ବଇଣ୍ଡା,୮ା୭(ଡି.ଏନ.ଏ) କଟକ-ସମ୍ବଲପୁର ୫୫ ନମ୍ବର ଜାତୀୟ ରାଜପଥ ନିର୍ମାଣ ପାଇଁ ହୋଇଥିବା ଅସ୍ଥାୟୀ ରାସ୍ତା ଗୁଡିକ ଏବେ ମରଣଯନ୍ତା ପାଲଟିଛି। ମରାମତି ହେଉ ନ ଥିବା ଯୋଗୁ ଯାତାୟାତରେ ସମ୍ପୂର୍ଣ୍ଣ ବ୍ୟାଘାତ ସୃଷ୍ଟି ହେଉଛି। ଏ ନେଇ ଗୁରୁବାର ବଇଣ୍ଡା ଗ୍ରାମବାସୀ ଅନୁଗୋଳ ଜିଲାପାଳଙ୍କୁ ଏକ ଦାବିପତ୍ର ପ୍ରଦାନ କରିଛନ୍ତି।
ଗ୍ରାମବାସୀ ଦର୍ଶାଇଛନ୍ତି, କଟକ-ସମ୍ବଲପୁର ୫୫ ନମ୍ବର ଜାତୀୟ ରାଜପଥ ୪ ଲେନ ହେଉଛି। ହେଲେ ବଇଣ୍ଡା ଠାରେ ନିର୍ମାଣରେ ବିଳମ୍ବ ହେଉଥିବାବେଳେ ଠିକାସଂସ୍ଥା ପକ୍ଷରୁ ହୋଇଥିବା ଅସ୍ଥାୟୀ ରାସ୍ତାଗୁଡ଼ିକ ଏବେ ମରଣଯନ୍ତା ପାଲଟିଛି। ବିଶେଷକରି ବଇଣ୍ଡା ଛକ, ଆନନ୍ଦମୁଣ୍ଡାଠାରେ ବଡବଡ ଗର୍ତ୍ତ ସୃଷ୍ଟି ହୋଇଛି। ଫଳରେ ଗାଡି ଯାତାୟାତରେ ଅସୁବିଧା ସୃଷ୍ଟି ହେଉଥିବାବେଳେ ପ୍ରତ୍ୟେକ ଦିନ ଏହି ଖାଲରେ ପଡି ବାଇକ ଆରୋହୀମାନେ ଗୁରୁତର ହେଉଛନ୍ତି। ଏହି ଜାତୀୟ ରାଜପଥରେ ପ୍ରତ୍ୟେକ ଦିନ ବହୁ ଭାରୀଯାନ ଚଳାଚଳ କରୁଥିବା ବେଳେ ଅସ୍ଥାୟୀ ରାସ୍ତା ଶୋଚନୀୟ ହୋଇପଡୁଛି। ସେହିପରି ବଇଣ୍ଡା କଲେଜ ଛାତ୍ରୀମାନେ ସାଇକେଲ ମାଧ୍ୟମରେ ଯାଉଥିବାବେଳେ ସାମାନ୍ୟ ବର୍ଷା ହେଲେ ଗର୍ତ୍ତରେ ପାଣି ଜମିଯାଉଥିବା ଯୋଗୁ ଖସିପଡି ଆହତ ହେଉଛନ୍ତି। ଏହି ଅସ୍ଥାୟୀ ରାସ୍ତା ମରାମତି କରିବା ପାଇଁ ବଇଣ୍ଡା ଗ୍ରାମବାସୀ ବହୁବାର ଜିଲା ପ୍ରଶାସନ ନିକଟରେ ଅଭିଯୋଗ କଲେ ମଧ୍ୟ କୌଣସି ସୁଫଳ ମିଳିପାରୁ ନାହିଁ। ତୁରନ୍ତ ଏଥିପ୍ରତି ଜିଲାପାଳ ଦୃଷ୍ଟି ଦେବାକୁ ସରପଞ୍ଚ ଦୀପ୍ତିମୟୀ ସାହୁ, ଭଗବାନ ଘିୱାଲା, ରମାକାନ୍ତ ବେହେରା, ଜିତେନ୍ଦ୍ର ବେହେରା, ପରିକ୍ଷିତ ସାହୁ, ସୁନୀଲ ପ୍ରଧାନ, ମାନସ ସାହୁ ପ୍ରମୁଖ ଦାବି କରିଛନ୍ତି।