ଭୁବନେଶ୍ୱର, ୧୫।୬, ସତ୍ୟଜିତ୍ ରାଉତ: ଭୁବନେଶ୍ୱର ମଞ୍ଚେଶ୍ୱର ଥାନା ସାମ୍ନାରେ ବୁଧବାର ଜଣେ ଯୁବକଙ୍କ ସନ୍ଦେହଜନକ ଅବସ୍ଥାରେ ମୃତ୍ୟୁ ହୋଇଛି। ଥାନା ନିକଟରୁ ପ୍ରାୟ ୩୦ ମିଟର ଦୂର ରାସ୍ତା କଡ଼ରେ ଥିବା ଏକ ଝୁମ୍ପୁଡ଼ି ଘର ଭିତରୁ ପୋଲିସ ମୃତଦେହ ଜବତ କରି କ୍ୟାପିଟାଲ ହସ୍ପିଟାଲ ପଠାଇଛି। ତେବେ ମୃତ ଯୁବକଙ୍କ ପରିଚୟ ମିଳି ନ ଥିବାରୁ ପୋଲିସ ଅଡ଼ୁଆରେ ପଡ଼ିଛି। ଯୁବକଙ୍କ ମୁହଁରୁ ରକ୍ତ ଝରୁଥିବା ଦେଖିବାକୁ ମିଳିଛି। ଏହି ରକ୍ତ ତାଙ୍କ ନାକରୁ ଝରୁଥିବା କୁହାଯାଉଛି। ତେବେ କେଉଁ ପରିସ୍ଥିତିରେ ଯୁବକଙ୍କ ମୃତ୍ୟୁ ହୋଇଛି ତାହା ଜଣାପଡ଼ିନାହିଁ। ଗୁରୁବାର ମୃତଦେହର ବ୍ୟବଚ୍ଛେଦ ହେବ, ଏହାର ରିପୋର୍ଟ ଆସିବା ପରେ ମୃତ୍ୟୁର କାରଣ ଜଣାପଡ଼ିବ ବୋଲି ପୋଲିସ ପକ୍ଷରୁ କୁହାଯାଇଛି। ଏ ସଂକ୍ରାନ୍ତରେ ପୋଲିସ ଏକ ଅପମୃତ୍ୟୁ ମାମଲା ରୁଜୁ କରି ତଦନ୍ତ ଆରମ୍ଭ କରିଛି। ଅନ୍ୟପକ୍ଷରେ ମୃତଦେହ ମିଳିଥିବା ସ୍ଥାନକୁ ପୋଲିସ ସିଲ୍ କରି ନିଷିଦ୍ଧାଞ୍ଚଳ ବୋଲି ଘୋଷଣା କରିଛି। ଗୁରୁବାର ସକାଳେ ସେଠାରେ ସାଇଣ୍ଟିଫିକ୍ ଟିମ୍ ପହଞ୍ଚତ୍ ନମୁନା ସଂଗ୍ରହ କରିବ ବୋଲି ପୋଲିସ ପକ୍ଷରୁ କୁହାଯାଇଛି। ମୃତବ୍ୟକ୍ତିଜଣକ କୌଣସି ଗାଡିର କର୍ମଚାରୀ ହୋଇଥିବା ସନ୍ଦେହ କରାଯାଉଛି।
ସୂଚନା ଅନୁଯାୟୀ, ଥାନା ନିକଟରେ ଟ୍ରକ୍ ପାର୍କିଂ କରୁଥିବା ଡ୍ରାଇଭର ଓ ହେଲ୍ପର୍ମାନେ ରାସ୍ତା କଡ଼ରେ ଏକ ଅସ୍ଥାୟୀ ଝୁମ୍ପୁଡ଼ି ଘର ନିର୍ମାଣ କରିଛନ୍ତି। ସେଠାରେ ବହୁ ସମୟରେ ଡ୍ରାଇଭର ଓ ହେଲ୍ପରମାନେ ବିଶ୍ରାମ କରିବା ସହ ଖଟି ମଧ୍ୟ କରନ୍ତି। ତେବେ ଉକ୍ତ ଘରେ ଏକ ପ୍ଲାଇ ଓ ବାଉଁଶ ଦ୍ୱାରା ହୋଇଥିବା ଅସ୍ଥାୟୀ ଟେବୁଲ ଉପରେ ଯୁବକ ଜଣଙ୍କ ଶୋଇଥିବା ସା ସମୟରେ ସ୍ଥାନୀୟ ଅଞ୍ଚଳର ଲୋକମାନେ ଦେଖିବାକୁ ପାଇଥିଲେ। ଯୁବକ ଜଣଙ୍କ ଏକ ଫୁଲ୍ ସ୍ପୋଟର୍ସ ପ୍ୟାଣ୍ଟ ପିନ୍ଧିଥିବା ବେଳେ ମୁଣ୍ଡ ତଳେ ଏକ ଗାମୁଛା ଥିଲା। ଏଥିସହ ଏକ ନାଲି ବ୍ୟାନିଅନ୍ ତାଙ୍କ ମୁଣ୍ଡ ଉପରେ ଘୋଡ଼ା ହୋଇଥିଲା। ଲୋକମାନେ ତାଙ୍କୁ ଡାକିବାରୁ ସେ ଶୁଣି ନ ଥିଲେ। ତେଣୁ ଯୁବକଙ୍କ ମୃତ୍ୟୁ ହୋଇଥିବା ସନ୍ଦେହ କରି ସେମାନେ ଥାନାକୁ ଖବର ଦେଇଥିଲେ। ପୋଲିସ ପହଞ୍ଚତ୍ ମୃତଦେହ ଜବତ କରି ହସ୍ପିଟାଲ ପଠାଇଥିଲା। ତେବେ ମୃତଦେହ ମିଳିଥିବା ସ୍ଥାନରେ ମଦ ବୋତଲ ଓ ପାଣି ବୋତଲ ଆଦି ପଡ଼ିଥିବାରୁ ଏହାକୁ ନେଇ ଅଧିକ ଚର୍ଚ୍ଚା ସୃଷ୍ଟି ହୋଇଛି। ଏପରିକି ସେଠାରେ ଅସାମାଜିକ ଯୁବକମାନେ ମଦ୍ୟପାନ କରୁଥିବା ସ୍ଥାନୀୟ ଲୋକେ କହିଛନ୍ତି। ତେଣୁ କୌଣସି କାରଣକୁ ନେଇ ସମ୍ପୃକ୍ତ ଯୁବକଙ୍କ ମୁହଁକୁ କପଡ଼ାରେ ଭିଡ଼ି ହତ୍ୟା କରାଯାଇଥିବା ମଧ୍ୟ ସନ୍ଦେହ କରାଯାଉଛି। ଏପଟେ ଯୁବକଙ୍କ ପରିଚୟ ପାଇବା ପାଇଁ ପୋଲିସ ସ୍ଥାନୀୟ ଅଞ୍ଚଳରେ ପଚରାଉଚରା ଜାରି ରଖିଛି।