତ ପରିସରକୁ ନେବାକୁ ପୋଲିସ ପ୍ରତିଶ୍ରୁତି ଦେବା ପରେ ସ୍ଥାନୀୟ ଲୋକେ ମୃତଦେହକୁ ସଂସ୍କାର ପାଇଁ ଛାଡ଼ିଥିଲେ। ଏ ସମ୍ପର୍କରେ ଥାନା ଅଧିକାରୀ ପରେଶ କୁମାର ମହାନ୍ତିଙ୍କୁ ପଚାରିବାରେ ଯୁବକଙ୍କ ମୃତଦେହ ସଂସ୍କାର ଶେଷ ହୋଇଛି। ଆଇନ ଅନୁସାରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଛନ୍ତି।