ପୁରୀ ଅଫିସ,୧୦ା୧୨:ଶ୍ରୀମନ୍ଦିର ଦ୍ୱାର କେବେ ଖୋଲିବ ତାହାକୁ ଉତ୍କଣ୍ଠାର ସହିତ ସମସ୍ତେ ଚାହିଁବସିଛନ୍ତି। ରାଜ୍ୟବାସୀଙ୍କ ଭାବାବେଗ ସହିତ ଜଡ଼ିତ ଏହି ପ୍ରସଙ୍ଗ ବର୍ତ୍ତମାନର ସବୁଠୁ ଗୁରୁତ୍ୱପୂର୍ଣ୍ଣ ପାଲଟିଛି। କାରଣ କରୋନା କଟକଣା ପାଇଁ ଦୀର୍ଘ ୯ମାସ ହେଲା ମହାପ୍ରଭୁଙ୍କ ଦର୍ଶନ ବନ୍ଦ ରହିଛି। ତେବେ ଖୁବ୍ଶୀଘ୍ର ଏହି ପ୍ରତୀକ୍ଷାର ଅନ୍ତ ଘଟିବ। ଚଳିତ ଡିସେମ୍ବର ମାସରେ ଶ୍ରଦ୍ଧାଳୁମାନେ ଦାରୁଦିଅଁଙ୍କ ଆଖି ସହ ଆଖି ମିଳାଇ ପାରନ୍ତି। ବୁଧବାର ଶ୍ରୀମନ୍ଦିର ମୁଖ୍ୟ ପ୍ରଶାସକ ଡ. କ୍ରିଷନ କୁମାରଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ଏ ନେଇ ଆଲୋଚନା ହୋଇଛି।
ସୂଚନାଯୋଗ୍ୟ, ପୂର୍ବରୁ ଡିସେମ୍ବର ତୃତୀୟ ସପ୍ତାହରେ ଶ୍ରୀମନ୍ଦିର ଖୋଲିବା ଲାଗି ଆଲୋଚନା ହୋଇଥିଲା। ତେବେ ମନ୍ଦିର ଖୋଲାଗଲେ କ’ଣ ସବୁ କଟକଣା ରହିବ ଓ କେମିତି ବ୍ୟବସ୍ଥା କରାଯିବ ସେ ସଂକ୍ରାନ୍ତରେ ବୁଧବାର ବୈଠକରେ ମୁଖ୍ୟ ପ୍ରଶାସକ କ୍ରିଷନ କୁମାର ମନ୍ଦିର ପରିଚାଳନା କମିଟିରେ ଥିବା ସେବାୟତମାନଙ୍କ ମତାମତ ନେଇଛନ୍ତି। ବୈଠକରେ ଏସ୍ପି କନଓ୍ବର ବିଶାଲ ସିଂ ଉପସ୍ଥିତ ରହି କୋଭିଡ୍ କଟକଣା ମାନି ଭକ୍ତ କିପରି ସୁବିଧାରେ ଦାରୁଦିଅଁଙ୍କ ଦର୍ଶନ କରିପାରିବେ ତାହା ଉପରେ ଆଲୋଚନା କରିଥିଲେ। ତେବେ ଜିଲାପାଳ ବଲଓ୍ବନ୍ତ ସିଂ କୌଣସି କାର୍ଯ୍ୟବ୍ୟସ୍ତତା କାରଣରୁ ବୈଠକରେ ଅନୁପସ୍ଥିତ ଥିଲେ। ତେଣୁ ଚୂଡ଼ାନ୍ତ ନିଷ୍ପତ୍ତି ହୋଇପାରିନାହିଁ। ଏହି ବୈଠକରେ ଉପସ୍ଥିତ ଜଣେ ସେବାୟତ ନିଜ ନାମକୁ ଗୋପନ ରଖିବା ସର୍ତ୍ତରେ କହିଛନ୍ତି, ଡିସେମ୍ବରରେ ଶ୍ରୀମନ୍ଦିର ଖୋଲିବା ଉପରେ ଆଲୋଚନା କରାଯାଇଛି। ଏ ନେଇ ଏକ ପ୍ରକାର ଚୂଡ଼ାନ୍ତ ହୋଇସାରିଛି। ତେବେ ଶନିବାର ଛତିଶା ନିଯୋଗ ବୈଠକ ବସିବ। ଏହି ବୈଠକରେ ଚୂଡ଼ାନ୍ତ ନିଷ୍ପତ୍ତି ହେବ। ମନ୍ଦିର କେବେଠୁ ଖୋଲିବ ଓ କେତେ ଲୋକ ଆସିବେ ଆଦି ବିଭିନ୍ନ ପ୍ରସଙ୍ଗରେ ଆଲୋଚନା କରାଯିବ। ସମସ୍ତ ନିଯୋଗ ସମ୍ପାଦକଙ୍କ ଠାରୁ ମତ ନିଆଯିବ। ଏଥିସହ ପୁଷମାସ ପହିଲି ଭୋଗ ନୀତି ନିର୍ଘଣ୍ଟ ଉପରେ ମଧ୍ୟ ନିଷ୍ପତ୍ତି ହେବ।
