ତିର୍ତ୍ତୋଲ,୧ା୭(ଗୌରାଙ୍ଗ ସ୍ବାଇଁ): ଜଗତସିଂହପୁର ଜିଲା ତିର୍ତ୍ତୋଲ ବ୍ଲକ ଅନ୍ତର୍ଗତ ଦାମୋଦରପାଟଣାର ଆଦର୍ଶ ଶିକ୍ଷକ ସୁରେନ୍ଦ୍ର କୁମାର ମହାପାତ୍ରଙ୍କର ୭୮ ବର୍ଷ ବୟସରେ ପରଲୋକ ଘଟିଛି। ଶୁକ୍ରବାର ତାଙ୍କ ବାସଭବନରେ ପରଲୋକ ହୋଇଛି। ସେ ଏକାଧାରରେ ଜଣେ ଶିକ୍ଷକ, ନାଟ୍ୟକାର, ନିର୍ଦ୍ଦେଶକ ଏବଂ ଅଭିନେତା ଭାବରେ ନିଜର ସ୍ବତନ୍ତ୍ର ପରିଚୟ ସୃଷ୍ଟି କରିଥିଲେ। ଶିକ୍ଷକତାକୁ ପେସା କରିଥିଲେ ମଧ୍ୟ କଳା ପ୍ରତି ତାଙ୍କ ମନରେ ଥିଲା ଅହେତୁକ ଦୁର୍ବଳତା। ତାଙ୍କ ଚର୍ଚ୍ଚିତ ନାଟକଗୁଡ଼ିକ ମଧ୍ୟରେ‘କାହାକୁ କରିବି ପର, କିଏ ତୁମେ ବ୍ରାହ୍ମଣ, ନ କହିଲେ କୁଳ ଭାସିଯାଉଛି, ପୋଡ଼ା ବେଦୀ ଓ ଛ’ ମାଣ ଆଠ ଗୁଣ୍ଠ ନାଟକ ବେଶ୍ ସୁନାମ ଅର୍ଜନ କରିଥିଲା। ସେ ବିଭିନ୍ନ କଳା ଅନୁଷ୍ଠାନ ସହ ଜଡ଼ିତ ଥିଲେ। ମୃତ୍ୟୁଶଯ୍ୟା ନିକଟରେ ତାଙ୍କ ପୁଅ, ବୋହୂ, ଝିଅ, ଜ୍ୱାଇଁ, ନାତି,ନାତୁଣୀ ଉପସ୍ଥିତଥିବା ବେଳେ ଗାଁ ଶ୍ମଶାନରେ ଶେଷକୃତ୍ୟ ସମ୍ପନ୍ନ ହୋଇଥିଲା। ତାଙ୍କର ଜ୍ୟେଷ୍ଠପୁତ୍ର ତଥା ଦୈନିକ ଖବରକାଗଜ ‘ଧରିତ୍ରୀ’ର ସହ-ସମ୍ପାଦକ ଶୁଭ୍ରପ୍ରକାଶ ମହାପାତ୍ର ମୁଖାଗ୍ନି ଦେଇଥିଲେ।