ଲର୍ଡସ,୧୯।୮: ଲର୍ଡସରେ ଭାରତ ବିପକ୍ଷ ଦ୍ୱିତୀୟ ଟେଷ୍ଟ ମ୍ୟାଚ ହାରିଯିବା ପରେ ଇଂଲଣ୍ଡ କ୍ରିକେଟ ଦଳ ଏକ ଚକିତ କଲା ଭଳି ନିଷ୍ପତ୍ତି ନେଇଛି। ଅଗଷ୍ଟ ୨୫ରୁ ଆରମ୍ଭ ହେବାକୁ ଥିବା ତୃତୀୟ ଟେଷ୍ଟ ମ୍ୟାଚ ପୂର୍ବରୁ ଇଂଲଣ୍ଡ ଦଳ ଏହାର ଅଲରାଉଣ୍ଡର ମୋଏନ ଅଲିଙ୍କୁ ଦଳରୁ ମୁକ୍ତ କରିଛି ଅର୍ଥାତ୍ ମୋଇନ ଅଲିଙ୍କୁ ଦି ହଣ୍ଡ୍ରେଡ୍ ଫାଇନାଲ ଖେଳିବାକୁ ଅନୁମତି ଦିଆଯାଇଛି। ମୋଇନ ଅଲି ଦି ହଣ୍ଡ୍ରେଡ୍ରେ ବର୍ମିଂହାମ ଫିନିକ୍ସର ଅଧିନାୟକ ଏବଂ ତାଙ୍କ ଦଳ ଫାଇନାଲରେ ପ୍ରବେଶ କରିଛି। ଦ ହଣ୍ଡ୍ରେଡ୍ର ଫାଇନାଲ ମ୍ୟାଚ ଅଗଷ୍ଟ ୨୧ରେ ଅନୁଷ୍ଠିତ ହେବ। ଫାଇନାଲରେ କାହାକୁ ବର୍ମିଂହାମ ଦଳ ସାମ୍ନା କରିବେ ଶୁକ୍ରବାର ଦିନ ଏଲିମିନେଟର ମ୍ୟାଚ ପରେ ନିଷ୍ପତ୍ତି ନିଆଯିବ। ତେବେ ମୋଇନ ଅଲ୍ଲୀ ଫାଇନାଲ ଖେଳି ପୁଣି ଦଳକୁ ଫେରିବେ ବୋଲି ଜଣାପଡିଛି।
ଇଂଲଣ୍ଡ ଲିଡ୍ସ ଟେଷ୍ଟ ପାଇଁ ଦଳ ଘୋଷଣା କରିଛି। ଦଳରେ ଅନେକ ପରିବର୍ତ୍ତନ କରାଯାଇଛି। ଇଂଲଣ୍ଡ ତିନି ଖେଳାଳିଙ୍କୁ ଦଳରୁ ବିଦା କରିଛି। ଦଳର ଓପନର୍ ଡୋମ ସିବଲି, ଜ୍ୟାକ କ୍ରାଉଲି ଏବଂ ଜ୍ୟାକ ଲିଚଙ୍କୁ ବିଦା କରାଯାଇଛି। ଏଥି ସହିତ ଟେଷ୍ଟ ଦଳରେ ନମ୍ବର ୧ ଟି -୨୦ ବ୍ୟାଟ୍ସମ୍ୟାନ ଡେଭିଡ ମଲାନ ପୁଣି ସ୍ଥାନ ପାଇଛନ୍ତି। ଡାହାଣହାତୀ ଦ୍ରୁତ ବୋଲର ସାକିବ ମହମୁଦ ମଧ୍ୟ ଦଳରେ ଯୋଗ ଦେଇଛନ୍ତି। ଏଥି ସହିତ ଫାଷ୍ଟ ବୋଲର ମାର୍କ ଉଡ୍ ଆହତ ହୋଇଥିଲେ ମଧ୍ୟ ତୃତୀୟ ଟେଷ୍ଟ ଦଳରେ ସ୍ଥାନ ପାଇଛନ୍ତି।
