ଦିଗପହଣ୍ଡି,୪ା୧୧(ଡି.ଏନ୍.ଏ.): ଗଞ୍ଜାମ ଜିଲା ଦିଗପହଣ୍ଡି ବ୍ଲକ ଖମାରି ଗାଁ ନିକଟ ଘୋଡ଼ାହାଡ଼ ଡ୍ୟାମକୁ ମାଛ ଧରିବାକୁ ଯାଇଥିବା ଜଣେ ଧୀବର ରବିବାରଠାରୁ ନିଖୋଜ ଥିଲେ। ତେବେ ବୁଧବାର ଅପରାହ୍ନରେ ତାଙ୍କ ମୃତଦେହ ଘୋଡ଼ାହାଡ଼ ଡ୍ୟାମ୍ରୁ ଉଦ୍ଧାର କରାଯାଇଛି। ମୃତକ ଜଣକ ହେଲେ ବାଲିଘାଇ ଗ୍ରାମର ଭାଲୁ ଓରଫ ରାଜେନ୍ଦ୍ର ବେହେରା। ତାଙ୍କ ମୃତଦେହ ବ୍ୟବଚ୍ଛେଦ ନିମନ୍ତେ ବ୍ରହ୍ମପୁର ବଡ଼ଡାକ୍ତରଖାନାକୁ ପଠାଯାଇଛି।
ସୂଚନାଯୋଗ୍ୟ, ରବିବାରଠାରୁ ରାଜେନ୍ଦ୍ର ମାଛ ଧରିବାକୁ ଡ୍ୟାମ୍କୁ ଯାଇଥିଲେ। ମଙ୍ଗଳବାର ସେ ଘରକୁ ଫେରିବେ ବୋଲି ପରିବାର ଲୋକଙ୍କୁ କହିଥିଲେ। ତେବେ ମଙ୍ଗଳବାର ସା ସୁଦ୍ଧା ନ ଫେରିବାରୁ ପରିବାର ଲୋକେ ଗ୍ରାମବାସୀଙ୍କ ସହାୟତାରେ ଖୋଜାଖୋଜି କରିଥିଲେ ମଧ୍ୟ ତାଙ୍କ ସନ୍ଧାନ ମିଳି ନ ଥିଲା। ବୁଧବାର ଗ୍ରାମର ଅନ୍ୟ କିଛି ଧୀବର ମାଛ ଧରିବାକୁ ଡ୍ୟାମ୍କୁ ଯାଇଥିବା ବେଳେ ରାଜେନ୍ଦ୍ରଙ୍କ ଡଙ୍ଗା ସହ ମୃତଦେହ ପାଣିରେ ଭାସୁଥିବା ଦେଖିଥିଲେ। ଏନେଇ ରାଜେନ୍ଦ୍ରଙ୍କ ଭାଇ ଗୋପୀନାଥ ବେହେରା କେ. ନୂଆଗାଁ ଥାନାକୁ ଜଣାଇଥିଲେ। ସ୍ଥାନୀୟ ସରପଞ୍ଚ କେ. ସନ୍ତୋଷ କୁମାର ପାତ୍ର ଏବଂ ପୋଲିସ କର୍ମଚାରୀଙ୍କ ଉପସ୍ଥିତିରେ ମୃତଦେହ ଉଦ୍ଧାର କରାଯାଇଥିବା ଜଣାପଡ଼ିଛି। ରାଜେନ୍ଦ୍ର ଜଣେ ଗରିବ ଅସହାୟ ବ୍ୟକ୍ତି ହୋଇଥିବାରୁ ତାଙ୍କ ପରିବାର ଲୋକଙ୍କୁ ସରକାରୀ ସହାୟତା ଯୋଗାଇ ଦେବାକୁ ସରପଞ୍ଚ ଦାବି କରିଛନ୍ତି।