କେନ୍ଦୁଝର,୨ା୩ (ସ୍ବ.ପ୍ର.): କେନ୍ଦୁଝର ଜିଲା ଘଟଗାଁ ରେଞ୍ଜ ଅନ୍ତର୍ଗତ ଘଟଗାଁଠାରୁ ପ୍ରାୟ ୧୦ କି.ମି. ଦୂର ଅଟେଇ ଜଙ୍ଗଲ ମଧ୍ୟ ଦେଇ ଯାଇଥିବା ଜାତୀୟ ରାଜପଥ ନଂ.୨୦ରେ ବୁଧବାର ଭୋର୍ ସମୟରେ ରାସ୍ତା ଅତିକ୍ରମ ସମୟରେ ଅଜଣା ଗାଡ଼ି ଧକ୍କାରେ ଏକ ୪/୫ ବର୍ଷ ବୟସ୍କା ଚିତ୍ରା ହରିଣର ମୃତ୍ୟୁ ହୋଇଛି। ବନ ବିଭାଗ ହରିଣର ବ୍ୟବଚ୍ଛେଦ କରାଇ ଶିଙ୍ଗକୁ ରଖି ମୃତଦେହ ପୋତି ଦେଇଛନ୍ତି। ଦୁର୍ଘଟଣା ସ୍ଥଳ ନିକଟରେ ବନ୍ୟପ୍ରାଣୀମାନଙ୍କ ଯାତାୟତ ପାଇଁ ଏକ ଅଣ୍ଡରପାସ ରହିଛି। ତେବେ ହରିଣଟି ଅଣ୍ଡର ପାସରେ ରାସ୍ତା ପାର ନ ହୋଇ ରାସ୍ତା ଉପରେ ପାର ହେଉଥିବାରୁ ଏଭଳି ଦୁର୍ଘଟଣା ଘଟିଛି। ଏ ନେଇ କେନ୍ଦୁଝର ଡିଏଫ୍ଓ ଧନରାଜ ଏଚ୍ଡି କହିଛନ୍ତି ଯେ, ହରିଣଟି ରାସ୍ତା ପାର୍ ହେଉଥିବା ବେଳେ ଅଜଣା ଗାଡ଼ି ଧକ୍କାରେ ମୃତ୍ୟୁ ବରଣ କରିଛି। ଜଙ୍ଗଲରେ ନିଅଁା ଲାଗିବା କାରଣରୁ କିମ୍ବା ପାଣି ପାଇଁ ବନ୍ୟପ୍ରାଣୀମାନେ ଗୋଟିଏ ଜଙ୍ଗଲରୁ ଅନ୍ୟ ଜଙ୍ଗଲକୁ ଯାଇଥାନ୍ତି। ଉକ୍ତ ଅଟେଇ ଜଙ୍ଗଲରେ ମହାବଳ ବାଘ ଉପସ୍ଥିତି ଜଣା ପଡ଼ିଥିବାରୁ ତାହାର ଗତି ବିଧି ଉପରେ ବନ କର୍ମଚାରୀ ନଜର ରଖିଛନ୍ତି। ହାତୀ ଭଳି ବାଘକୁ ଘଉଡା ଯାଇ ପାରିବନାହିଁ। ଏଣୁ ରାସ୍ତା ପାର୍ ହୋଇ ଅନ୍ୟ ଅଞ୍ଚଳକୁ ଯିବା ସମ୍ଭାବନା ଥିବାରୁ ଏଥି ପ୍ରତି ବନ ବିଭାଗ ସତର୍କ ଦୃଷ୍ଟି ଦେବାକୁ ଦାବି ହେଉଛି।
ରାଜପଥନଂ.୨୦ର ପାର୍ଶ୍ୱରେ ଅଟେଇ ସଂରକ୍ଷିତ ଜଙ୍ଗଲ,ବାଲିବନ୍ଧ ସଂରକ୍ଷିତ ଜଙ୍ଗଲ, ଟାଙ୍ଗରାଣୀ ସଂରକ୍ଷିତ ଜଙ୍ଗଲ, ନରଣପୁର ସଂରକ୍ଷିତ ଜଙ୍ଗଲରେ ରହୁଥିବା ବନ୍ୟପ୍ରାଣୀ ରାସ୍ତା କାମ ୪ଲେନ ହେବା ପରେ ରାତି ସମୟରେ ରାସ୍ତା ଅତିକ୍ରମ ହେଉଥିବାବେଳେ ଦୁର୍ଘଟଣାର ଶିକାର ହୋଇ ମୃତ୍ୟୁବରଣ କରିବା ଘଟଣା ପରିବେଶବିତ ମହଲରେ ଉଦ୍ବେଗର କାରଣ ହୋଇଛି। ବନ୍ୟପ୍ରାଣୀଙ୍କ ଚଳପ୍ରଚଳରେ ବାଧା ନ ଉପୁଜିବା ପାଇଁ ଜଙ୍ଗଲର ମଧ୍ୟ ଭାଗରେ ଆନିମଲ ଅଣ୍ଡରପାସ୍ ନିର୍ମାଣ କରାଯାଉଛି। ବନ୍ୟପ୍ରାଣୀମାନେ ରାସ୍ତାର ଗୋଟିଏ ପାର୍ଶ୍ୱରୁ ଅନ୍ୟ ପାର୍ଶ୍ୱକୁ କିଭଳି ଯିବେ ତାହା ଜାଣି ନ ପାରି ଦୁର୍ଘଟଣାର ସମ୍ମୁଖୀନ ହେଉଥିବା କୁହାଯାଉଛି। ଏହି ଅଟେଇ ସଂରକ୍ଷିତ ଜଙ୍ଗଲରେ ଐତିହ୍ୟ ପ୍ରାଣୀ ହାତୀ ମଧ୍ୟ ରହିଛନ୍ତି। କେବଳ ହାତୀ ନୁହେଁ ବାଘ,ଭାଲୁ,ହରିଣ,କୁଟାରୀ,ବାର୍ହା,ଝିଙ୍କ ଆଦି ଏହି ଅଞ୍ଚଳରେ ରାସ୍ତା ପାର ହୋଇ ଯାତାୟତ କରୁଛନ୍ତି । ଏଥିପ୍ରତି ବନବିଭାଗ ସ୍ବତନ୍ତ ପଦକ୍ଷେପ ନେବାକୁ ଦାବି ହେଉଛି।