ପୁରୀ ଅଫିସ,୨୦ା୮: ଶ୍ରୀମନ୍ଦିର ସୁରକ୍ଷା ଓ ସୌନ୍ଦର୍ଯ୍ୟକରଣ ପାଇଁ ବିସ୍ଥାପିତ ହୋଇଥିବା ଲଜ୍ ମାଲିକଙ୍କୁ ବଗଲା ଧର୍ମଶାଳା ଜମି ବିକ୍ରି କରାଯାଇଛି। ୬ଜଣ ଲଜ୍ ମାଲିକଙ୍କୁ ଜିଲା ପ୍ରଶାସନ ୩୪୦ ଡେସିମିଲ ଜମି ବିକ୍ରି କରିଛି। ତେବେ ଏହାକୁ ପ୍ଲଟିଂ କରି ଜିଲାପାଳ ବିକ୍ରି କରିଦେଇଥିବା ନେଇ ଯେଉଁ ଅଭିଯୋଗ ଉଠୁଛି ତାହା ଠିକ୍ ନୁହେଁ ବୋଲି ଅତିରିକ୍ତ ଜିଲାପାଳ ବିନୟ କୁମାର ଦାଶ କହିଛନ୍ତି। ବୁଧବାର ଗଣମାଧ୍ୟମକୁ ସୂଚନା ଦେଇ ଅତିରିକ୍ତ ଜିଲାପାଳ କହିଛନ୍ତି, ବଗଲା ଧର୍ମଶାଳା ବିକ୍ରି ରାଜ୍ୟ ସରକାରଙ୍କ ନିର୍ଦ୍ଦେଶକ୍ରମେ ହୋଇଛି। ସେହିପରି ଲଜିଂ ହାଉସ୍ ଫଣ୍ଡ୍ କମିଟି ଆକ୍ଟ ୨୦୧୮ ସେପେ୍ଟମ୍ବରରେ ଉଚ୍ଛେଦ ହୋଇଯାଇଛି। ଏତଦ୍ବ୍ୟତୀତ ଶ୍ରୀମନ୍ଦିରର ୭୫ମିଟର ଚୌହଦି ଉଚ୍ଛେଦ ପ୍ରକ୍ରିୟାରେ ସହଯୋଗ କରିଥିବା ଲଜ୍ ମାଲିକଙ୍କ ପାଇଁ ବଡ଼ଦାଣ୍ଡରେ ଜାଗା ଦେବାକୁ ହିିଁ ବଗଲା ଧର୍ମଶାଳା ଜମିକୁ ବଛାଯାଇଥିଲା। ତେଣୁ ସେହି ମାଲିକମାନଙ୍କୁ ଧର୍ମଶାଳା ଜମି ବିକ୍ରି କବଲା କରାଯାଇଛି ବୋଲି ଦାଶ କହିଛନ୍ତି।
ଅନ୍ୟପକ୍ଷରେ ବଗଲା ଧର୍ମଶାଳା ଜମି ସଂକ୍ରାନ୍ତରେ ନିଷ୍ପତ୍ତିର ପୁନର୍ବିିଚାର ହେବା ଦରକାର ବୋଲି ପୂର୍ବତନ ମନ୍ତ୍ରୀ ମହେଶ୍ୱର ମହାନ୍ତି କହିଛନ୍ତି। ବଡ଼ଦାଣ୍ଡରେ ଥିବା ଏହି ଏକମାତ୍ର ସରକାରୀ ଧର୍ମଶାଳା ବହୁ ଦଶନ୍ଧି ଧରି ଗରିବ ଓ ନିମ୍ନ ମଧ୍ୟବିତ୍ତ ଭକ୍ତ ଏବଂ ଯାତ୍ରୀଙ୍କୁ ସେବା ଯୋଗାଇ ଆସୁଥିଲା। ତେଣୁ ଏହାର ପୁନର୍ବିିଚାର କରାଯାଉ ବୋଲି ମହେଶ୍ୱର କହିଛନ୍ତି।
