ଜଲପାଇଗୁଡି,୧୨।୧୧:ପଶ୍ଚିମବଙ୍ଗର କୁଚ ବେହାରରେ ଏକ ରୋଚକ ଘଟଣା ଘଟିଛି। ଜଣେ ଯୁବକ ୪ ଯୁବତୀଙ୍କୁ ପ୍ରେମ କରି ଧରାପଡିବା ପରେ ଆତ୍ମହତ୍ୟା ଉଦ୍ୟମ କରିଛନ୍ତି। ଏହା ପରେ ତାଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି। କୁଚ ବେହାର ମାଥାବାଙ୍ଗାର ଜୋରପାଟକି ଗ୍ରାମରେ ଏହି ଘଟଣା ଘଟିଛି। ସୁଭମୟ କର ନାମକ ଏହି ଯୁବକ ଏକ ସମୟରେ ଚାରି ଝିଅଙ୍କ ସହ ପ୍ରେମ ସମ୍ପର୍କ ରଖିଥିଲେ। କିନ୍ତୁ ଯେତେବେଳେ ଚାରିଜଣ ପରସ୍ପର ବିଷୟରେ ଜାଣିବାକୁ ପାଇଲେ, ସେମାନେ ସମସ୍ତେ ଏକାଠି ହୋଇ ଯୁବକଙ୍କ ଘର ଆଗରେ ଚଢାଉ କରି ତାଙ୍କୁ ପ୍ରତାରଣା କରିଥିବା ଅଭିଯୋଗ କରିଥିଲେ। ଏହା ପରେ ସୁଭମୟ ଆତ୍ମହତ୍ୟା କରିବାକୁ ଚେଷ୍ଟା କରିଥିଲେ।
କାଳୀ ପୂଜାର ଦୁଇ ଦିନ ପରେ ସୁଭମୟ କର ତାଙ୍କ କାମକୁ ଯିବାକୁ ଘରୁ ବାହାରୁ ଥିଲେ। ସେ ଏକ ମେଡିକାଲ ଷ୍ଟୋରରେ ଜଣେ ବିକ୍ରେତା ଭାବେ କାମ କରନ୍ତି। କିନ୍ତୁ ସେ ଘରୁ ବାହାରିବା ପୂର୍ବରୁ ତାଙ୍କର ଚାରିଜଣ ଗର୍ଲଫ୍ରେଣ୍ଡ ଏକାଠି ତାଙ୍କ ଘରେ ଜଗି ବସିଥିଲେ। ଏହା ପରେ ସମସ୍ତଙ୍କ ମଧ୍ୟରେ ତୀବ୍ର ଯୁକ୍ତିତର୍କ ହୋଇଥିଲା। ଏଥିରେ ବିବ୍ରତ ହୋଇ ସୁଭମୟ ତାଙ୍କ ରୁମ୍କୁ ଯାଇ ବିଷ ଖାଇଲେ।
ତାଙ୍କ ଅବସ୍ଥା ବିଗିଡି ଯାଇ ପଡୋଶୀମାନେ ତାଙ୍କୁ ମାଥାବାଙ୍ଗା ଡାକ୍ତରଖାନାକୁ ନେଇଥିଲେ, ଏବଂ ପରେ ତାଙ୍କୁ କୁଚ ବେହାର ଜିଲା ଡାକ୍ତରଖାନାକୁ ସ୍ଥାନାନ୍ତର କରାଯାଇଥିଲା। ତାଙ୍କୁ ମଧ୍ୟ ସୂଚନା ଦିଆଯାଇଛି ଯେ ଗର୍ଲଫ୍ରେଣ୍ଡମାନେ ତାଙ୍କ ବିରୋଧରେ କୌଣସି ଅଭିଯୋଗ କରିନାହାଁନ୍ତି। ତେବେ ସୁଭମୟ ଏହି ପ୍ରସଙ୍ଗରେ କିଛି କହିବାକୁ ମନା କରିଦେଇଥିଲେ। କିନ୍ତୁ ଡାକ୍ତରଖାନା ସୂତ୍ରରୁ ପ୍ରକାଶ ଯେ ବର୍ତ୍ତମାନ ତାଙ୍କ ଅବସ୍ଥା ବିପଦ ମୁକ୍ତ ରହିଛି। କିନ୍ତୁ ଡାକ୍ତରମାନେ ତାଙ୍କୁ ନଜରରେ ରଖିଛନ୍ତି।
