ଭୁବନେଶ୍ୱର(ସ୍ପୋଟର୍ସ ବ୍ୟୁରୋ)/କଟକ ଅଫିସ,୨୫ା୯:
ସୁନାମଧନ୍ୟ ଜାତୀୟ ସ୍ତରୀୟ ଫୁଟବଲ ରେଫରି, ପୂର୍ବତନ ଖେଳାଳି ତଥା ଇଷ୍ଟକୋଷ୍ଟ ରେଲୱେ ଦଳର କୋଚ୍ ଶିବପ୍ରସାଦ ଦାସଙ୍କ ଭୁବନେଶ୍ୱରର ଏକ ଘରୋଇ ହସ୍ପିଟାଲରେ ଗୁରୁବାର ପରଲୋକ ଘଟିଛି। ମୃତ୍ୟୁ ବେଳକୁ ତାଙ୍କୁ ୫୦ବର୍ଷ ବୟସ ହୋଇଥିଲା। ଫୁଟବଲ ସହିତ ତାଙ୍କର ସମ୍ପୂର୍ଣ୍ଣ ପରିବାର ନିବିଡ଼ ଭାବେ ଜଡ଼ିତ। ପିତା ଭଗବାନ ପ୍ରସାଦ ଦାସ ମଧ୍ୟ ଜଣେ ରେଫରି ଥିଲେ। ଏହାଛଡ଼ା ଶିବପ୍ରସାଦଙ୍କ ପୁଅ ଦିଗବିଜୟ ଦାସ ଏବେ ରେଫରି ଦାୟିତ୍ୱ ତୁଲାଉଛନ୍ତି। ରାଜ୍ୟ ଫୁଟବଲ କ୍ରୀଡ଼ା ଜଣେ ଦକ୍ଷ କୋଚ୍ ଓ ସଙ୍ଗଠକଙ୍କୁ ହରାଇଲା ବୋଲି ଫୁଟବଲ ଆସୋସିଏଶନ ଅଫ ଓଡ଼ିଶା(ଫାଓ)ର ସମ୍ପାଦକ ଆଶୀର୍ବାଦ ବେହେରା କହିଛନ୍ତି। ଫାଓ ପକ୍ଷରୁ ଶୋକ ପ୍ରକାଶ କରାଯାଇଛି ।
ଶିବପ୍ରସାଦଙ୍କ ଅକାଳ ବିୟୋଗରେ ୟୁନିଟ-୬ ଆଥଲେଟିକ ଆସୋସିଏଶନ ପକ୍ଷରୁ ଗଭୀର ଶୋକ ବ୍ୟକ୍ତ କରାଯାଇଛି। ଆସୋସିଏଶନ ସଭାପତି ତପନ ମହାନ୍ତିଙ୍କ ସଭାପତିତ୍ୱରେ ଅନୁଷ୍ଠିତ ଏକ ଜରୁରୀ ବୈଠକରେ ସମ୍ପାଦକ ଦିଲୀପ ଦାସ ଶିବପ୍ରସାଦଙ୍କ ସ୍ମୃତି ଚାରଣ କରି ଆସୋସିଏଶନର ଫୁଟବଲ ପ୍ରଚାର ପ୍ରସାର ଅନ୍ତର୍ଗତ ପ୍ରତିଟି କାର୍ଯ୍ୟକ୍ରମରେ ଜଡିତ ରହୁଥିଲେ ବୋଲି କହିଥିଲେ। ଉପସଭାପତି ପ୍ରଫୁଲ ମିଶ୍ର ଟାଟା-ଉତ୍କଳିକା ସର୍ବଭାରତୀୟ ଫୁଟବଲ ଟୁର୍ନାମେଣ୍ଟ ଆରମ୍ଭ ବେଳେ ଶିବଙ୍କ ସୁନ୍ଦର ମ୍ୟାଚ ପରିଚାଳନା କଥା ମନେ ପକାଇ ତାଙ୍କ ମୃତ୍ୟୁରେ ଦୁଃଖପ୍ରକାଶ କରିଥିଲେ l ଅନ୍ୟତମ ଉପସଭାପତି ନବରଞ୍ଜନ ପଟ୍ଟନାୟକ ଶିବଙ୍କୁ ଜଣେ ଦକ୍ଷ ସଂଗଠକ ବୋଲି କହିଥିଲେ l ବରିଷ୍ଠ ଉପସଭାପତି ଅକ୍ଷୟ ଦାସ ଶିବଙ୍କ ବିୟୋଗ ଦ୍ୱାରା ଓଡିଶା ଫୁଟବଲରେ ଏକ ଶୂନ୍ୟସ୍ଥାନ ସୃଷ୍ଟି ହେଲା ବୋଲି କହିଥିଲେ। ସଭାପତି ତପନ ମହାନ୍ତି ଶିବଙ୍କ ଅକାଳ ମୃତ୍ୟୁ ଯୋଗୁ ଓଡିଶା ଫୁଟବଲ ତଥା ୟୁନିଟ-୬ ଆଥଲେଟିକ ଆସୋସିଏଶନର ଅପୂରଣୀୟ କ୍ଷତି ହେଲା କହିଥିଲେ l ଶିବପ୍ରସାଦଙ୍କ ଅମର ଆତ୍ମାର ସଦଗତି କାମନା କରି ଦୁଇ ମିନିଟ ନୀରବ ପ୍ରାର୍ଥନା ସହିତ ଦିବଂଗତ ପରିବାରକୁ ଆସୋସିଏଶନ ପକ୍ଷରୁ ଗଭୀର ସମବେଦନା ଜ୍ଞାପନ କରାଯାଇଥିଲା। କାଯ୍ୟକାରୀ ସଭ୍ୟ ଗିରିଜା ଦାସ, ପ୍ରଦୀପ ଦାସ, ଚିତ୍ତରଞ୍ଜନ ପାତ୍ର ଓ ମହେଶ୍ୱର ସିଂ ଉପସ୍ଥିତ ରହି ଦାସଙ୍କ ସ୍ମୃତିଚାରଣ କରିଥିଲେ।