କଟକ,୧୧ା୮ (କାର୍ତ୍ତିକ ସାହୁ):କଟକ ମହାନଗର ନିଗମ(ସିଏମ୍ସି)ର ପ୍ରଥମ ମେୟର, ପୂର୍ବତନ ବିଧାୟିକା ତଥା ଭାଜପା ନେତ୍ରୀ ସୁଶ୍ରୀ ନିବେଦିତା ପ୍ରଧାନ(୬୦)ଙ୍କର ଗୁରୁବାର ପରଲୋକ ହୋଇଯାଇଛି। ସେ ଦୀର୍ଘଦିନ ଧରି ଅସୁସ୍ଥ ଥାଇ କଟକର ଏକ ଘରୋଇ ନର୍ସିଂହୋମ୍ରେ ଚିକିତ୍ସିତ ହେଉଥିଲେ। ସେ ନିମୋନିଆ ଏବଂ ସେପ୍ଟିସେମିୟା ରୋଗରେ ପୀଡ଼ିତ ଥିଲେ। ତାଙ୍କ ମରଶରୀରକୁ ଏକ ଶୋଭାଯାତ୍ରାରେ ମାତାମଠ, ମଣିସାହୁ ଛକ, ବକ୍ସିବଜାର, ଦରଘା ବଜାର, ଚୌଧୁରୀବଜାର ଦେଇ ସିଏମ୍ସି କାର୍ଯ୍ୟାଳୟ, ଝୋଲାସାହି, ନିମସାହି, ସେମିନାରୀ ଛକ, ହରିପୁର, ଦୋଳମୁଣ୍ଡାଇ, ସଙ୍ଗମ ଟକିଜ୍ ନିକଟସ୍ଥ ବାସଭବନକୁ ନିଆଯାଇଥିଲା। ସେଠାରୁ ଦୋଳମୁଣ୍ଡାଇ ଓ ବାଦାମବାଡ଼ି ଛକ ଦେଇ ଖାନ୍ନଗର ଶ୍ମଶାନକୁ ନିଆଯାଇଥିଲା। ସେଠାରେ ତାଙ୍କର ଶେଷକୃତ୍ୟ ସମ୍ପନ୍ନ ହୋଇଥିଲା। ଭାଇ ସତ୍ୟରଞ୍ଜନ ପ୍ରଧାନ ମୁଖାଗ୍ନି ଦେଇଥିଲେ। ମୃତ୍ୟୁଶଯ୍ୟା ନିକଟରେ ପରିବାର ସଦସ୍ୟ, ଆତ୍ମୀୟ ସ୍ବଜନଙ୍କ ସମେତ ବହୁ ଭାଜପା କର୍ମକର୍ତ୍ତା, ସ୍ଥାନୀୟ ମୁରବୀ ଓ ଲୋକପ୍ରତିନିଧି ଉପସ୍ଥିତ ଥିଲେ। ଭାଜପା କଟକ ନଗର ସଭାପତି ଲଲାଟେନ୍ଦୁ ବଡୁ ଗଭୀର ଶୋକ ବ୍ୟକ୍ତ କରିଛନ୍ତି।
୧୯୬୩ ଜୁଲାଇ ୭ରେ କଟକ ହରିପୁର ଅଞ୍ଚଳରେ ସେ ଜନ୍ମଗ୍ରହଣ କରିଥିଲେ। ତାଙ୍କ ବାପା କେନ୍ଦ୍ରାପଡ଼ାରେ ଚାକିରି କରୁଥିବାରୁ ସେଠାରେ ସେ ସ୍ନାତକ ପର୍ଯ୍ୟନ୍ତ ଶିକ୍ଷାଲାଭ କରିଥିଲେ। ଏହାପରେ କଟକରେ ବ୍ୟବସାୟ ସହିତ ସକ୍ରିୟ ରାଜନୀତିରେ ଅଂଶଗ୍ରହଣ କରିଥିଲେ। ୨୦୦୦ରୁ ୨୦୦୪ ପର୍ଯ୍ୟନ୍ତ ସେ କଟକ ସଦର ବିଧାୟିକା ଭାବେ କାର୍ଯ୍ୟ କରିଥିଲେ। ବିଧାୟିକା ପଦବୀରେ ଥାଇ ସେ ୨୦୦୩ରୁ ୨୦୦୮ ପର୍ଯ୍ୟନ୍ତ ସିଏମ୍ସି ମେୟର ଭାବେ କାର୍ଯ୍ୟ କରିଥିଲେ। ଆଜୀବନ ଅବିବାହିତ ଥିବା ଏହି ଦକ୍ଷ ନେତ୍ରୀ କୁନି ଅପା ଭାବେ ସମସ୍ତଙ୍କର ପ୍ରିୟଭାଜନ ହୋଇପାରିଥିଲେ। ତାଙ୍କର ପରିବାରରେ ଭଉଣୀ ସସ୍ମିତା ପ୍ରଧାନ, ମଧୁସ୍ମିତା ପ୍ରଧାନ ଓ ଭାଇ ସତ୍ୟରଞ୍ଜନ ପ୍ରଧାନ ଅଛନ୍ତି।