କୋରାପୁଟ,୮ା୧୧(ଅମିତାଭ ବେହେରା): କୋରାପୁଟ ସହରର ଏକ ଘର ଭିତରୁ ଜଣେ ମନ୍ଦିର ପୂଜକଙ୍କ ହାତଗୋଡ଼ ବନ୍ଧା ଅବସ୍ଥାରେ ମୃତଦେହ ଜବତ ଘଟଣା ସହରରେ ଚାଞ୍ଚଲ୍ୟ ଖେଳାଇ ଦେଇଛି। କୋରାପୁଟ ସହରରଟାଉନ ଥାନା ଅଧୀନ ବାଟମଙ୍ଗଳା ଛକନିକଟସ୍ଥ ବୁଢ଼ୀ ଠାକୁରାଣୀ ମନ୍ଦିର ପଛପଟେ ଥିବା ଏକ ଘର ଭିତରୁ ମୃତଦେହ ଉଦ୍ଧାର କରିଛି କୋରାପୁଟ ପୋଲିସ। ତେବେ ଘରର ଆସବାବପତ୍ର ଏଣେତେଣେ ପଡ଼ିଥିବାରୁ
ଏହା ଏକ ହତ୍ୟାକାଣ୍ଡ ହୋଇପାରେ ବୋଲି ପୋଲିସ ସନ୍ଦେହ କରୁଥିବା ଅତିରିକ୍ତ ଏସ୍.ପି ବଳଭଦ୍ର ଦୀପ ସୂଚନା ଦେଇଛନ୍ତି।କୌଣସି ସୂତ୍ରରୁ ଖବର ପାଇ ଘଟଣାସ୍ଥଳକୁ ଡିଏସ୍ପି ସୁମିତ୍ରା ଜେନା, ଅତିରିକ୍ତ ଏସ୍ପି ବାଲଭଦ୍ର ଦୀପଙ୍କ ସହ କୋରାପୁଟ ଟାଉନ ଥାନା ପୋଲିସ ପହଞ୍ଚି ମୃତଦେହ ଉଦ୍ଧାର କରି ତଦନ୍ତ ଆରମ୍ଭ କରିଥିବା ବେଳେ ସନ୍ଦେହରେ ଅନେକଙ୍କୁ ପଚରାଉଚରା କରୁଛନ୍ତି। ହତ୍ୟା ପଛର କାରଣ କ’ଣ ହୋଇପାରେ, କିଏ ଓ କାହିଁକି ଏପରି ନିର୍ମମ ହତ୍ୟା କରିଛି ତାହା ସାଇଣ୍ଟିଫିକ୍ ଟିମ୍ର ସହାୟତାରେ ତଦନ୍ତ କରାଯିବ ବୋଲି ପୋଲିସ ସୂଚନା ଦେଇଛି।
ସୂଚନାନୁଯାୟୀ, ବାଟମଙ୍ଗଳା ଛକ ନିକଟସୁ ବୁଢ଼ୀ ଠାକୁରାଣୀ ମନ୍ଦିର ପୂଜକ ରମେଶ ଚନ୍ଦ୍ର ତ୍ରିପାଠୀଙ୍କ ମୃତଦେହ ତାଙ୍କ ଘରୁ ଉଦ୍ଧାର ହୋଇଛି। ତାଙ୍କର ହାତ ଓ ଗୋଡ଼କୁବନ୍ଧା ଯାଇଥିବା ବେଳେ ଅର୍ଦ୍ଧ ଲଗ୍ନ ଭାବେ ସେ ପଡ଼ି ରହିଥିଲେ। ଏହାସହ ଘରର ସାମଗ୍ରୀ ଏଣେତେଣେ ବିଛାଡ଼ି ହୋଇ ପଡ଼ିରହିଛି। ଏଣୁ ତାଙ୍କୁ କେହି ହତ୍ୟା କରିଥିବା ପ୍ରାଥମିକ ତଦନ୍ତରୁ ପୋଲିସ ସନ୍ଦେହ କରିଛି। ଘଟଣାସ୍ଥଳରେ ଡିଏସ୍ପି ସୁମିତ୍ରା, ଶ୍ରାବଣୀ ନାୟକ ଏବଂ ଟାଉନ ଓ ସଦର ଥାନା ଅଧିକାରୀ ଉପସ୍ଥିତ ରହି ସ୍ଥାନୀୟ ଲୋକଙ୍କୁ ପଚରାଉଚରା କରୁଛନ୍ତି। ମୃତ ତ୍ରିପାଠୀଙ୍କ କେହି ସମ୍ପର୍କୀୟ ଏଠାରେ ନ ଥିବାରୁ ପୋଲିସ ତାଙ୍କ ସମ୍ପର୍କରେ ଅଧିକ ତଥ୍ୟ ସଂଗ୍ରହ କରିପାରି ନ ଥିବା ଜଣାଯାଇଛି।