ଭୁବନେଶ୍ୱର, ୧୦।୮(ଅସମାପିକା ସାହୁ)ରାଜ୍ୟରେ ଥିବା ସରକାରୀ ଡିଗ୍ରୀ ମହାବିଦ୍ୟାଳୟ ଏବଂ ଶିକ୍ଷକ ଶିକ୍ଷା ପ୍ରତିଷ୍ଠାନଗୁଡ଼ିକରେ ଉପଲବ୍ଧ ଭିତ୍ତିଭୂମିର ମୂଲ୍ୟାୟନ କରାଯିବ। ଶିକ୍ଷାର ଗୁଣାତ୍ମକ ମାନ ଏବଂ କ୍ୟାମ୍ପସରେ ସୁବିଧା ବଜାୟ ରଖିବା ତଥା ବୃଦ୍ଧି କରିବା ଉପରେ ଗୁରୁତ୍ୱ ଦେଇ ଉଚ୍ଚଶିକ୍ଷା ବିଭାଗ ପକ୍ଷରୁ ଏ ସଂକ୍ରାନ୍ତ ନିଷ୍ପତ୍ତି ନିଆଯାଇଛି। ବର୍ତ୍ତମାନ ଶିକ୍ଷାନୁଷ୍ଠାନରେ ଉପଲବ୍ଧ ଥିବା ଭିତ୍ତିଭୂମି, ଆବଶ୍ୟକ ଉନ୍ନତୀକରଣ, ସମ୍ଭାବ୍ୟ ଆହ୍ବାନ ଏବଂ ସୁଯୋଗ ସମ୍ପର୍କରେ ଜାଣିବା ଏହି ମୂଲ୍ୟାୟନର ଉଦ୍ଦେଶ୍ୟ।ଏହାଦ୍ବାରା ଛାତ୍ରୀଛାତ୍ରଙ୍କ ପାଇଁ ସାମଗ୍ରିକ ଶିକ୍ଷଣ ସୁବିଧା ଓ କ୍ୟାମ୍ପସଗୁଡ଼ିକରେ ଶୈକ୍ଷିକ ପରିବେଶ ବୃଦ୍ଧି ପାଇଁ ଯୋଜନା ପ୍ରସ୍ତୁତ ହୋଇପାରିବ। ଏହାକୁ ଦୃଷ୍ଟିରେ ରଖି ଶିକ୍ଷାନୁଷ୍ଠାନର ଗଭର୍ନିଂ ବଡି ବା ପରିଚାଳନା କମିଟି ସହିତ ଅଧ୍ୟକ୍ଷମାନେ କଲେଜରେ ଉପଲବ୍ଧ ଥିବା ଭିତ୍ତିଭୂମିର ମୂଲ୍ୟାୟନ କରିବେ। ଏଥିସହ କିଛି ମୌଳିକ ଆବଶ୍ୟକତା ଥିଲେ ଗୁଗଲ୍ ସିଟ୍ ଫର୍ମାଟ୍ରେ ତାହା ଜଣାଇବେ। ଆସନ୍ତା ୧୪ ତାରିଖ ସୁଦ୍ଧା ସମ୍ପୂର୍ଣ୍ଣ ସୂଚନା ଗୁଗଲ୍ ସିଟ୍ରେ ଦାଖଲ କରିବାକୁ ବୁଧବାର ଉଚ୍ଚଶିକ୍ଷା ବିଭାଗ ପକ୍ଷରୁ ସମସ୍ତ ଡିଗ୍ରୀ କଲେଜ ଏବଂ ଶିକ୍ଷକ ଶିକ୍ଷା ପ୍ରତିଷ୍ଠାନର ଅଧ୍ୟକ୍ଷଙ୍କୁ ନିର୍ଦ୍ଦେଶ ଦିଆଯାଇଛି।