କଲମ୍ବୋ, ୬ା୭ (ପି.ଟି.)- ବିବାଦୀୟ ଜାତୀୟ ଚୁକ୍ତିରେ ତୁରନ୍ତ ସ୍ବାକ୍ଷର କରିବା ଲାଗି ଶ୍ରୀଲଙ୍କା କ୍ରିକେଟ (ଏସ୍ଏଲ୍ସି) ଏହାର କ୍ରିକେଟରମାନଙ୍କୁ ନିର୍ଦ୍ଦେଶ ଦେଇଛି। ଏଥିପାଇଁ ସମୟସୀମା ଜୁଲାଇ ୮ ରଖାଯାଇଛି। ଯେଉଁମାନେ ଏହାର ଖିଲାପ କରିବେ, ଜୁଲାଇ ୧୩ରୁ ଭାରତ ବିପକ୍ଷରେ ଆରମ୍ଭ ହେବାକୁଥିବା ଘରୋଇ ସିରିଜ ପାଇଁ ଦଳ ଚୟନ ବେଳେ ସେମାନଙ୍କ ନାମ ବିଚାରକୁ ନିଆଯିବ ନାହିଁ। ଖେଳାଳିମାନେ ଇଂଲଣ୍ଡ ଟୁର୍ ଶେଷ କରି ମଙ୍ଗଳବାର ସ୍ବଦେଶ ପ୍ରତ୍ୟାବର୍ତ୍ତନ କରିଛନ୍ତି। ଅନ୍ୟପକ୍ଷରେ ଚୟନକର୍ତ୍ତାମାନେ ବାମହାତୀ ବ୍ୟାଟ୍ସମ୍ୟାନ ଭାନୁକା ରାଜପାକ୍ସେଙ୍କୁ ଦଳକୁ ଫେରାଇ ଆଣିବା ଲାଗି ନିଷ୍ପତ୍ତି ନେଇଛନ୍ତି। ସୂଚନାଯୋଗ୍ୟ, ଚୁକ୍ତି ସର୍ତ୍ତାବଳୀ ଭଙ୍ଗ କରିଥିବା ଅଭିଯୋଗରେ ରାଜପାକ୍ସେଙ୍କୁ ୨ବର୍ଷ ସସ୍ପେଣ୍ଡ ସହ ୫୦୦୦ ଡଲାର ଜରିମାନା ହୋଇଛି। ପୁନଶ୍ଚ ରାଜପାକ୍ସେ ମ୍ୟାନେଜମେଣ୍ଟର ଫିଟ୍ନେସ ସର୍ତ୍ତାବଳୀ ପୂରଣ କରିପାରି ନ ଥିଲେ। ଇଂଲଣ୍ଡ ଟୁର୍ ପୂର୍ବରୁ ଚୁକ୍ତିରେ ସ୍ବାକ୍ଷର ପାଇଁ ସମୟ ସୀମା ଜୁନ୍ ୩ତାରିଖ ରଖାଯାଇଥିଲା। ମାତ୍ର ଚୁକ୍ତି ପାଇଁ ଚୟନପ୍ରକ୍ରିୟାରେ ସ୍ବଚ୍ଛତା ପ୍ରଶ୍ନ ଉଠାଇ ଖେଳାଳିମାନେ ଏଥିରେ ସ୍ବାକ୍ଷର କରି ନ ଥିଲେ। ଅନ୍ୟପକ୍ଷରେ ଚୁକ୍ତିରେ ସ୍ବାକ୍ଷର ନ କରିବା ଦ୍ୱାରା ପ୍ରଶାସନ ଯଦି ସେମାନଙ୍କୁ ପାରିଶ୍ରମିକ ନ ଦିଏ ତଥାପି ସେମାନେ ଦେଶ ପାଇଁ ଖେଳିବା ଲାଗି ଇଚ୍ଛୁକ ବୋଲି କହିଥିଲେ।
